1 Ciafangin Zakuk khai feh leh thio ai nisuak hmunlam ai umtu mite ramah hleng i. 2 Ciata hampalak ah namkum pakhat hmu ai a hiang ah tuurual rual thum a bual in um i. Ziangmanti fangin cia tu te in namkum ai ti ding i. Namkum kua ai lungto khiah a lian ngai i. 3 Turual hmuahhmuah ciata ah hmunkhat in khawm ben fangin tuukhalte in namkum kua ai lungto khiah tul ai tuu te ti tul i. Ciaben fangin cia lungto khiah namkum kua ah tul leh de i.
4 Ciafangin Zakuk in tuukhalte hnenah, “I rualte, a konin i si?” ti in zawt i. Amahte in, “Haran in i ing.” ti in sawn i. 5 Ciafangin Zakuk in, “Nahor tu Laban tihnak pa ling aw i sim?” ti in zawt i. Amahte in, “Ling bang ing.” ti in sawn i. 6 Ciafang in Zakuk in, “Cak aw lai im?” ti in zawt i. Amahte in, “Cak bang. Tunin heta ah a fenu Rachel khai a tuute kawmin kawi bang.” ti in ti i. 7 Ciafang Zakuk in, “Sik tuu-ih. Ni a sang pui i lai. Tuurual te inn tlun cu lai lo i. Tuute ti tul tu i lai hampa ei ruai rih tuu-ih.” ti in rel i. 8 Ciafangin amahte in, “Tuurual a veksenin hmunkhat in khawm ben ai namkum kua ai lungto khiah tul hlanlo tul thill lo i ing. Ciaben fang ian in tuu te ti tul thill i ing.” ti in sawn i.
9 Ciatih ai a pong lakin Rachel khai a paa tuu kawmin hleng i. Rachel khai tuukhaltu i ve i. 10 Zakuk in a nuu nau Laban ai fenu Rachel le Laban tuute khiah hmu fangin namkum kua ai lungto khiah tul teu ai a pu tuute khiah ti tul i. 11 Ciafangin Zakuk in Rachel khiah thut ai a cawm ngai in kap i. 12 Ciafangin Zakuk in amah khiah Rachel paa unau le Rebekah fapa i ti in rel i. Ciamanin Rachel khai dawp ai a paa khiah rel i.
13 Laban in a farnu fapa Zakuk thu za fangin ani khai Zakuk tawk tuhin a rang ngai in feh i. Zakuk khiah huam ai thut le a inn ah tlun ai ciata ah Zakuk in thu a veksen in rel i. 14 Ciafangin Laban in, “Nangmah heh i thi le i sa ngaingai i si.” ti in ti i. Zakuk khiah Laban hnenah hla khat um i.
Zakuk in Leah le Rachel nu i
15 Ciafangin Laban in Zakuk hnenah, “I unau na i manin a lovang in na i per sah tuh i sim.? Zaizah na tham ngang, i rel tu?”ti in zawt i. 16 Laban in fenu panih nai ai a upa sawn hming khiah Leah i ai a nauta sawn hming tu Rachel i. 17 Leah mit khiah a malria i. Ikhalselai Rachel tu a ruang pum khai mawi ngai i. 18 Zakuk in Rachel tlak manin Laban hnenah, “Na fenu nauta sawn Rachel ca in kum sarih na naper sah ngang.” ti in ti i. 19 Ciafangin Laban in, “Rachel heh mi dangin nu tahin nang ai nu tuh khiah pha sawn i. Ciamanin i hnenah um tu.” ti in ti i. 20 Ciamanin Zakuk in Rachel nu tuhin kum sarih Laban hnen ah naper i. Ikhalselai Zakuk in Rachel it manin cia kum sarih khiah ni tlawmniu bangin nam i.
21 Ciafangin Zakuk in Laban hnenah, “I nu i pe tu hang. I cu khim zo i hang. Amah thawn itkhat i nuam i.” ti in ti i. 22 Ciamanin Laban in ciata ai mi hmuahhmuah khiah ko ai puai bawn i. 23 Ikhalselai zan khuathim fangin a fenu Leah khiah kawih ai Zakuk pe i. Ciafangin Zakuk khai Leah thawn itkhat i. 24 Cen a fenu Leah hnenum tuhin Laban in a hnenum nupang Zilpah khai pe i. 25 A thangha zing khuavar fangin, Leah lo i lio i. Ciamanin Zakuk in Laban hnenah, “Hetih bang ai i hnenah na bawnhnak khiah akontih i pa? Rachel ca in na naper sah i ta lo ing? Zaimanin i zawl i si?” ti in zawt i. 26 Ciafangin Laban in, “Fenu nauta sawn khiah a u hlanah kin dan ah hoidun hmasa dan lo i. 27 He i fenu thawn a dan bangin zarh khat um kawm tu i lai cia fangin a nau khai na pe ngangkhaw amah ca in kum sarih na i per sah tu,” ti in rel i. 28 Zakuk khai ciatih bangin bawn ai Leah thawn zarh khat um kawm le ciafangin Laban in Rachel khiah Zakuk in nu tuh in pe i. 29 Cen Laban in a hnenum nupang Bilhah khiah Rachel hnenum tuhin Rachel pe i. 30 Zakuk khai Rachel thawn it kawm ai Rachel khiah Leah hnak in it sawn i. Zakuk in Laban khiah kum sarih na per sah leh thio i.
Zakuk fate pawl
31 Zakuk in Leah khiah it lo i ti khiah Bawipa in hmu fangin Leah sul khiah hong sah i. Rachel tu fatong in um i. 32 Ciafangin Leah khai naupai ai pasal niu in te le a hming khiah Reuben ti in a hming sa i. Ziangmanti fangin Leah in, “Bawipa in i harsahnak khiah i hmu sah i. Tun ngawn i pa in i it tuh hlaihlawr i hang.” ti in ti i. 33 Leah khai naupai leh thio ai a nau te fangin, “Kaimah khiah i it lo i ti khiah BAWIPA in za manin he nau niu i pe i.” ti in ti ai ciamanin cia nau hming khiah Simeon ti in ko i. 34 Ani khai naupai leh thio ai pasal niu in te fangin, “I pa khiah fapa pathum cawi man hang in tun ngawn i hnenah um tuh i hang.” ti in ti ai ciamanin nau hming khiah Levi ti in sa i. 35 Fapai leh thio le a fapa te fangin, “Tun ngawn Bawipa cuan tuh ing.” ti in ti ai a hming khiah Judah ti in ko i. Ciafangin fapai awl i.