1 Ciafangin David in a minungte khiah siar ai, mi thawngkhat le mi zakhat vumah uktu bawi dah i. 2 David in a minung khiah hmun thum in khan ai hmunkhat khiah Joab kuthnia ah, hmunkhat khiah Joab nau Zeruiah fapa Abishai kuthnia ah, hmunkhat khiah Kit mi Ittai kuthnia ah dah i. Ciafangin kumpibawipa in amahte hnenah, “Kai khai ning thawnin feh tuh ve ing.”ti in ti i. 3 Ikhalselai mite in, “Feh zel hlah si. Ziangmanti fangin tlan sek inglai, amahte in zai khai kin nam tuh lo i. Kinte a tlamhmat kin thi rinin, zai khai kin nam tuh lo i. Ikhalselai nang tu kinte thawngha tah in na man i. Ciamanin khua songin tha kin pe tu sawn.”ti in sawn i. 4 Ciafangin kumpibawipa in amahte hnenah, “A pha ber ti ai ning ruathnak bangin bawn tuh ing.”ti in ti i. Kumpibawipa khai kawl dawngkham hiang ah ding ai, mite khai a veksen in a za a za le a thawng a thawng in feh i. 5 Kumpibawipa in Joab le Abishai le Ittai khiah, “Kaimah ca in tlangval niu Absalom khiah a nem niu in lo sik tuu-ih.”ti in cah i. Ciatih in Absalom thu khiah raalbawi veksen hnenah rel khiah mi veksen in za i.
6 Ciamanin anite khai Israel mite tawng tuhin feh i. A tawng hmun khiah Efraim ai tu songah i. 7 Ciata ah David hnenumte in Israel mite khiah rek ai cia nia ah mi thawngkul thi i. 8 Ziangmanti fangin cia ram pumpalah ah tawng dun ai tu thing in mite khiah vangsau hnak tam sawn in rek i. 9 Ciafangin Absalom in David hnenumte khiah tawk i. Absalom tu lak pakhat to le cia lak khai thing lianpui thingkak hnia in feh le Absalom lu khiah cia thingkak lakah taang ai van le laipua laklawh ah tar ai a lak khai a hnia in feh teu i. 10 Mi pakhat in cia khiah hmu ai Joab hnenah, “Absalom khiah thingkak vumah tar in mitua niu ah hmu ing.”ti in rel i. 11 Ciamanin Joab in a reltu pa hnenah, “Amah khiah hmu i si. Zaimanin laipua ah rek lo i si? Tangka shekel sawmkhat le elpen na pe tuh napui i ta ing.”ti in ti i. 12 Ikhalselai cia paa in Joab hnenah, “Tangka shekel thawngkhat i kut ah ngah rinin, kumpibawipa fapa khiah i kut in rek tuh lo ing. Ziangmanti fangin kin zak in kumpibawipa in nangmah le Abishai le Ittai khiah, ‘Kaimah ca in Absalom khiah lo o tuu-ih.’ti in ning ti i. 13 Cialo fangin i nunhnak ca ah i lau kul tuh i. Ziangmanti fangin kumpibawipa hmai ah zai khai thup thill lo i. Cen nangmah rori in khai i zuar tuh i si.”ti in ti i. 14 Ciafangin Joab in, “Nangmah ca in he bang khiah iang tuh lo ing.”ti in sawn i. Ciafangin ani khai fei pathum khiah lang ai, Absalom thinlung khiah thingkak ah a taang ai a nung lai pahin khawh i. 15 Ciafangin Joab ral thilthuam phurtu mi sawmkhat in Absalom khiah kulh ai rek i.
16 Ciale Joab in thirhlung tum ai mite khai Israel te khiah hnawh awl i. Ziangmaninti fangin Joab in amahte khiah com ruai i. 17 Amahte in Absalom khiah lang in tu songai kua lian ngai songah lon ai lungto khiah a vumah a lian ngai in pum i. Ciafangin Israel mite khai amahte inn ten ah tlung sio i. 18 Absalom in a nung lai in Kumpibawi Rawn zawllai ah amah ca in khan bawn awng i. Ziangmanti fangin amah in, “I hming hih tu tuhin fapa nai lo ing.”ti in ti i. Cia khan khiah amah hming in ko i. Tunnia tian in cia khan khiah Absalom Khan ti in ko i.
