Aizek te i
1 Bawipa khai amah relhnak bangin Sarah hnenah kawi leh ai a ponghnak bangin Bawipa in Sarah khiah bawt i. 2 Ciamanin Sarah in fapai le Abraham tar hnua fangin Pathian in Abraham hnenah rel bangin, Sarah in fapa niu nai i. 3 Ciafangin Abraham in Sarah song ai tehnak a fapa khiah Aizek ti in ko i. 4 Ciafangin Pathian in thukham pe bangin Abraham in Aizek khiah ni riat fangin a vunpar cem sah i. 5 A fapa Aizek te fangin Abraham khiah kum 100 i. 6 Ciafangin Sarah in, “Pathian in i hni ruai i. Ciamanin a za tu hmuahin i hni pui tuh i.” ti in ti i. 7 Cen Sarah in, “Sarah in a fate hnawitul tuh i, ti in aisu in Abraham khiah rel ta tur? Ziangmanti fangin a tar hnua ah fapa cawi sah ing.” ti in ti i.
Hakar le Ishmael hnawt thu
8 Aizek khai khang ai a nuu in hnawitul awl le cia nia ah Abraham in puai lianpui bawn i. 9 Ciafangin Izip mi Hakar le Abraham fapa in Aizek zauhsuam khiah Sarah in hmu i. 10 Ciamanin Sarah in Abraham hnenah, “He na sal nuu le a fapa khiah hnawt tu teu. Ziangmanti fangin he sal nuu fapa khiah i fapa Aizek thawn roco khat tuh lo i.” ti in ti i. 11 Ciafangin a fapa manin Abraham khai thin pha lo ngai i. 12 Ikhalselai Pathian in Abraham hnen ah, “Na fapa le na sal nu manin thin pha lo in um mah. Sarah ai na rel bangin bawn tu. Ziangmanti fangin Aizek songin na cii khiah suak tuh i. 13 Cen na sal nuu ai fapa khai na cii i manin mi phun pakhat ah cang ruai tuh ing.” ti in rel i. 14 Abraham khai zingtlaniu in tho ai sangper le ti palang khat khiah Hakar pe ai Hakar kodar ah phurh ai Ishmael thawn tlan ruai i. Hakar khai feh ai Beersheba nelrawn lakah vak hnelhno i. 15 Ciafangin palang songai ti khai bo sek manin Hakar in a fapa khiah thinghnuh hnia ah dah i. 16 Ani khai a fapa hmunin feh ai kahpuk thawn kap khop tha hla hmunah to i. Ziangmanti fangin, “I fapa thi hmu i nuam lo i.”ti in ti i. Ciamanin a fapa ralkhat lamah to ai au in kap i. 17 Ciafangin Pathian in cia naupang pa kaphnak za ai vancung in Pathian vancung mi in Hakar khiah ko ai, “Zai na ur i, Hakar? Lau mah. Ziangmanti fangin Pathian in naupang kaphnak zazo i. 18 Tho tulai naupang pa khiah daang tulai na kut in awh tu. Ziangmanti fangin amah khiah mi phun lian ngai pakhat cang ruai tuh ing.” ti in rel i. 19 Ciafangin Pathian in Hakar mit khiah hong sah ai Hakar in tikhur pakhat hmu le ani khai kawi ai a palang songah ti thun ai naupang pa khiah ding tuhin pe i. 20 Pathian in naupang pa khiah kilkhawl manin naupang pa khai nelrawn lakah um ai khang le ani khai kahpuk le conkiang hmang in um i. 21 Paran nelrawn lakah um ai a nuu in Izip ramai nupang nu ruai i.
Abraham le Abimelek thukham dunhnak
22 Ciafangin Abimelek khai a raalkap uktu bawi Phikhol thawn Abraham hnen ah, “Na perhnak hmuahhmuah Pathian in na bawm i. 23 Ciamanin i lakah le i fate lakah le i fate fa lakah a hmanlo in bawn tuh lo in le kaimah in nangmah khiah ngaih na har bangin nang in khai kaimah le he na khuato hmun ram khiah ngaihhar tuh in Pathian hmaiah thu i kham tu.” ti in ruai i. 24 Ciafangin Abraham in, “Thu na kham ing,” ti in ti i.
25 Ciafangin Abraham in Abimelek khiah hau i. Ziangmanti fangin Abimelek hnenumte in Abraham tikhur khiah sut sah lio i. 26 Ciafangin Abimelek in, “He khiah aisu in bawn i ti ling lo ing. I rel khai i rel lo i si. Tunnia tian za khai za lo ing.” ti in sawn i. 27 Ciafangin Abraham in tu le kawlpawte khiah Abimelek pe ai a panih in thukham dun i. 28 Abraham in tu cang pasarih khiah turual songin a tumce in dah ai, 29 Abimelek in Abraham khiah, “He tu cang pasarihte khiah a tumce in zaimanin dah i pa si?” ti in zawt i. 30 Abraham in, “He namkum khiah i cohnak i ti tetti tuhin he tu pasarih khiah i kut songin lang tu.” ti in sawn i. 31 Abraham le Abimelek in thukham dun manin cia hmun khiah Beersheba ti in ko i. 32 Beersheba ah thukham dun ben fangin Abimelek le a raalkap uktu bawi Phikol khai Filistin ramah let leh i. 33 Abraham in Beersheba ah mekeng thing bir ai ciata ah Kumzangza Pathian, Bawipa hming khiah ko i. 34 Filistin te ramah Abraham khai a raipui um i.