2 Kumpibawite 19 2 Kings

¹ Cia thu khiah Hezekiah in za fangin, ani khai a thilthuam khiah zik ai vaidip sil in Bawipa inn songah lut i. ² Ciafangin Hezekiah in kumpibawi inn kilkhawltu Eliakim le cazi Shebna le phungki upate khiah vaidip sil ruai ai, Amoz fapa profet Isaiah hnenah feh ruai i. ³ Ciafangin amahte in Isaiah hnenah, “Hezekiah in, ‘Tunnia khiah rimsu nia, hauhnak nia le zakthi kul nia i. Ziangmanti fangin nausen te banghma napui ai, a te tuhin tha nai nawn lo i. ⁴ Rabshakeh bawipa Assiria kumpibawipa in a nung Pathian zauhsuamhnak pon khiah Rabshakeh in relhnak khiah na Bawipa Pathian in za in lo hau thai pang i. Ciamanin a taanghnak lam Judah mite ca in sawnget tu.’ ti in ti i.” ti in rel i.

⁵ Ciamanin Kumpibawipa Hezekiah hnenumte khai Isaiah hnenah kawi i. ⁶ Ciafangin Isaiah in amahte hnenah, “Ning bawipa hnenah, ‘Bawipa in, “Assiria kumpibawipa hnenumte ai zauh i suam hnak pon ning zahnak manin lau mah ih. ⁷ Amah vumah rauhla pakhat hlat tuh ing. Ciafang in amah in thudon khiah za tuh ai amah ramah let leh tuh i. Ciafangin amah ramah vangsau thawn thi ruai tuh ing.” ti i.’ ti in rel tuu-ih.” ti in rel i.

⁸ Rabshakeh in Assiria kumpibawipa khiah Lachish in thawn i ti za fangin, Rabshakeh khai let ai Assiria kumpibawipa khiah Libnah tawng in tawk i. ⁹ Cen Assiria kumpibawipa in, Ethiopia kumpibawipa Tirhakah in amah tawng tuhin kawi i ti khai za i. Ciamanin Hezekiah hnenah a hnenumte khiah hlat leh thio ai, ¹⁰ “Hezekiah hnenah, ‘Ning Pathian in, “Jerusalem khiah Assiria kumpibawi kut songah pe tuh lo i.” ti in ning zawl ma seh. ¹¹ Assiria kumpibawite in mi dang ram hmuahhmuah khiah neh sio khiah za zo i si. Ciamanin na luat tuh im? ¹² I paa ai nehhnak ram Kozan le Haran le Rezeph le Telasser ai Eden mite pathiante in amahte khiah o ben awm? ¹³ Hamath kumpibawi le Arpad kumpibawi le Sepharvaim le Hena le Ivah khuate kumpibawi tang a konah i hang?’ ti in rel tuu-ih.” ti in hlat i.

¹⁴ Hezekiah in cia lai khiah a hnenumte hnenin ngah ai siar i. Hezekiah khai Bawipa inn ah hong ai cia lai khiah Bawipa hmai ah pharh i. ¹⁵ Ciafangin Hezekiah khai Bawipa hmai ah, “ Aw, Israel Bawipa Pathian, cherubim laklawh ai umtu, nangmah lek khiah laivum kumpibawi veksen vumah Pathian i si. Nangmah in van le laivum bawn i si. ¹⁶ Aw Bawipa, na naa thawn kin ngai sah tu. Aw Bawipa, na mit khiah hong in sik tu. A nung Pathian zauhsuam tuhin kuathnak Sennacherib pon khiah ngai tu. ¹⁷ Bawipa, Assiria kumpibawite in mi ram dang khiah hnawm sah peu ai, ¹⁸ ciate pathian khai mai in tai sah peu i. Ziangmanti fangin amahte khiah pathian i lo ai minung kut ai bawnhnak thing le lungto te i. Ciamanin amahte in cia pathiante khiah hnawmcan berh i. ¹⁹ Ciamanin, aw Bawipa kin Pathian, a kut song in kin o tulai, laivum ai kumpibawi hmuah in nangmah lek khiah Bawipa Pathian i ti in na ling tu seh.” ti in sawngen i.

²⁰ Ciafangin Amoz fapa Isaiah in Hezekiah hnenah, “Israel Bawipa Pathian in, ‘Assiria kumpibawipa Sennacherib manin i hnenah na sawngenhnak khiah na za sah ing.’ na ti i. ²¹ Hetih bangin Bawipa in Sennacherib thu khiah rel i:

‘Zion fenu in nau na tat ai hnih na cip i.

