1 Ciafangin Zeruiah fapa Joab in David in Absalom ngaai khiah hmu i. 2 Ciamanin Joab in Tekoa ai mifim nupui pakhat khiah ko ai, amah hnenah, “Ninghio in mithi kahtu bangin paal khel tu. Mithi kahhnak thilthuam sil tulai thau khai pawh mah. Ikhalselai a rai ngai mithi kah tu nupui bangin tuah tu. 3 Ciafangin kumpibawipa hnenah kawi tulai hetih bangin pong tu.”ti in ruai i. Ciamanin Joab in a pong tuhhnak pon khiah rel i.
4 Cia Tekoa ai nupui nuu khai kumpibawipa hnenah pong fangin, a hmai ah bok ai amah khiah bia ben fangin, “I bawm tu, Aw kumpibawipa.” ti in ti i. 5 Ciafangin kumpibawipa in a hnenah, "Zaimanin thin na cawl i?” ti in zawt i. Cia nuu in, “Kaimah khiah hmaitong peupeu ing. I pa khiah thi zo i. 6 Na hnenum nuu in fapa panih nai ing. Anite khai lo ah tawng kawm le a phal tu tuh aisu khai lo um lo i. Ciamanin a khatta in a khatta khiah seu ai rek i. 7 Ciafangin kin inn songkhat veksenin i lakah raw ai, “A nau rek tu pa khiah a rekhnak a nau pa ca in rek tuhin kin pe tu. Roco tu tuh pa khai rek tuh i ing.”ti in i ti i. Ciatih in amahte in i lungto maihol khiah dit ruai tum ai laivum ah i pa hming phur tu tuh le hih tu tuh taang tuh lo i.”ti in rel i. 8 Ciafangin kumpibawipa in cia nuu hnenah, “Na inn ah tlung tulai, nangmah ca in order suah tuh ing.”ti in ti i. 9 Ikhalselai Tekoa ai nupui nuu in kumpibawipa hnenah, “I bawipa, Aw kumpibawipa, he mawhhnak khiah kaimah le i paa innkua vumah i tu seh. Kumpibawipa le a ukhnak khiah mawh ma seh.”ti in ti i. 10 Ciafangin kumpibawipa in, “Aisu in hnai na hnok lekhaw i hnenah kawih tulai, na tok tuh nawn lo i hang.”ti in ti i. 11 Ciafang cia nuu in, “Phuzul tute in i fapa khiah rek lohnak tuhin ninghio in kumpibawipa in Bawipa na Pathian hnenah ngen tu.”ti in ti i. Amah in, “Bawipa nung song hmuah in, na fapa sam fangkhat bang khai laipua ah tlok tuh lo i.”ti in rel i. 12 Ciafangin nupui nuu in, “Ninghio in na hnenum nuu in i bawipa kumpibawipa hnenah pon kam khat pong rih ngang.”ti in ngen i. Amah in, “pong tu.”ti in sawn i. 13 Ciafangin nupui nuu in, “Ilekhaw zaimanin Pathian minungte hnenah he bang bawn i pa si? Kumpibawipa in ciatih in rel fang tu, amah veve mawhhluk cang lo im? Ziangmanti fangin kumpibawipa in a hnawthnak a fapa khiah ko lai lo i. 14 Ziangmanti fangin laipua ah buahnak ti khiah khawm leh thill lo bangin, kin te khai kin thi kul ve i. Cen Pathian in aisu khai hmaisonhnak nai lo i. Ikhalselai a hnawthnak a fapa khiah kumkhua in engsan dunin um lohnak tuhin remhnak lampui bawn i. 15 Tunin hetih bangin i bawipa kumpibawipa hnenah i ponghnak heh mite in i lau ruai manin pong ing. Na hnenum in, ‘Kumpibawipa rel tuh ing. A hnenum ai relhnak bang in bawn thai pang i. 16 Pathian in kin pehnak kin ro songin kin phiat tumtu pa kut songin, kumpibawipa in a hnenum khiah o thai pang i.’ti in ruat ing. 17 Ciamanin na hnenum in, ‘I bawipa kumpibawi relhnak thu in thin i nuam ruai tu seh. Ziangmanti fangin i bawipa kumpibawipa khiah Pathian vancung mi bang in a pha le a sia khiah ling i. Bawipa na Pathian khiah nangmah thawn lo um tu seh.’ti in ruat ing.”ti in rel i. 18 Ciafangin kumpibawipa in cia nuu hnenah, “Thu na zawt tuh ing. I hnenin thup tuh lo in na ngen ing.”ti in ti i. Ciafangin cia nuu in, “I bawipa kumpibawipa in pong tu hang seh.”ti in sawn i. 19 Ciafangin kumpibawipa in, “Hete veksen lakah Joab kut khiah nangmah thawn um i lo im?”ti in zawt i. Cia nuu in, “I bawipa kumpibawi nung bangin, aisu in khai i bawipa kumpibawipa relhnak songin kiahhan lam le kekeh lamah feh thill lo i. Na hnenum Joab in hete khiah i bawn ruai ai na hnenum nuu hnenah amah in he thute khiah i kaa ah i dah sah i. 20 Na hnenum Joab in hete khiah bawn i. I bawipa khiah Pathian vancung mi fimhnak bangin fim ai a ram ai thu khiah a veksenin ling sio i.”ti in ti i.
