1 Israel kumpibawi Jeroboam kum kul hluan sarih kum fang in, Judah kumpibawi Amaziah fapa Azariah khiah kumpibawi cang i. 2 Amah khiah kumpibawi cang fangin kum hlairuk i ai, Jerusalem ah kum sawmnga le kum nih uk i. A nuu hming khiah Jerusalem mite Jekholiah i. 3 Amah in a paa ai bawnhnak hmuahhmuah bangin Bawipa hmai ah a hman in bawn i. 4 Ikhalselai a saanghmun ai biahmun te tu bal lo i. Mite in cia a saanghmun ah raithawi ai rimhmuite tai hlen i. 5 Ciafangin Bawipa in amah khiah miphar cang ruai ai a nung songah miphar in um i. Ciamanin amah lek niu in inn pakhat hluh i. Ciamanin kumpibawi fapa Jotham in kumpibawi inn le Judah mite thu khiah khan sah i.
6 Azariah bawnhnak hmuahhmuah khiah Judah kumpibawite thuanthu khumhnak ca-uk songah khum sio i lo im? 7 Ciafangin Azariah khai a paate bangin thi ai, David Khua songah a paate vui hmunah vui i. Ciafangin amah ca in a fapa Jotham in kumpibawi cang i.
8 Judah kumpibawipa Azariah kum sawmthum le kum riat kumah, Jeroboam fapa Zekhariah khiah Israel mite vumah Samaria ah hla ruk kumpibawi cang i. 9 Amah in a paate bangin Bawipa hmai ah sualhnak lek bawn i. Israel mite sual ruaitu Nebat fapa Jeroboam sualhnak khiah hlun sio i. 10 Ciafangin Jabesh fapa Shallum in mite hmai ah tawng ai rek le amah ca in kumpibawi cang i.
11 Zekhariah bawnhnak hmuahhmuah khiah Israel kumpibawite thuanthu khumhnak ca-uk songah khum sio i. 12 He khiah Bawipa in Jehu hnenah, “Na fate in Israel kumpibawi khiah sanli tian tuan tuh i.” ti ai relhnak thu i. Ciatih bangin khim i.
13 Jabesh fapa Shallum khiah Judah kumpibawi Uzziah kum sawmthum le kum kua kumah kumpibawi cang ai, Samaria ah hla khat pumpalah uk i. 14 Ziangmanti fangin, Kadi fapa Menahem khai Tirzah in Samaria ah kawi ai, Jabesh fapa Shallum khiah rek ai amah ca in kumpibawi tuan i.
15 Shallum bawnhnakte le a raaltawng dante khiah Israel kumpibawite thuanthu khumhnak ca-uk songah khum sio i. 16 Ciafangin Menahem in Tirzah in Tiphsah le a song ai umtu mite le a hiang ram ai umte khiah amahte in dawngkham hon nuam lo manin, rek sio ai naupai nupuite khai a ril puah sah berh i.
17 Judah kumpibawi Azariah kum sawmthum le kum kua kum fangin, Kadi fapa Menahem khai Israel kumpibawi cang ai Samaria ah kum ha uk i. 18 Amah in Bawipa hmai ah sualhnak lek bawn ai Israel mite sual ruaitu Nebat fapa Jeroboam sualhnak khiah hlun sio i. 19 Ciafangin Assiria kumpibawi Pul in Israel ram khiah sim i. Ciafangin a kumpibawi ukhnak kho thaihnak tuhin Menahem in Pul khiah tangka talan thawngkhat pe i. 20 Menahem in cia tangka khiah Assiria kumpibawi pe tuhin miliante veksen hnenin shekel sawmnga ten khuai i. Ciamanin Assiria kumpibawipa khai tlung ai cia ramah um lo i.
21 Menahem bawnhnak hmuahhmuah khiah Israel kumpibawite thuanthu khumhnak ca-uk songah khum sio i lo im? 22 Ciatih bangin Menahem khiah a paate bangin thi ai a fapa Pekahiah khiah a ca in kumpibawi tuan i.
23 Judah kumpibawi Azariah kum sawmnga hnak fangin, Menahem fapa Pekahiah khiah Samaria ah Israel kumpibawi cang ai kum nih uk i. 24 Amah in Bawipa hmai ah sualhnak lek bawn ai Israel mite sual ruaitu Nebat fapa Jeroboam sualhnak khiah hlun sio i. 25 Ciafangin a raalbawi upaber Remaliah fapa Pekah in Kilead mi sawmnga thawn amah khiah tawng ai Arkob le Arieh kawmin, Samaria ai kumpibawipa inn ah rek ai Pekah khai kumpibawi cang i. 26 Pekahiah bawnhnak hmuahhmuah khiah Israel kumpibawite thuanthu khumhnak ca-uk song khum sio i.
27 Judah kumpibawipa Azariah kum sawmnga le kum nih hnak fang in, Remaliah fapa Pekah khai Samaria ah kumpibawi tuan ai kum kul uk i. 28 Amah in Bawipa hmai ah sualhnak lek bawn ai Israel mite sual ruaitu Nebat fapa Jeroboam sualhnak khiah hlun sio i. 29 Israel kumpibawi Pekah uk teng in, Assiria kumpibawipa Tiklath-Pileser khai kawi ai, Ijon le Abel Beth Maakhah le Janoah, Kedesh, Hazor, Kilead le Kalilee le Naphtali ram hmuahhmuah khiah lang ai, a minungte khiah Assiria ramah thawngtauh i. 30 Ciafangin Elah fapa Hoshea in Pekah khiah tawng ai rek le Uzziah fapa Jotham kum kul hnak khim fangin, Hoshea khai Pekah ca in kumpibawi cang i. 31 Pekah bawnhnak hmuahhmuah khiah Israel kumpibawite thuanthu khumhnak ca-uk songah khum sio i.
32 Israel kumpibawi Pekah kum nih hnak fangin, Judah kumpibawi Uzziah fapa Jotham khiah kumpibawi cang i. 33 Amah khiah kumpibawi cang fangin kum kul hluannga i ai Jerusalem ah kum hlairuk uk i. A nuu hming khiah Zadok fenu Jerusha i. 34 Amah in Bawipa hmai ah a hman khiah bawn i. A paa Uzziah bawnhnak bangin a veksenin bawn i. 35 Ikhalselai a saanghmun ai raithaw hmunte tu hnawmcan lo i. Ciamanin mite in cia a saanghmun ah raithawi ai rimhmui tai hlen i. Cen amah in Bawipa inn ai a Cungta Dawngkham khiah sa i.
36 Jotham bawnhnak te khiah a veksenin Judah kumpibawite thuanthu khumhnak ca-uk songah khum sio i lo im? 37 Ciateng in Bawipa in Siria kumpibawi Rezin le Remaliah fapa Pekah khiah Judah sim tuhin hlat i. 38 Ciatih bangin Jotham khai a paate bangin thi i. Cen a paate vui hmun David Khua ah vui i. Ciafangin a fapa Ahaz in amah ca in kumpibawi cang i.