Zakuk in Aizek hmuifu co i
1 Aizek khiah tar ai mitvai khuahmu nawn lo fangin, a fa upa sawn Esau khiah ko ai, “I fapa.” ti in ti i. Essau in, “Heta ah ing.”ti in sawn i. 2 Aizek in, “I tar te i hang. Cen zaikom in i thi tuh khai ling lo ing. 3 Ciaman tunin na sazulhnak kapuk le conkiang khiah lang tulai sazul tuhin hampalak ah feh tu. 4 Cen i duhhnak bang rong thip ngai i suan tu lai ei tuhin i kawih sah tulai i thi hlanah hmuifu na pe ngang.” ti in rel i.
5 Ciatih in Aizek in a fapa Esau thurelhnak khiah Rebekah in za i. Esau khai hampalak ah sazul in tlun leh tuhin feh fangin, 6 Rebekah in a fapa Zakuk hnenah, “I ngai tu. Na pa in na u Esau hnenah, 7 ‘Sa zul tulai ei tuhin rong thip ngai i suan tulai i thi hlanah Bawipa hmaiah i hmuifu na bur ngang.’ti in rel za ing. 8 Ciamanin, fapa, i thurelhnak khiah a kungniu in ngai tulai i ruaihnak khiah bawn tu. 9 Merual lakah feh tulai me a sen niu panih i kawih sah tulai na paa duhhnak bangin a thip ngai in rong suan ngang. 10 Ciaben fangin cia rong khiah na paa hnenah kawih tulai, a thi hlanah a hmuifu na bur tu seh.” ti in rel i. 11 Ciafangin Zakuk in a nuu Rebekah hnenah, “I u Esau tu hmul nai bial i khaw, kai tu hmul nai lo in i taksa khiah mam i. 12 I paa in i dai pang selai a zawl i cang tuhai i paa hmuifu co tatum in awrsia camhnak sawn ngah tuh lo ing im?”ti in sawn i. 13 Ciafangin a nuu in, “I fapa, awrsia camhnak khiah i vumah hleng tu seh. I ruaihnak bangin bawn tu. Feh tulai cia me te khiah i hnenah kawih tu.” ti in sawn i. 14 Ciamanin Zakuk khai feh ai cia me te khiah a nuu hnenah kawih le a nuu in a paa duhhnak bangin rong thip ngai suang i. 15 Ciafangin Rebekah in a fa upa sawn Esau ai a phaber thilthuam khiah inn songin lang le a fapa nauta sawn Zakuk silh i. 16 Cen Zakuk kut le a mam hmun a hawng khiah mehmul thawn khuk i. 17 Ciafangin a suanghnak rong thip ngai le sangper khiah Zakuk pe i.
18 Zakuk khai a paa hnenah feh ai, “I paa.”ti in ko i. A paa in, “I fapa, aisu i si?”ti in awi i. 19 Zakuk in a paa khiah, “Na fapa upa sawn Esau ing. Na ruaihnak bangin bawn zo ing. Tho tulai i zuul hnak sa ei tulai na hmuifu i pe tu.” ti in sawn i. 20 Ciafangin Aizek in, “I fapa, a kontih ai tawk man vut i si?” ti in zawt i. Zakuk in, “BAWIPA na Pathian in i pe lio i.” ti in sawn i. 21 Ciafangin Aizek in Zakuk hnenah, “I fapa Esau i le i lo ling tuhin i nong ah kawi tulai na daai ngang.”ti in ruai i. 22 Zakuk khai a paa Aizek nong ah kawi ai a paa in daai ai, “A aw tu Zakuk aw i khaw, cen na kutte tu Esau kut i khaw.”ti in ti i. 23 Aizek in Zakuk i ti ling lo i. Ziangmanti fangin a kutte khiah a u Esau kut bangin a hmul nai i. Ciamanin a paa in hmuifu pe i. 24 A paa in, “I fapa Esau peupeu i sim?” ti in zawt ai, “A peu ing.”ti in Zakuk in sawn i. 25 Ciafangin Aizek in, “I fapa, na zulhnak sa khiah ei tuhin i kawih sah tulai hmuifu na pe ngang.”ti in ruai i. Ciafangin Zakuk in kawih ai Aizek in ei i. Capittizu khai kawih ai ding i. 26 Ciafangin a paa Aizek in, “I fapa kawi in i thut tu.” ti in ruai i. 27 Ciamanin Zakuk in a paa khiah thut i. Aizek in a thilthuam khiah hnim ai amah khiah hmuifu pe ai,