21 Ciafangin kumpibawipa in Joab hnenah, “He khiah bawn tuh ing. Feh tulai tlangval niu Absalom khiah kawih tu.”ti in ruai i. 22 Joab khai laipua ah bok ai kumpibawipa khiah an i. Joab in, “Kumpibawipa in na hnenum ngenhnak khiah pe manin, tunnia ah i bawipa, Aw kumpibawipa in i lakah lungkhim i ti khiah ling ing.”ti in ti i. 23 Ciamanin Joab khai tho ai Keshur ah feh ai Absalom khiah Jerusalem ah kawih i. 24 Ciafangin kumpibawipa in, “A inn ah tlung tu selai i hmai khiah hmu ruai mah ih.”ti in ti i. Ciamanin Absalom khai a inn ah tlung ai kumpibawipa hmai khiah hmu lo i.
25 Israel ram hmuahhmuah ah Absalom bangin a mawi ai an tuh aisu khai um lo i. A ke ruh ai panin a lu tian a pha lo pakhat bang khai um lo i. 26 A lu met fangin (zaimanti fangin kum siar in kum bo fangin a lu met de i. A sam khiah rit ze manin met de i.) a lu ai a sam khiah kumpibawi shekhel in shekel zanih rit i. 27 Absalom in fapa pathum le Tamar tihnak fenu pakhat nai i. Tamar khiah nupang mawi ngai i.
28 Absalom khai Jerusalem ah kum nih song um ai, kumpibawipa hmai khiah hmu lo i. 29 Ciamanin Joab in kumpibawipa hnenah kuat tuhin Joab khiah a hnenah kawi ruai i. Ikhalselai Joab in kawi nuam lo i. A vel nih hnak ko fangin khai kawi nuam cuang lo i. 30 Ciamanin Absalom in a hnenumte hnenah, “Joab lo khiah i lo hiang ah i. Cen a lo ah kawlkawn um i. Feh tu i lai, tai tuu-ih.”ti in ruai i. Ciamanin Absalom hnenumte in Joab lo khiah mei thawn tai sah i. 31 Ciafangin Joab khai tho ai Absalom inn ah kawi ai amah hnenah, “Zaimanin na hnenumte in i lo i tai sah i?”ti in zawt i. 32 Ciafangin Absalom in Joab khiah, “Heta ah kawi tu lai kumpibawipa hnenah, ‘Zaimanin Keshur in tlung ing? Ciata um ta hlen inglai pha sawn napui i. Ciamanin tunin kumpibawipa hmai hmu i nuam i. I sualhnak um lekhaw amah in i rek tu seh.’ti in kumpibawipa rel tuhin na ko ing.”ti in rel i. 33 Ciamanin Joab khai kumpibawipa hnenah kawi ai rel i. Absalom khiah ko fangin Absalom khai kumpibawipa hnenah kawi ai ani khai kumpibawipa hmai ah lailakah bok ai kumpibawipa in thut i.