Jerusalem fenu in na khelleh lamin a lu khiah leuh i.

²² Aisu khiah nang in zauhsuam ai awrsia in cam

Cia khiah Israel a Cianghlim Pa lakah bawn i i si?

Aisu lakah na aw khiah huuk in

na mit thawn a hngal in sik i si? si.

²³ Na hnenumte thawn Bawipa khiah zauhsuam rauh i si.

Nangmah in, “I siphuh leng te kawmin

Lebanon mualvum a saangber hmunah kai ben ing.

Lebanon ai a saangber lawithing te le

a phaber farthing te khiah vawng zo ing.

A saangber letlo hmunah lut tuh ing.

A tupui songah lut tuh ing.

²⁴ Mi ram dangah namkum tamngai co zo ai

cia namkumte songai ti khai ding zo ing.

I keruh thawn Izip rawnti khiah kaang ruai

berh ing.” ti i si.

²⁵ Za awng lo i sim?

He hlan a raipui lai in bawn zo ing.

He hlan a raipui lai in ruatcia zo ing.

Tun fangin nangmah in a kulhnak khuapuite

khiah hnawm sio in dah tuhin kaimah in khim ruai ing.

²⁶ Ciamanin cia khua ai umtute in tha nai tau lo i.

Amahte khiah thincawl ai zakthi ruai i.

Amahte khiah lo lai ai hampa le hnuh hing te bang i.

Innphu vumah po ai a khang hlanah ni in

kang liohnak hampa bang i.

²⁷ Ikhalselai na umhmun le

na feh hmun le na tlung hmun le

i lakah na rawhnak khai na ling sah ing.

²⁸ I lakah na rawhnak le a luahkul na nuncan

khiah i naa songah hleng zo i.

Ciamanin i thir huk thawn na hnar na thil tuh ai,

na kahmur ah i kakharh thawn na kharh tuh ing.

Na hleng hmun lampui in na tlung ruai leh tuh ing.

²⁹ He khiah Hezekiah, nangmah ca in hnikhnaih hnak i tuh i:

Amah thu ai pohnak rong khiah tun kumah ei tuh i si.

A kum nihhnak fangin cia rong ai pohnak ei tuh i si.

Ikhalselai a kum thumhnak fangin rong cing in

rongkhawm tuu-ih.

Capit khiah bir in a thai ei tuu-ih.

³⁰ Judah mi lakai a taanghnak mite in

a hnialam ah hnuk hla tuhai a vumlam ah thai tuh i.

³¹ Ziangmanti fangin Jerusalem songin

a taanghnak mite suak tuhai,

Zion Mual vumin a tlan ngah tute suak tuh i.

He khiah vancung mite Bawipa in a hiam ngai

in bawn tuh i.’ ti in ti i.

³² Ciamanin Bawipa in Assiria kumpibawipa thu khiah,

‘Amah in he khua songah lut tuh lo i.

Ciata ah amah in conkiang khai kap tuh lo i.

Cen a hmai ah lum thawn khai kawi tuh lo i.

Cen cia khua kulh tuhin laipua khai pum tuh lo i.

³³ A hleng hmun lampui pah in let leh tuh i.

Amah in he khua songah lut tuh lo i.’ ti in Bawipa in rel i.

³⁴ “Ziangmanti fangin Kaimah ca le i hnenum

David ca in he khua khiah kaimah in

tawng in o tuh ing.’ti in ti i.”ti in rel i.

³⁵ Ciale zan khat ah Bawipa vancung mi khai suak ai, Assiria raalkapte thawng za le sawmriat le thawng nga khiah rek i. Mite khai a thangha zingniu in tho fangin a veksen in mithi cang sio i. ³⁶ Ciamanin Assiria kumpibawipa Sennacherib khai ciata in let ai a khua ah tlung le Nineveh ah um ngio i. ³⁷ Sennacherib khai a pathian Nisroch temple songah Nisroch bia in um teng fangin, a fapa Adrammelek le Sharezer in vangsau thawnin rek ai ciaben fangin anite khai Ararat ramah tlan kawm i. Ciafangin a fapa Esarhaddon in a ca in kumpibawi cang i.

← Previous 18

2 Kumpibawite 19 2 Kings

Next → 20