Micah 7

<<  MICAH 7  >>

1 Thin rim i su i.
Kaimah khiah khaal ai thing thai khawm tu te bang ing.
Capitti vuandum ai a pha ngaingai
capitti loih tu te bang ing.
I duhhnak capitti thai hmasa a bor te ei tuh um nawn lo i.

2  Laivum ah a rinsantlak mi pai sek i.
Minung lakah mi dikcang um tau lo i.
Amahte in mi rek tuh lek ian in bawh i.
Aisu hmuah in a unau khiah sur thawn zul i.

3  Amahte kut panih thawn a pha lo bawn tuhin,
Mi bawite in lehsawng pe ruai i.
Thukhantu te in nawhthuh ngen i.
Mi upate in a pha lo amahte daihhnak khiah ling ruai i.
Ciatih in amahte in sawm tlang i.

4  Amahte lakai a pha ber te khiah maimaw hling bang i.
A dikcang ber te khiah seen ai hling tah in san sawn i.
Ning raalvil tute le ning cawhkuan nia khiah hleng i hang.
Amah te thin tawp in um cuu khim i hang.

5  Na rualpui khiah rinsan mah.
Na kompui khai sang mah.
Na kaang song ah na hngai tu nuu
hnenah ralring in pong tu.

6  Ziangmanti fangin a fapa in a paa khiah zul lo i.
A fenu in a nuu khiah tawng i.
Monu in monuu khiah tawng i.
Mi pakhat ai raal khiah a innkua song ai mite i.

7  Ciamanin BAWIPA khiah rinsan tuh ing.
I o tu i Pathian khiah iang tuh ing.
I Pathian in i za tuh i.

8  I raalte, i im mah ih.
I bah fangin, tho leh tuh ing.
Khuathim songah i to fangin,
BAWIPA khiah i khuavar cang tuh i.

9  BAWIPA in i thu khiah a hman in i khan sah hlan lo,
Kaimah in amah lakah sual manin,
BAWIPA thinrawhnak khiah tuar tuh ing.

10 Ciafangin i raalnu in hmu tuh ai
I hnenah, “BAWIPA na Pathian khiah
a konah i?” ti ai i zawt tu nuu khiah zakthi tuh i.
Amah khiah i mit in hmu tuh ing.
Amah khiah lam lakai nawng bang in tlawh tuh i.

11 Ning khua renhnak seen sa nia le
ning ramri kau ruai nia khiah hleng tuh i lai.

12 Cia nia ah Assiria le Izip khua in le
Izip ram in Zufratis run tian,
Tipui khat lam in tipui khat lam tian,
Mual pakhat in mual pakhat tian,
ciata ai mite khiah na hnenah kawi tuh i.

13 Ciafangin laivum ai um tu te le
amahte bawnhnak naper manin,
laivumah zaikhai bek lo in um tuh i.

14 Amahte lek in tuupui songah le
Hampa um bial hmunah um tu,
Na roco hnak na tu te khiah tokrolh thawn khal tu.
Hlanlai ai bang in amahte khiah
Bashan le Kilead ah leng tu seh.

15 Izip ramin ning suak awng bangin,
Amahte khiah ngaihsun urkul thilte hmuh tuh ing.

16 Mi phun dangte in cia khiah hmu tuhai
Amahte tha lakah zakthi tuh i.
Amahte kaa khiah amahte kut thawn hup tuh ai,
Amahte khiah na ngong tuh i.

17 Amahte in laivut khiah rul bangin liak tuh ai,
Laivum ai rul bang in amahte kua songin suak tuh i.
Amahte in BAWIPA na Pathian khiah kih tuh ai
Nangmah khiah na kih tuh i.

18 Na minung a taanghnak te sualhnak
khiah zah ai, amahte khiah sualhlat thai
Nangmah bang Pathian khiah aisu um i?
Amah in mite khiah ngaihhar hiam manin
Kumzangza in amah in thinraw in um ngio lo i.

19 Amah in ning kin hio leh tuh i.
Kin sualhnak khiah kin fon sah tuh i.
Kin sualhnak khiah a veksen in
tipui thuk songah lon tuh teu i si.

   20 Hlanlai ai panin kin paa te hnenah na kham bangin
Zakuk hnenah thuhman pe tuh i si.
Abraham hnenah ngaihharhnak pe tuh i si.

<<  MICAH 7  >>

Recent Posts