1 Ciamanin Aizek in Zakuk khiah ko ai hmuifu bur ben fangin, “Khanaan mite nu mah. 2 Paddan Aram ai na pu Bethuel inn ah feh tulai na nuu hmingpa Laban fenute nu tu. 3 A Sangber Pathian in hmuifu na bur tu selai mi tampui na cang hlanlo na zaai ruai in na khaang ruai tu seh. 4 Cen Pathian in Abraham pehnak tunai mikhual bang ai na umhmun ram khiah co tuhin Pathian in Abraham hmuifu pehnak khiah nangmah le na tesin fate lo na pe tuh seh.” ti in thukham pe i. 5 Ciafangin Zakuk khai Aramean mi Bethuel fapa Laban umhmun Paddan Aram ah feh i. Laban khiah Zakuk le Esau te nuu Rebekah hmingpa i.
6 Aizek in Zakuk khiah hmuifu pe ai Paddan Aram ah nu sii tuhin hlat ai a hmuifu bur fangin, “Khanaan mite nu ma law. ”ti in thu pe ai 7 Zakuk in a nuu le a paa thu ngai ai Paddan Aram ah feh khiah Esau in ling i. 8 Ciafangin zaitluk in a nu Khanaan mite lakah a paa Aizek lungkhim lo bik khiah hmu fangin 9 Esau khai Ishmael hnenah kawi ai Abraham fapa Ishmael fenu le Nebaioth farnu Mahalath khiah a nu panih hlai in nu i.
Zakuk mang manhnak
10 Zakuk khai Beersheba in suak ai Haran lamah feh i. 11 Hmunkhat hleng fangin nitla lio manin zancam tuhin com i. Lungto pakhat khiah lang ai a lukhum in hmang ai ani khai mitmu i. 12 Ciafangin Zakuk in mang man ai kaipum pakhat khiah laivum in vancung tian ban ai Pathian vancung mite khiah cia kaipum ah tolh le hong lianglo in hmu i. 13 Cia kaipum vumah BAWIPA khiah ding ai, “Kaimah khiah na paa Abraham Pathian le Aizek Pathian BAWIPA ing. Na ithmun he laipua khiah nangmah le na tesin fate pe tuh ing. 14 Na tesin fate khiah laivut bang i tuh ai nitla hmunlam nisuak hmunlam le saklam le hlanglam a kon zong khuaha ah ning zaai tuh i. Laivum ai mi hmuahhmuah khiah nangmah le na tesin fa songin hmuifu ngah tuh i. 15 Nangmah thawn umkhat tuh ing. Na feh hmun cang ah na kilkhawl tuh ing. He ramah na kawih leh tuh ing. Na hnenah i thukhamhnak bangin i bawn ben hlanlo na hlum tuh lo ing.”ti in rel i. 16 Zakuk khai phawk fangin, “A ngaingai in BAWIPA khiah heta ah lo um napui ai lo ling nawn lo ing.”ti in ruat i. 17 Ani khai daam ai, “Zaitluk in he hmun heh daam kul i! He heh Pathian inn rori i. He heh vancung kawl dawng i.” ti in ti i.
18 A thangha zingniu fangin Zakuk khai a lukhum ai hmanghnak lungto khiah lang ai khan in bawn le lungto vumah sathau burh i. 19 Cia hmun khiah Bethel ti in ko i. Cia khua khiah Luz ti in ko awng de napui i. 20 Ciafangin Zakuk in thukham ai, “Pathian khiah kaimah thawn um in i khualsi hmunah i kilkhawl in ei tuh rong le sil tuh thilthuam i pe in 21 i paa inn ah a him niu in hleng leh lengkhaw, BAWIPA khiah i Pathian i tuh ai, 22 he khan ai i tunghnak lungto khai Pathian inn cang tuh le i pehnak zaizongza hmunha khan hmunkhat pe tuh ing.” ti in thu kam i.