Abram in Lot luangsuah i
1 Ciateng in Shinar kumpibawi Amraphel le Ellasar kumpibawi Arioch le Elam kumpibawi Kedorlaomer le Koiim kumpi bawi Tidal te in 2 Sodom kumpibawi Bera le Kawmawrah kumpibawi Birsha le Admah kumpibawi Shinab le Zeboiim kumpibawi Shemeber le Zoar tihnak Bela kumpibawi te khiah tawngdun i. 3 He kumpibawite khiah Pinle tihnak Siddim zawllai hmunah hmunkhat in tang tlaang i. 4 Anite khai kum 12 song Kedorlaomer in uk ai a kum 13 hnak fangin Kedorlaomer khiah tawng i.
5 Kum 14 kumah Kedorlaomer le amah thawn tang tu kumpibawite in Asteroth Karnaim ai Repha te le Ham ai Zuz mite le Shaveh Kiriathaim ai Emi te le 6 Seir mualtlaang ramai Hor te le nelrawn hiang ai El Paran tianin neh sio i. 7 Ciata in anite khai letleh ai Kadesh tihnak En Mishpat ah feh ai Amalek te ram veksen le Hazezon Tamar ai umtu Amor te tianin neh sio i. 8 Ciafangin Sodom kumpibawi le Kawmawrah kumpibawi le Admah kumpibawi le Zeboim kumpibawi le Zoar tihnak Bela kumpibawite khai feh ai Siddim zawllai hmunah 9 Elam kumpibawipa Kedorlaomer le Koiim kumpibawi Tidal le Shinar kumpibawi Amraphel le Ellasar kumpibawi Arioch te kumpibawi pali khiah kumpibawi panga thawn tawngdun i. 10 Siddim zawllai ah saibuan khur lo um bial le Sodom le Kawmawrah kumpibawite khai tlan fangin a hluntute a hrekkhat khiah cia saibuan khur songah tlok ai a tanghnakte khai mualtlaang vumah tlan i. 11 Cia kumpibawi pali te in Sodom le Kawmawrah ai thilri le rong te khiah a veksenin lang sio ai feh i. 12 Cen Abram tu Lot khai Sodom ah um ve manin cia kumpibawite in thiar ve i.
13 Ciasong ai a suak ngah tu mi pakhat um ai cia thu khiah Hebru Abram hnenah than i. Ciateng in Abram khiah amahte thawn tangkhat tu Eshkol le Aner unau Amor mi Mamre ai thing lianpui hiang ah lo um i. 14 Abram in a unau Lot pom lio i ti za fangin a inn saang ai tehnak le zirhciahnak mi 318 kawmin Dan tian hnawh i. 15 Zanlai in Abram khai a minungte khiah khan ai cia kumpibawite khiah tawng le neh sio ai Damaskhas saklam ai Hobah tian amahte khiah hnawh i. 16 Abram in thilri hmuahhmuah le a tu Lot le a naihhnak le nupuite le a dang mite kawmin long ngah sek i. 17 Abram khai Kedorlaomer le amah thawn tangtu kumpibawite neh ai tlung leh fangin Kumpibawi Zawllai tihnak Shaveh zawllai ah Sodom kumpibawipa in caang i.
18 Ciafangin Salem kumpibawi Melkhizedek in sangper le capittizu khiah kawih i. Amah khiah a Sangber Pathian phungki i le 19 Abram khiah hmuifu bur ai,
20 Cen na kut songah na raalte na ap tu a Sangber Pathian khiah hmuifu tu seh.” ti in ti i.
Ciafangin Abram in Melkhizedek khiah zai hmuahhmuah hmunha khan hmunkhat pe i.
21 Sodom kumpibawipa in Abram hnenah, “Minungte khiah i pe tulai thilrite ngawn nangmah in ping tu.” ti in ruai i. 22 Ikhalselai Abram in Sodom kumpibawi khiah, “Van le lai bawntu a Sangber Pathian hnenah i kut tung zo ai 23 na naihhnak kedawlri niu rin lang tuh lo in thukham zo ing. Ciaman in nang in, ‘Abram milian cang ruai ing.’ ti thill tuh lo i si. 24 I minungte ai eihnak le kaimah thawn feh tu Aner le Eshkol le Mamre te vo siar lo zaikhai na saang tuh lo ing. Ikhalselai hete in amahte vo khiah lang tu seh.” ti in ti i.