28 Pathian in van ai naidawh le laivum rong le capittizu khiah a tam rauh in lo na pe tu seh.
29 Mi phun hmuahhmuah khiah na ceng lo cang tu seh.
30 Aizek in Zakuk hmuifu bur ben sawng le Zakuk khai a paa hnenin tlan sawng fangin a u Esau khai a sazul benin hleng i. 31 Ani khai rong thip ngai khiah suang ai a paa hnenah kawih sah i. Ciafangin a paa hnenah, “I paa, tho tulai i zuul hnak sa i ei sah tulai na hmuifu i pe tu.” ti in ruai i. 32 Ciafangin a paa Zakuk in, “Aisu i si?”ti in zawt i. Esau in, “Na fapa upa sawn Esau ing.” ti in sawn i. 33 Ciafangin Aizek khai a rauh ngai in a ruang hlin ai, “Ilekhaw a zulhnak sa i kawih sah tu tu aisu i pa? Na hleng hlanah ei sah zo ai hmuifu bur zo ing. Ciamanin amah in hmuifu co tuh i.” ti in ti i. 34 Esau in a paa relhnak za fangin lungsia rauh in kap ai a paa hnenah, “I paa kai khai hmuifu i bur tu ve.” ti in ti i. 35 Ikhalselai Aizek in, “Na nau khiah hrokhrawl niu in kawi ai na hmuifu na lang sah lio i.” ti in sawn i. 36 Ciafangin Esau in, “Zakuk ti ai a hmingsahnak heh hman rauh i lo im? Vel nih i zawl zo i. I ro i sutzo ai tunin i hmuifu i lang sah lio i.” ti in ti i. Ciafangin, “I ca in hmuifu dang khawi lai lo i sim?” ti in zawt i. 37 Aizek in, “Amah khiah na bawi cang ruai zo ing. Cen a unau hmuah khai a hnenum cang ruai zo ing. Rong le capittizu thar thawn cawmzo ing. Ciamanin a kontih bangin na bawm thil tuh i hang ing?” ti in Esau khiah rel i. 38 Ciafangin Esau in a paa hnenah, “I paa, hmuifu pakhat lek nai i sim? I paa, kai khai hmuifu i bur tu ve.”ti in ti ai Esau khai a lungsia ngai in kap i.
39 Ciafangin a paa Aizek in,
40 Vangsau thawn nung tuh i si.
Zakuk khai Laban hnenah tlan i
41 A paa in Zakuk hmuifu pe manin Esau in Zakuk lakah thinraw i. Ciamanin, “I paa thi nia nong ngawn i hang. Ciafangin i nau Zakuk rek tuh lio ing.” ti in Esau in ruat i. 42 A fapa upa sawn Esau ai ponghnak khiah Rebekah rel fangin, Rebekah in a fapa nauta sawn Zakuk ko ai, “Na u Esau in na rek tuhin a thin songin ruat i. 43 Ciamanin, i fapa, i relhnak bangin bawn tu. Tun rori in Haran ai i hmingpa Laban hnenah feh tu teu. 44 Na u thinraw lawm hlanlo Laban hnenah um tu. 45 Na u in na lakah a thinraw lawm fangin na bawnhnak khiah hai fangin tlung tuh in na cah leh ngang. Ziangman ning panih in ni khat songin i hnenin ning pai kawm tuh lio i?” ti in ti i.
46 Ciafangin Rebekah in Aizek hnenah, “He Hit nupangte manin nung zuam lo i hang ing. Zakuk in he ramai nupangte he Hit nupangte bang nu lekhaw i nunhnak khiah a nung man lo i.” ti in ti i.