1 David thi nia tuh khiah nong fangin, David in a fapa Solomon khiah, 2 “Laivum dan bangin i thi tuh i hang. Ciamanin pasalpui bangin nung tu. 3 Bawipa na Pathian thu pehnak khiah hlun tu. Moses Upadi Dan songah nganhnak bangin, Bawipa lampui ah feh tu. A dan upadite le a thukhamte le a thukhan hnakte le a tettikhan hnakte khiah hlun tu. Ciafangin na bawnhnak caang le na feh hmun caang ah na khaang tuh i. 4 Cen Bawipa in i thu khiah, ‘Na fapate in amah nundan khiah sik in, amahte in i hmai ah a hmanniu in amahte thinlung veksen le rauhla veksen thawn vak lekhaw, Israel kumpibawi cang tuhin fa na tong tuh lo i.’ ti ai relhnak a thu khiah khim tuh i. 5 Ciazolo ah Zeruiah fapa Joab in kaimah hnenah le Israel raalbawite panih, Ner fapa Abner le Jether fapa Amasa te rekhnak khiah ling i si. Amah in raal hmunah thiluang ruai tuhhnak khiah raalrem hmunah thiluang ruai ai, raaltawng hmunai thi khiah a el ai elpen ah dahai, a ke ai kedawl vumah dah i. 6 Ciamanin na fimhnak hmang in, amah khiah thinnuam niu in a lu ai puak thawn hlan songah lut ruai ma law. 7 Ikhalselai Kilead mi Barzillai fapate khiah ngaihhar tulai amahte khiah na cabuai ai rongei tute lakah tel tu seh. Ziangmanti fangin na nau Absalom hnenin i tlan fangin amahte in ciatih bangin i hnenah kawi i. 8 Cen Mahanaim ah i feh nia ah, a tluk lo in awrsia i camtu Bahurim ai Benjamin mi Kera fapa Shimei khiah nai i si. Ikhalselai amah in Jordan run ah i caang manin, Bawipa hming in, ‘Vangsau thawn na rek tuh lo ing.’ti in thukham ing. 9 Ciamanin amah khiah mawh nai lo in ruat mah. Ziangmanti fangin nangmah khiah mifim na i manin, amah vumah zai bawn tuh khiah ling i si. Ikhalselai a puakpar khiah hlan songah thi thawn lut ruai tu.” ti in tiam i.
10 Ciamanin David khai thi ai David Khuapui songah vui i. 11 David in Israel ramah kum sawmli uk i. Kum sarih khiah Hebron in uk ai Jerusalem ah kum sawmthum le kum thum uk i. 12 Ciafangin in Solomon khai a paa David tauhkheng vumah kupibawi cang ai, a kumpibawi ukhnak khiah kho ngai i.
13 Ciafangin Hakkith fapa Adonijah khai Solomon nuu Bathsheba hnenah kawi i. Bathsheba in, “A remniu ai kawi i sim?” ti in zawt i. Amah in, “Ing, a remniu in kawi ing.” ti in sawn i. 14 Ciahlai ah amah in, “Thu na rel tuh nai ing.” ti in ti i. Bathsheba in, “I rel tu.” ti in sawn i. 15 Ciafangin amah in, “Kumpibawi ukhnak ram khiah kaimah ai i ti khiah ling i si. Cen Israel mi veksenin kaimah in uk tuhin i umm liang i. Ikhalselai, kumpibawi ukhnak khiah thleng ai i nau ai cang i. Ziangmanti fangin Bawipa in amah khiah pehnak i. 16 Ninghiohnak pakhat na ngen tuh ing. I el ma law.” ti in ti i. Ciafangin Bathsheba in, “I rel tu.” ti in ruai i. 17 Ciafangin amah in, “Kumpibawipa Solomon in Shunam mi Abishak khiah i nu tuhin i pe tuhin i rel sah tu. Ziangmanti fangin amah in na el tuh lo i.”ti in sawn i. 18 Ciamanin Bathsheba in, “I. Kumpibawipa hnenah na rel sah tuh ing.” ti in ti i.
19 Ciamanin Bathsheba khai Kumpibawipa Solomon hnenah Adonijah ca in thu rel tuhin kawi i. Ciafangin in kumpibawipa khai tho ai amah hnenah a lu ut ai, a tauhkheng vumah to ai kumpibawipa nuu ca in tauhkheng pakhat khiah kawih ruai ai, a nuu khai a kiahhan lam ah to i. 20 Ciafangin amah in, “Thu a cikniu na ngen i nuam i. I el malaw.” ti in ti i. Kumpibawipa in, “Ngen tu, i nuu. Ziangmanti fangin na el tuh lo ing.” ti in ti i. 21 Ciamanin amah in, “Shunam mi Abishak khiah Adonijah nu tuhin pe nga sing.” ti in ti i. 22 Ciafangin Solomon in a nuu hnenah, “Zaimanin Shunam mi Abishak khiah Adonijah ca in ngen i si? Kumpibawi ukhnak ram khai amah ca in i ngen hlah sim? Ziangmanti fangin amah khiah i u i. Cen Abiathar phungki pa le Zeruiah fapa Joab ca in khai ngen hlah sim.”ti in ti i. 23 Ciafangin Kumpibawipa Solomon in Bawipa hming in thukham ai, “Adonijah in hetih in rel manin amah khiah thi hlahlekhaw, Pathian in a rauh ngai in i cawh tu seh. 24 Ciamanin, i paa David kumpibawi tauhkheng vumah a kho ngai in i tauh tu le a thukham bangin i inn i bawt tu Bawipa a nung bangin, tunnia ah Adonijah khiah thi kul tuh i.”ti in ti i. 25 Ciamanin kumpibawipa Solomon in Jehoida fapa Benaiah khiah hlat ai Benaiah in Adonijah khiah rek i.
