1 Ciafangin Tyre kumpibawipa Hiram in David hnenah a hnenumte le sida thing le ukkhe satute le lettamate khiah David inn sa tuhin kuat i. 2 Ciafangin Bawipa in a kumpibawi ukhnak khiah kho ruai khiah David in hmu i. Ziangmanti fangin a kumpibawi ukhnak khiah Bawipa minung Israel mite manin hming thang ngai i.
3 Ciafangin David khai Jerusalem ah nu tamngai nu ai fapa le fenu khai tamngai nai i. 4 Hete khiah Jerusalem ah a nai hnak fate hming i: Shammua, Shobab, Nathan, Solomon, 5 Ibhar, Elishua, Elpelet, 6 Nokah, Nephek, Japhia, 7 Elishama, Beeliada, le Eliphelet te i.
8 Filistin te in David khiah Israel mi veksen uk tu tuhin kumpibawi ai ril i ti za fangin, David tawng tuhin feh i. David in za fangin amahte tawng tuh in feh i. 9 Ciafangin Filistin te in Rephaim Rawn zawllai khiah sim i. 10 Ciafangin David Bawipa hnenah, “Filistin te khiah tawng tuhin feh ngang? Amahte khiah i kut songah i ap nga sim?”ti in zawt i. Ciafangin Bawipa in amah hnenah, “Feh tu. Amahte khiah na kut songah na ap tuh ing.”ti in sawn i. 11 Ciamanin anite khai Baal Perazim ah hong ai ciata ah amahte khiah neh i. Ciafangin David in, “Bawipa in i raalte khiah ti zuul ruai bangin i kut songin zuul ruai sio i.”ti in ti i. Ciamanin cia hmun khiah Baal Perazim ti in ko i. 12 Filistin te in amahte pathian khiah ciata ah zam ai David in cia pathiante khiah mai thawn tai tuhin thu pe i.
13 Ciafangin Filistin te in cia rawn zawllai khiah sim leh thio i. 14 Ciamanin David in Pathian khiah zawt leh thio i. Ciafangin Pathian in, “Amahte khiah tawng tuh lo i si. Amahte khiah kulh tulai, malbari thing hmai in amahte khiah taih tu. 15 Cen malbari thing vumin raalkapte vakhnak kepau khiah na za fangin, raaltawng tuhin feh tu. Ziangmanti fangin, Filistin raalkapte tawng tuhin Pathian khiah na hmai in feh zo i hang.”ti in rel i. 16 Ciamanin David in Pathian ai ruai bangin bawn ai Filistin te raalkap khiah Kibeon ai panin Kezer tian in hnawt sio i. 17 Ciafangin David khiah ram hmuahhmuah ah thang ai, mi phun hmuahhmuah in amah khiah kih i.