19 Ciafangin Zadok fapa Ahimaaz in, “Bawipa in a raalte khiah phuzul sah zo i ti in kumpibawipa khiah rel tuhin dawp ngang.”ti in ti i. 20 Joab in amah hnenah, “Tunnia ah thuthang kawih tuh lo i si. Ni dang ah thuthang kawih leh nga si. Ikhalselai tunnia ah thuthang kawih tuh lo i si. Ziangmanti fangin kumpibawipa fapa thi te i.”ti in ti i. 21 Ciafangin Joab in Kush mi hnenah, “Feh in na hmuhnak khiah kumpibawpa rel tu.”ti in ti i. Ciamanin Kush pa khai Joab hmai ah a lu ut ai dawp i. 22 Ciafangin Zadok fapa Ahimaaz in Joab hnenah, “Zai cang ta in khai, Kush pa hnua in dawp ve ngang.”ti in ngen leh thio i. Ciafangin Joab in, “Fapa, zaimanin dawp na nuam i? Thuthang rel tuh nai lo i si.”ti in ti i. 23 Ciafangin amah in, “Zai cang ta in khai, dawp ngang.”ti in ti i. Ciamanin Joab in amah hnenah,”Dawp tu.”ti in ruai i. Ciamanin Ahimaaz khai zawllai hmun lamin dawp ai Kush pa khiah khel lio i.
24 Ciafangin David khai kawl dawngkham kua lakah to i. Santari kiltu pa pakhat khai dawngkham vumah kai ai mi pakhat amah lek in dawp khiah hmu i. 25 Cia pa in kumpibawipa rel i. Kumpibawipa in, “Amah lek i lekhaw, a ka songah thuthang nai i.”ti in ti i. Cia pa khai a rang ngai in dawp ai a nong ah hleng i. 26 Ciafangin santari kiltu pa in a dang pakhat dawp khiah hmu ai, dawngkham kiltu pa khiah ko ai, “A dang pakhat paa khai amah lek in dawp i.”ti in rel i. Kumpibawipa in, “Cia pa in khai thuthang kawih ve i.”ti in ti i. 27 Ciamanin santari pa in, “A hmasa sawn dawp tu pa dawp dan khiah Zadok fapa dawp dan bang i.”ti in ti i. Ciafangin kumpibawipa in, “Amah khiah mi pha i. Thuthang pha kawih i.”ti in ti i. 28 Ahimaaz in kumpibawipa khiah ko ai, “Zai hmuahhmuah pha liang i.”ti in au i. Ciafangin ani khai kumpibawipa hmai ah ut ai, “I bawipa kumpibawipa raalte na ap tu na Bawipa Pathian khiah hmuifu tu seh.”ti in ti i. 29 Kumpibawipa in, “Tlangval niu Absalom khiah him awm?”ti in zawt i. Ahimaaz in, “Joab in kumpibawipa hnenum le na hnenum kaimah khiah kin hlat fangin, mi cai murhmo hmu ing. Inapui zai pah i ti ling lo ing.”ti in sawn i. 30 Kumpibawipa in, “Thawn tulai khiata ah ding tu.”ti in ruai i. Ciamanin ani khai thawn ai ding meng i. 31 Ciasawng fangin, Kush pa khai hleng ai Kush pa in, “I bawipa kumpibawipa, thuthang pha um i. Ziangmanti fangin Bawipa in na tawng tu hmuahhmuah khiah phu na zul sah i.”ti in rel i. 32 Ciafangin kumpibawipa in, “Tlangval niu Absalom khiah him awm?”ti in zawt i. Cush pa in, “I bawipa kumpibawi raalte le a tawng tu hmuah khiah a veksenin khiah tlangval niu bangin cang tu seh.”ti in sawn i.
33 Ciafangin kumpibawipa khai thinhnawm rauh ai dawngkham vumai khan songah kawi ah ciata ah kap i. Ciatih ai a feh kongin, “Aw i fapa Absalom-i fapa, i fapa Absalom-na ca in i thi ta sawn selai! Aw Absalom i fapa, i fapa!”ti in kap i.