Dawngkham Kiltute
1 Dawngkham kiltute khiah hetih bangin khan i: Korah te songin Asaph fapate Kore fapa Meshelemiah, 2 Meshelemiah fapate khiah a upaber Zechariah, a panihhnak Jediael, a pathumhnak Zebadiah, a palihnak Jathniel, 3 a pangahnak Elam, a parukhnak Jehohanan, a pasarihhnak Nethanel. 4 Ciazolo ah Obed-Edom fapate khiah a upaber Shemaiah, a panihhnak Jehozabad, a pathumhnak Joah, a palihnak Sacar, a pangahnak Nethanel, 5 a parukhnak Ammiel, a pasarihhnak Issachar, a pariathnak Peulthai i. Ziangmanti fanginPathian in amah khiah hmuifu bur i. 6 Cen a fapa Shemaiah in fapate nai ai a paate inn uk sah tute i. Ziangmanti fangin amahte khiah thil bawn thiam ngaingai i. 7 Shemaiah fapate khiah Othni, Rephael, Obed, le Elzabad te i. A unaute Elihu le Semachiah khiah thil bawn thiam ngai i. 8 He mi a veksen khiah Obed-Edom fapate songai suakhnak i. Amahte le a fapate le a unaute khiah thil bawn thiam le tha hat ngai i ai, Obed-Edom songin sawmrukm le panih suak i. 9 Meshelemiah in thil bawn thiam fapate le unaute hlairiat um i. 10 Merari fate Hosah in khai fapate nai i. Ciate khiah a hmasaber Shimri (a upaber inapui lo ai a paa in a hmasaber ah dah i), 11 a panihhnak Hilkiah, a pathumhnak Tebaliah, a palihnak Zechariah i; Hosah fapate le a unaute khiah a veksen in hlaithum i.
12 He mite khiah dawngkham kiltu tuhai rilhnak mi upate i Amahte khiah Bawipa inn songah naper tuhin, amahte unaute bangin tavuan nai i. 13 Amahte paate innkua songin amahte kil hmun tuh dawngkham khiah a cik le a lian ti lo in me hlah in rilhnak i. 14 Nisuah hmun lam Dawngkham me khiah Shelemiah in ngah i. Ciafangin amahte in a fapa mi thurel thiam Zekhariah ca in me hlah ai, Zekhariah in Saklam Dawngkham ngah i. 15 Obed-Edom in Hlang Dawngkham ngah ai a fapate in thilkhawihmun ngah i. 16 Shuppim le Hosah in Nitla hmun lam Dawngkham le lampui cungta ai Shalleketh Dawngkham ngah i. Santari kiltute khiah a hmai le hmaiton dun in 17 nisuah hmun lamah ah Levi te in nisiar in mi paruk, saklamah nisiar in mi pali, hlanglam ah nisiar in mi pali um ai thilkhawlhmun khiah panih hnua panih in kil de i. 18 Nitla hmun lam ai tualvan ah lampui ah mi pali in kil ai a tualvan ah mi panihin kil i. 19 He mite khiah dawngkham kiltu te i ai, Korah le Merari songin suakhnak te i.
Tangka Khawihmun kiltute
20 Levi mite songah Ahijah khiah Pathian inn songai tangka khawihmun le Pathian hnenah hluhnak thilrite khawihmun kilkhawltu i. 21 Kershon song ai Laadan fapate inn songkhat ai upate khiah Jehieli i. 22 Jehieli fapate, Zetham le a nau Joel khiah Bawipa inn songai tangka khawlhmun uk tutte i. 23 Cen Amram mi, Izhar mi, Hebron mi le Uzziel mite songin, 24 Moses fapa Gershom fapa Shebuel khiah tangka khawlhmun bawi pakhat i. 25 Cen a unaute Eliezer fapate khiah a fapa Rehabiah, a fapa Jeshaiah, a fapa Joram, a fapa Zikhri, le a fapa Shelomith i. 26 He mi Shelomith le a unaute khiah, Kumpibawi David le a paa innkua songai upate le raalkap a thawng le a za uktu bawite le raalbawite ai Pathian hnenah hluhnak thill khawlhmun a veksen uktu te i. 27 Cen raalte hnenai a suthnak thilrite khiah Bawipa inn remhnak tuhin Pathian hnenah hlu i. 28 Cen profet Samuel le Kish fapa Saul le Ner fapa Abner le Zeruiah fapa Joab te in Pathian hnenah hluhnak thil veksen khiah Shelomith le a unaute kuthnia ah i.
29 Izhar te songin, Chenaniah le a fapte in Jerusalem pua ai umtu Israel mite vumah bawi cang ai thukhan sah i. 30 Hebron mite songin Hashabiah le a unau naper bente thawng khat le za sarih te in, Jordan in nitla hmun lamai Israel mi in Bawipa hnenah le kumpibawi hnenah naperhnak khiah amahte tavuan i. 31 Hebron mite songin, amahte pupa suahkehhnak khumhnak cazin song bangin, Jerijah khiah a upaber i. David khiah kumpibawi kum sawmli tuan fangin amahte khiah sii ai, Kilead ai Jazer ah thil bawn thiam mite khiah tawk i. 32 Amah in unaute thil bawn thiam minung thawng nih le za sarih nai i. Amahte khiah amahte paate inn songkhat songah mi upate i. Pathian thu lamah le kumpibawi thawn senghnak thu lamah a veksenin amahte khiah Kumpibawi David in Reuben mi le Kad mi le Manasseh hin tlamhmat mite vumah bawi cang tuhin dah i.