1 Solomon in Bawipa inn le kumpibawipa inn le a nuamhnak hmuah sa ben liang fangin, 2 Solomon hnenah Bawipa khiah Kibeon ah a daak awng bangin Solomon hnenah daak leh thio i. 3 Ciafangin Bawipa in Solomon hnenah, “I hnenah na sawngenhnak le na ninghio kunhnak khiah na za sah zo ing. Kumzangza in i hming dah hmun tuhai na sahnak he inn khiah cianghlim ruai zo ing. He inn vumah i mit le i thinlung khiah a catlo in um tuh i. 4 Na paa David bangin, i hmai ah thinlung hman le dikcang niu in vak in, i dan upadi te le i thukhanhnak te khiah hlun lesikhaw, 5 na paa David hnenah, ‘Israel kumpibawi tauhkheng vumah to tuhin fapa nai lo in um tuh lo i si.’ ti in thu i kam bangin, Israel vumah na kumpibawi ukhnak khiah kumzangza in kho ruai tuh ing. 6 Ikhalselai nangmah le na fapate in i hlun lo in le na hmai ai i dahhnak i thukhamte le i dan upadite khiah hlun lo in a dang pathiante khiah hlun in bia leisikhaw, 7 Israel mite khiah amahte i pehnak ramin cem tuh ai i hming ca ai 8 i cianghlim ruaihnak he inn khiah i mithmuh in sep tuh teu ing. Israel khiah mi phun hmuahhmuah zauhsuam hnak le thuthimhnak cang tuh i. 9 Ciafangin amahte in, ‘Amahte in Izip ramin a paate suah tu Bawipa amahte Pathian khiah zam ai a dang pathiante khiah kuah ai bia ai amahte na khiah per sah manin Bawipa in he rimsuhnak khiah amahte vumah hleng ruai i.’ti in sawn tuh i.”ti in rel i.
10 Solomon in Bawipa inn le kumpibawipa inn sa ben khelleh kum kul hnua fangin, 11 (Tyre kumpibawi Hiram in Solomon khiah a daih zahin sida thing le saipres thing le sui khiah pe i), Kumpibawipa Solomon in Hiram khiah Kalilee ramai khua kul khiah pe i. 12 Ciafangin Hiram in Solomon pehnak khuate sik tuhin Tyre in feh i. Ikhalselai Hiram khiah lungkhim lo i. 13 Ciamanin amah in, “I unau, he na i pehnak khuate khiah zai bang khuate i pa?”ti in ti i. Cia khuate khiah Khabul ti in tunnia tian in ko i. 14 Ciafangin Hiram in kumpibawipa khiah sui talan 120 pe i.
15 He manin Kumpibawipa Solomon in kuli khuai i: Bawipa inn le amah inn le Millo le Jerusalem renhnak khan le Hazor le Mekkido le Kezer te sahnak tuh in kuli khuai i. 16 (Izip kumpibawipa Pharaoh khai hongai Kezer khiah lang ai mei thawn tai ai, cia khua ai umtu Khanaan mite khiah rek le cia khua khiah a fenu Solomon nu sum i. 17 Solomon in Kezer le Beth Horon Hniata, 18 Baalath le Judah ram nelrawn songai Tadmor khai sa i. 19 Cen rongkhawi hmun khuate le a siphuh leng khawi hmun khuate le siphuhtotu ralkapte umhmun khuate le Solomon in Jerusalem khua ah le Lebanon ah le a ukhnak ram songah a sa nuamhnak bang in sa i.
20 Israel minungte i lo mi a taanghnak Amor mi, Hit mi, Periz mi, Hiv mi, Jebus mi, 21 Israel mite in a vuva ai rek ben lohnak mite tesin fate khiah Solomon in kuli khuai ai tunnia tianin ciatih bang i um hlen i. 22 Ikhalselai Solomon in Israel mite khiah kuli cang ruai lo i. Amahte khiah a raaltawng tu le a hnenum in hmang i. Amahte khiah a raalbawi, a captain, a siphuh leng uktute le siphuh to ai raalkapte in hmang i.
23 A dangte khiah Solomon naper tute khawngtute rongsuang tu in dah i. Cia mite khawngtute khiah zanga le sawmnga um i.
24 Ikhalselai Pharoah fenu khai David Khua in Solomon ai sakhnak innah thawn i. Ciafangin Solomon in Millo khiah sa i.
25 Solomon in kum khat ah mei thawn taihnak a hlu le remhnak a hlu khiah Bawipa ca ai a sahnak awlta vumah vel thum hlu de ai, Bawipa hmai ai awlta vumah rimhmui kawm in tai de i. Ciatih bangin Solomon in temple khiah sa ben i.
26 Kumpibawipa Solomon in Ezion Keber ah timbaw tamngai sa i. Ezion Keber khiah Edom ramai Tipui San varkamah um ai Elath hiang ah i. 27 Ciafangin Hiram in Solomon hnenumte kawmin timbaw vumah naper khat tuhin tipui lam lingtu a hnenum te khiah kuat i. 28 Anite khai Ophir ah feh ai, ciata ah sui talan zali le kul tawk ai Kumpibawipa Solomon hnenah kawih i.