Micah 6

<<  MICAH 6  >>

1  BAWIPA relhnak thu khiah ngai tuu-ih.
“Tho tulai, na thu khiah mualte rel tu.
Na aw khiah tlangte in za tu seh.

2  Aw ning mualte le a kho ngai laivum hamte,
BAWIPA camhnak khiah ngai tuu-ih.
Ziangmanti fangin BAWIPA in
a minung te lakah mawhhluk hnak pakhat nai i.
Israel mite khiah mawhhluk tuh i.

3  Aw i minungte,
Ning lakah zai bawn ing?
Akontih in rim ning su ruai ing?
I lakah tettikhan tuu-ih.

4  Izip ram in ning suah ing.
Thawng song in ning tlanh ing.
Ning hmai ah Moses le Aaron le
Miriam te ning hlat sah ing.

5  Aw i minungte,
BAWIPA dikcanghnak khiah
ning ling thill thai in, Shittim ai panin
Kilkal tian Moab te kumpibawi Balak ai
thusawm hnak le Beor fapa Balaam ai
sawnhnak khiah tunin hih tuu-ih.” ti in ti i.

6  BAWIPA hmai ah zai thawn kawi tuh ing?
Zai thawn a Saang Pathian khiah sikhu tuh ing?
A hmai ah mai thawn taihnak a hlu thawn kawi ngang?
Kum khat tar kawlpaw niu thawn kawi ngang?

7  BAWIPA khiah tu cang thawngkhat ihlahle runti
thawngha dim thau thawn lungkhim tur im?
I khelhhnak ca in i fapa upaber khiah pe ngang?
I sualhnak ca in i fate khiah hlu ngang?

8  Aw mi pa, Pathian in a pha khiah na rel zo i.
BAWIPA in zai bawn na ruai i?
A hman niu in naper tuh le
Ngaihharhnak daih tuh le
Na Pathian thawn thinniam niu in
vak tuh khiah na ruai i lo im?

9  BAWIPA in Jerusalem khua hnenah au i.
Na hming kih tuh khiah fimhnak i.
“Tokrolh le a kawih tu thu khiah ngai tuu-ih.

10 Mi sual pa inn ah sualhnak thilri le
ningdulkul a hman lo zazu um aw lai im?

11 A hman lo zazu le a hman lo cuai lung
hmang tu pa khiah mawh lo i ti in ti nga ing?

12 A songai a milian te khiah riahsia rauh i.
A song ai umtu te in thudon ian rel i.
Amahte kaa in mite khiah zawl i.

13 Ciamanin ning seu in ning ur ruai tuh ing.
Ning sual manin zaikhai bek lo in ning dah tuh ing.

14 Ning te in rong ei tuh napui ai ning kham tuh lo i.
Ri ning kaam tuh i.
A hrekkhat khiah ning te in phur tuh napui ai,
pam ben tuh lo i si.
Cen ning o ngah hnak te khiah vangsau in rek tuh ing.

15 Ningte in cing tuh ai khawm tuh lo i si.
Oliv khiah rial tuh napui ai
a thau thawn nawih ngah tuh lo i si.
Capittizu hlum bawn tuh napui ai
ding ngah tuh lo i si.

16 Omri upadi dan te khiah hlun i si.
Ahab kumpibawipa ai perhnak bang in bawn i si.
Amahte thu sawmhnak khiah hlun i si.
Ciamanin zaikhai bek lo in ning bawn tuh ing
Ning minungte khai mite in nautat tuh i.
I minung te zauhsuamhnak khiah tuar tuh i si.” ti in ti i.

<<  MICAH 6  >>

Recent Posts