Sodom le Kawmawrrah hnawmcanhnak
1 Zanlam fangin vancung mite panih khiah Sodom khua ah hleng i. Lot in hmu fangin amahte khiah caang ai amahte khiah zul in a lu ut i. 2 Amah in, “I bawite, ning hnenum kaimah innah zancam tuhin tlung tuhin ning ngen ing. Cen ning ke khai som in thangha khuahma niu in tho in ning nuamhmun ah feh tuu-ih.” ti in ruai i. Amahte in, “I hlah. Zan khuavaar lentawng ah cam tuh i ing.” ti in sawn i. 3 Lot in amahte khiah a khengkhebel in ruai manin anite khai a inn ah tlung i. Amahte ca in Lot in rongdo ai col tel lo sangreu khai em ai amahte in ei i.
4 Ikhalselai anite khai it man hlanah Sodom khua ai pasal upa le naupang te khiah nuamhmun caangin kawi ai Lot inn khiah a cingkim in kulh ai 5 Lot khiah ko ai, “Na inn ah tun zanah zin na tlung tu mite a konah i? Kin hnenah kawih tu lai amahte thawn sual kin nuam i.”ti in ruai i. 6 Ciafangin Lot khai amahte hnenah dawngkham pua ah suak ai dawng khiah kham ben fangin 7 amahte hnenah, “Rualte, huatsuak ze mah ih, ti in ning ngen ing. 8 Sik tuu-ih. Tunin tlangval thawn itkhat awng lai lo fenu panih nai ing. I fenute khiah ning hnenah kawih ngangkhaw, ning nuam bangin amahte vumah bawn tuu-ih. Ikhalselai he mite hnenah ngawn zaikhai bawn mah ih. Ziangmanti fangin i ben tuhai i innah tlung i.” ti in rel i. 9 Ikhalselai anite in, “Kin pial tu.” ti in ti i. Ciafangin anite in, “He pa heh kin hnenah vai ai tunin kin thukhantu cang nuam i. Amahte hnakin rauh sawnin na bawn tuh i ing.”ti in ti i. Ciatih in amahte in Lot khiah nem ai dawngkham khiah ek dawn i. 10 Ikhalselai vancung mite in amahte kut khiah suah ai Lot khiah inn songah amahte hnenah duk teu ai dawng khai kham i. 11 Cia dawngkham ai mite a cik le a liante khiah amahte in mitvai ruai manin amahte in dawngkham khai tawk thill lo i.
12 Ciafangin Lot hnenah, “Heta ai lo a dang na fenu pate le na fapate le fenu le he khua songai na naihnak veksenin he khua songin tlanpui tu. 13 Ziangmanti fangin he khua khiah hnawmcan tuh berh i ing. Ziangmanti fangin hete sualhnak khiah Bawipa hmai ah a rauhze manin Bawipa in he khua hnawmcan tuhin kin hlat i.” ti in rel i. 14 Ciafangin Lot khai khua songah feh ai a fenu nu tu a fenu pate hnenah kawi ai, “Tho in he khua songin suak tuu-ih. Ziangmanti fangin Bawipa in he khua khiah hnawmcan tuh i.” ti in rel i. Ikhalselai anite in Lot relhnak khiah a lilam vuah tlang i.
15 A thangha fangin vancung mite in Lot hnenah, “A rang in tho tulai heta ai na nu le na fenu panih khiah tlanpui tu. Cialo fangin he khua mite sualhnak in na khuk ngah mawh ngai.” ti in rel i. 16 Lot in hnuakfual in um fangin vancung mite in Lot le a nu le a fenute panihte khiah amahte kut in duk i. Ziangmanti fangin Bawipa in amah te khiah ngaihhar i. Ciamanin amahte in Lot khiah khua pua ah suah i. 17 Amahte khiah khua pua ah tlan ben fangin amah in, “Ning thi lo hnak tuhin tlan tuu-ih. Ning khelleh khai her mah ih. He zawllai hmunah khai um lo in mualtlaang vumah tlan tuu-ih. Cialo fangin ning thi mawh ngai.” ti in ruai i.
