1 David in amah ca tuhin David Khua ah inn te sa i. Cen Pathian thingkuang ca in khai laipua rem ai buk pakhat sak i. 2 Ciafangin David in, “Levi mite lo mi dang aisu in khai Pathian thingkuang khiah phur ma seh. Ziangmanti fangin Bawipa in amahte khiah Pathian thingkuang phurtu tuhin le Amah hmai ah kumzangza in naper tuhin ril zo i.”ti in ti i. 3 Ciafangin Bawipa thingkuang khiah cia ca ai a remhnak hmunah dah tuhin, David in Israel mite veksen khiah Jerusalem ah hmunkhat in khawm ruai i. 4 David in Aaron fate le Levi mite khiah pumkhawm ruai i. 5 Kohath fapate songin, a upaber Uriel le a ulenaute za le kul; 6 Merari fapate songin, a upaber Asaiah le a ulenaute za le kul; 7 Kershom fapate songin, a upaber Joel le a ulenaute za le sawmthum; 8 Elizaphan fapate songin, a upaber Shemaiah le a ulenaute zanih; 9 Hebron fapate songin, a upaber Eliel le a ulenaute sawmriat; 10 Uzziel fapate songin, a upaber Amminadab le a ulenaute za le hlainih te i. 11 David in phungkite Zadok le Abiathar le Levi te le Uriel, Asaiah, Joel, Shemaiah, Eliel le Amminadab khiah ko ai, 12 amahte hnenah, “Ningte khiah ning paa Levi te inn songkhat songah mi upate i si. Ning unaute kawmin a cianghlim in um tu i lai, Israel Bawipa Pathian thingkuang khiah cia ca ai i remhnak hmunah kawih tuu-ih. 13 Ziangmanti fangin hmasa ah ningmah in bawn lo manin kin Bawipa Pathian khiah kin lakah thinraw i. Ziangmanti fangin a hman ai bawn dan khiah kinte in Amah khiah zawt hal lo i sing.”ti in rel i. 14 Ciamanin phungkite le Levi mite khai Israel Bawipa Pathian thingkuang kawih tuhin amahte veve khiah cianghlim in um i. 15 Ciafangin Moses in Bawipa ai ruaihnak thu bangin, Levi mite in Pathian thingkuang khiah amahte kodar ah thing pum thawn phur i.
16 Ciafangin David in Levi upate hnenah, amahte in amate ulenaute khiah lasatu le guitar le congcing le darbu te thawn aw cawm ngai in lasa tuhin ril tuhin ruai i. 17 Ciamanin Levi mite in Joel fapa Heman le a unaute Berekhiah fapa Asaph le anite unaute Merari fapate, Kushaiah fapa Ethan; 18 cen amahte kawmin a nauta deuh a unaute: Zekhariah, Ben, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Elipheleh, Mikneiah, Obed-Edom, le Jeiel, dawngkham kiltute; 19 lasatute, Heman, Asaph, le Ethan te in darbu tumtu tuhin dah i. 20 Zekhariah, Aziel, Shemiramoth, Jehiel, Unni, Eliab, Maaseiah, le Benaiah te khiah Alamoth bangin guitar tum tu tuhin dah i. 21 Mattithiah, Elipheleh, Mikneiah, Obed-Edom, Jeiel, le Azaziah te in Sheminith vumah congcingte tumtu tuhin dah i. 22 Levi mi upa Khenaniah khiah la lamah thiam ngai manin, la uk tu in dah i. 23 Berekhiah le Elkanah khiah thingkuag ca in dawngkham kiltu ah dah i. 24 Shebaniah, Joshaphat, Nethaneel, Amasai, Zechariah, Benaiah, le Eliezer phungkite khiah Pathian thingkuang hmai ah thirhlung tum tu tuhin dah i. Obed-Edom le Jehiah khiah thingkuang ca in dawngkham kiltu ah dah i.
25 Ciamanin David le Israel mi upate le raalkap a thawng tam ngai ai uktu bawite khai Obed-Edom inn in Bawipa thawn lungkhim dunhnak thingkuang khiah ang ngai in kawih tuhin kawi i. 26 Bawipa lungkhim dunhnak thingkuang phurtu Levi te khiah Bawipa in bawm manin, amahte in kawlpaw cang pasarih le tu cang pasarih hlu i. 27 David khai thingkuang phurtu Levi te le lasatute le la uktu Khenaniah kawmin thuam pha ngai sil i. Cen David in pon ephod khai sil i. 28 Ciatih bangin Israel mi veksenin Bawipa lungkhim dunhnak thingkuang khiah au kong le selki le thirhlung le guitar le congcing te tum kongin kawih i.
29 Bawipa thawn lungkhim dunhnak thingkuang khiah David Khua songah hleng fangin, Saul fenu Makhal in padinpauh songin sik ai, Kumpibawipa David laam le lasa khiah hmu fangin, a thin songin nautat i.