26 Ciafangin kumpibawipa in Abiathar hnenah, “Anathoth ai na lo ah feh tu. Thi na tlak napui i. Ikhalselai tunin tu na rek tuh lailo ing. Ziangmanti fangin i paa David hmai ah Bawipa thingkuang khiah phur ai i paa rimsu tuar caang in rim na su ve i.” ti in ti i. 27 Ciamanin Solomon in Abiathar khiah Bawipa phungki songin suah i. Ciatihin Bawipa in Shiloh ai Eli thu relhnak khim ruai i.
28 Cia thu khiah Joab hnenah hleng i. Joab in Adonijah hlun awng i. Absalom tu hlun lo i. Ciamanin Joab khai Bawipa tabernacle ah dawp ai, awlta ki khiah kuah meng i. 29 Ciafangin Kumpibawi Solomon khiah, “Joab khiah Bawipa awlta ah tlan ai, awlta hiang ah i.” ti in rel i. Ciafangin Solomon in Jehoida fapa Benaiah khiah hlat ai, “Amah khiah rek tu lio.” ti in ruai i. 30 Ciamanin Benaiah khai Bawipa tabernacle kawi ai amah hnenah, “Kumpibawipa in, ‘Sumpua ah suak tu.’na ti i,” ti in rel i. Ikhalselai Joab in, “Suak tuh lo ing. Heta ah thi tuh ing.” ti in ti i. Ciafangin Benaiah in cia thu khiah kumpibawipa hnenah, “Joab in ciatih in rel ai ciatih bangin i sawn i.” ti in rel i. 31 Ciafangin kumpibawipa in amah hnenah, “Amah relhnak bangin bawn tulai, amah khiah rek in vui tu. Ciatih in Joab in mawh nai lote thi luang ruaihnak khiah kaimah le i paa inn in kin lang sah tuh i si. 32 Ciatih in Bawipa in a thi khiah amah lu vumah hleng ruai tuh i. Ziangmanti fangin, amah hnak in dikcang sawn le pha sawn mi panih - Israel raalkapte uktu bawi Ner fapa Abner le Judah raalkapte uktu bawi Amasa khiah - i paa David in ling lo in, Joab in vangsau thawn rek i. 33 Ciamanin amahte thi khiah Joab lu ah le a tesin fate lu ah hleng leh tuh i. Ikhalselai David le a tesin fate vumah le a inn le a ukhnak vumah Bawipa hnenin kumzangza in remhnak um tuh i.”ti in ti i. 34 Ciamanin Jehoida fapa Benaiah khai hong ai Joab khiah tal ai rek le nelrawn songai amah inn ah vui i. 35 Ciafangin kumpibawipa in Jehoida fapa Benaiah khiah Joab ca in raalkapte uktu ah dah ai, kumpibawipa in phungki pa Zadok khiah Abiathar ca in dah i.
36 Ciafangin kumpibawipa in Shimei khiah ko ai amah hnenah, “Jerusalem ah inn sa tulai, ciata ah um tulai, ciata in akonah khai kawi mah. 37 Ziangmanti fangin ciata in suak in Kidron Rawn na kan nia ah, na thi tuh rori khiah ling tu. Na thi khiah nangmah lu vumah i tuh i.”ti in rel i. 38 Ciafangin Shimei in kumpibawipa hnenah, “Na relhnak khiah pha i. I bawipa kumpibawipa ai relhnak bangin na hnenum in bawn tuh ing.”ti in sawn i. Ciamanin Shimei khai Jersalem ah ni tamngai um i.
39 Kum thum fangin, Shimer hnenumte panih khiah Kath kumpibawipa Maakhah fapa Achish hnenah tlan i. Ciamanin Shimei khiah, “Na hnenumte khiah Kath ah i.”ti in rel i. 40 Ciamanin Shimei khai tho ai a lak vumah a kung toh ai a hnenumte sii tuhin Kath ai Achish hnenah feh i. 41 Ciafangin Shimei khiah Jerusalem in suak ai Kath ah feh ai tlung leh i ti in Solomon khiah rel i. 42 Ciamanin kumpibawipa in Shimei khiah kawi ruai ai amah hnenah, “Bawipa hming in thu na kham ruai ai, ‘Jerusalem in suak in khualsi nia ah nangmah khiah na thi tuh rori i.’ti in na relcia i ta lo ing? Ciafangin nangmah in, ‘I zahnak thu khiah pha i.’ti in i sawn i si. 43 Cia ilekhaw zaimanin Bawipa hnenah na thukham le kaimah in na pe hnak thukham khiah hlun lo i si?”ti in ti i. 44 Ciazolo ah kumpibawipa in Shimei hnenah, “I paa David hnenah a pha lo bik na bawnhnak khiah ling i si. Ciamanin a pha lo bik na bawnhnak khiah Bawipa in na lu vumah hleng ruai tuh i. 45 Ikhalselai Kumpibawipa Solomon khiah hmuifu bur tuh ai, David kumpibawi ukhnak khiah Bawipa hmaiah kumzangza in kho tuh i.”ti in ti i. 46 Ciamanin kumpibawipa in Jehoida fapa Benaiah khiah ruai ai ani khai fehin Shimei khiah tal ai ani khai thi i. Ciatih bangin a ukhnak khiah Solomon kut songah a kho in um i.