18 Ciafangin Lot in amahte hnenah, “Bawipa, ciatih in i ma seh. 19 Na hnenum kaimah khiah ngaih i har zo i si. Na ninghiohnak a lian ngai khiah i hmuh zo ai i nunhnak i o sah zo i si. Mualtlaang ah tlan thill lo ing. Ziangmanti fangin a pha lo in i hnawh tuhai i thi tuh lio i. 20 He khua khiah nong sawn i. Cen cia khua khiah a cik khai cik i. Cia khua ah tlan sawn ngangkhaw i nung tuh i. Cia khua khiah a cikniu i lo im?” ti in sawn i. 21 Amah in Lot hnenah, “He na ngenhnak khai na pe ing: he khua niu khiah hnawmcan tuh lo ing. 22 Ikhalselai a rang in tlan tu. Ziangmanti fangin ciata ah na hleng hlan lo zai khai bawn thill lo ing.” ti in ti i. Ciamanin cia khua khiah Zoar ti in ko i.
23 Lot khai Zoar khua ah lut fangin laivum ah nisuak pan i hang.
24 Ciafangin Bawipa in Sodom le Kawmawrah vumah kat le mei khiah vancung in tlok ruai ai 25 cia khuate khiah laipua le khua songai umtu mi hmuahhmuah le laivum ai pohnak hmuahhmuah kawmin hnawmcan sio i.
26 Ikhalselai Lot nu in Lot hnua in a hnualam khiah her le ci khuam pui ah cang lio i.
27 Abraham khai a thangha zingtlaniu in Bawipa hmai ai a ding hmunah kawi ai 28 Sodom le Kawmawrrah le cia ram zawllai hmunlam khiah sik ai ciata ai meikhu khiah meipual meikhu bangin vanah kai khiah hmu i.
29 Bawipa in cia zawllai hmun lam ai khua te khiah hnawmcan fangin Pathian in Abraham khiah hih ai Lot umhmun khuate khiah hnawmcan fangin Lot khiah cia hmunin luat ruai i.
30 Lot khai Zoar in suak ai mualtlaang vumah a fenu panih thawn feh i. Ziangmanti fangin Zoar ah um ngam lo i. Ciamanin khukua songah a fenu panihte thawn um i. 31 Ciafangin a fenu upa sawn in a fenu naute hnenah, “Kin pa heh tar zo i. Cen laivum danin kin nu tuhin pasal pakhat khai um lo i. 32 Kawi tulai kin pa khiah capittizu ding ruai nga singkhaw kin pa cii pai lohnak tuhin kin pa thawn itkhat nga sing.” ti in sawm i. 33 Ciafangin cia zanah a pa khiah capittizu ding ruai le a fenu upa khai a pa thawn itkhat i. Cen a pa in a fenu it lam le a tho lam khai ling lo i. 34 A thangha fangin a fenu upa sawn in a nau hnenah, “Mizan ah i pa thawn itkhat i ing. Tun zanah khai capittizu ding ruai leh thio nga singkhaw i pa cii pai lohnak tuhin nang khai i pa thawn itkhat tu.” ti in rel i. 35 Ciafangin cia zanah a pa khiah capittizu ding ruai leh thio ai a fenu nauta sawn khai tho ai a pa thawn itkhat i. Ikhalselai a pa in a fenu it lam le tho lam khai ling lo i. 36 Ciatih bangin Lot fenute in a pa fa paai kawm i. 37 A fenu upa sawnin fapa nai ai Moab ti in a hming sa i. Tunnia tianin Moab khiah Moab mite pa i. 38 A fenu nauta sawn in khai fapa nai ai Ben-ammi ti in a hming sa i. Amah khiah tunnia tian Ammon te pa i.