1 He hnua fangin Ammon mite kupibawipa thi ai a fapa in kumpibawi cang i. 2 Ciafangin David in, “A paa Nahash in ngaih i har awng bangin, a fapa Hanun khiah ngaihharhnak hmuh tuh ing.”ti in ti i. Ciamanin David in a paa topui tuhin, Hanun hnenah a hnenumte khiah hlat i. Ciafangin David hnenumte khai Hanun topui tuhin Ammon mite ramah hleng i. 3 Ciafangin Ammon mi upate in amahte bawipa Hanun hnenah, “David in na paa khiah upat manin na topui tuhin a hnenumte hlat vuah i aw sim? David in a hnenumte khiah na khuapui khiah si tuh le cul tuh le tawng tuhin a hnenumte hlat i lo im?”ti in ti i. 4 Ciamanin Hanun in David hnenum te khiah pom ai, amahte kahmul khiah met sah ai, amahte thuam khiah a tun tianin a laiteng in zik sah ai tlung ruai i. 5 Amahte in David khiah cia thu rel fangin, amahte khiah zakthi ze manin amahte tawk tuhin mi dang hlat i. Kumpibawipa in, “Jericho ah ning kahmul khang leh hlanlo um tu i lai, ciafangin tlung tuu-ih.”ti in ruai i.
6 Ammon mite in amahte khiah David hmai ah a uih khiah hmu fangin, Ammon mite in Mesopotamia le Siria Maachah le Zobah hnenin siphuhleng le siphuhtotu raalkapte nga tuhin tangka talan thawngkhat pe i. 7 Ciamanin amahte in siphuhleng thawng sawmthum le thawngnih khiah kumpibawi Maachah le a raalkapte kawmin nga ai anite khai Medeba ralkhat ah caam i. Cen Ammon mite khai amahte khua in hmunkhat in raaltawng tuhin khawm tlaang i 8 Cia khiah David in za fangin, Joab le a raalbawite khiah a veksenin kuat i 9 Ammon mite khai suak ai, raaltawng tuhin kawl dawngkham hmai ah pai i. Cen raaltawng tuhin kawitu kumpibawite khai amahte lekin lo lai ah um i.
10 Ciafangin Joab in a raalte khiah a hmai ah le a hnualam ah hmu fangin, a raalpha ber Israel mite khiah Siria te tawng tuhin ril i. 11 A taanghnak Israel minungte khiah Ammon mite tawng tuhin a nau Abishai kut ah ap i. 12 Ciafangin Joab in, “Siria mite in i neh tum lekhaw, i bawm tuh i si. Ikhalselai Ammon mite in na neh tum lekhaw, na bawm tuhin kawi tuh ing. 13 Raalpha in um tuu-ih. Kin minungte le kin Pathian khuapuite ca in pasal bang in tawng nga sing. Bawipa in a pha bangin bawn tuh i.”ti in rel i. 14 Joab khai a raalkapte thawn Siria mite tawng tuh in a nong ah kawi fangin, Siria te khai Joab hmai in tlan i. 15 Ammon mite in Siria mite tlan hmu fangin, anite khai Abishai hmai in tlan ai khua songah lut i. Ciamanin Joab khai Jerusalem ah tlung i.
16 Siria mite in Israel mite in neh lio khiah hmu fangin, anite khai hmunkhat in khawm tlaang i. Ciafangin Hadarezer in Run ralkhat ai Siria mite khiah kawih ai, Hadadezer raalbawipa Shophach in amahte hmai in feh i. 17 Cia thu khiah David rel fangin, David khai Israel mite khiah a veksenin hmunkhat in khawm ai, Jordan khiah tan ai amahte tawng tuhin pai i. David in Siria te tawng tuhin pai fangin Siria te David khiah tawng i. 18 Ciafangin Siria mite khai Israel mite hmai in tlan i. David in Siria te siphuhleng totu mi thawng sarih le raalkap thawng sawmli le amahte raalbawipa Shophach khiah rek i. 19 Hadadezer hnenumte in amahte khiah Israel mite in neh khiah hmu fangin, anite khai Israel mite hnenah remhnak si ai Israel mite hnenum cang i. Ciamanin Siria mite in Ammon mite khiah bawm nuam lo i hang.