Micah 5

<<  MICAH 5  >>

1 Na raalkap te khiah hmunkhat in khawm tu,
aw raalkap te khua.
Amah in kinmah khiah kin sim i hang.
Amahte in Israel kumpibawi khiah
tokrolh thawn a biang ah seu tuh i.

2  Ikhalselai, nang, Bethlehem Efratah,
Judah phun lakah a cik ber inapui sikhaw,
Na song in i hnenah
Israel mite uktu Pa khiah suak tuh i.
Amah khiah he hlanlai in um awng zo i.

3  Ciamanin naukai tu nuu in a nau te hlan lo
Amah in Israel mite khiah zam tuh i.
Ciafangin a taanghnak a unaute khiah
Israel mite hnenah let leh tuh i.

4  Ciafangin amah khai ding tuh ai
BAWIPA tha rinsan kongin le
BAWIPA a Pathian hming lian pui rinsan in
a tu te khiah fak paih tuh i.
Amahte khiah thinnuam niu in nung tuh i.
Ziangmanti fangin amah khiah
laivum pumpalah ah lian tuh i.

5  Amah khiah remhnak i tuh i.
Assiria mite khiah kin ramah hleng in,
Kin kumpibawipa inn songah lut fangin,
Amahte tawng tuhin tukhal tu pasarih le
bawi pariat suah tuh i ing.

6  Amahte in Assiria ram khiah vangsau
thawn hnawmcan tuh ai,
Nimrot ram khiah a dawngkham ah
vangsau thawn uk tuh i.
Amah khiah kin ram ah hleng in
kin ramri songah lut fangin,
Assiria mite hnenin kin luat ruai tuh i.

7  Ciafangin Zakuk songai a taanghnak mite
khiah minung phun caang lakah um tuh i.
Amahte khiah minung te khai iang lo,
aisu khai hak lo hampa vumai ruah le
BAWIPA hnenai hlenghnak naidawh bang tuh i.

8  Zakuk songai a taanghnak mite khiah
Zental mite lakah um tuh i.
Minung phun caang lakah amahte khiah,
Tuu songai ramsa lakai chintit bang in le
Turual lakai chintit in tu te khiah dawp in
hlik dek ai aisu in khai a kut songin
o thill lohnak chintit bang in um tuh i.

9  Na kut in na raalte khiah tawng tuh ai
Na raalte khiah a veksenin rek tuh sio i.

10 BAWIPA in, “Cia nia ah ning lak ai
ning siphuhte khiah ning rek sah tuh ai
Ning siphuh leng te khai ning hnawm sah tuh ing.

11 Ning ram ai ning khua te khai ning hnawm sah tuh sio ing.
Ning raalkap te inn khai ning bal sah tuh sio ing.

12 Ning lakai dawi naite khai rek tuh sio ing.
Ciafangin tlahsan tu tuh aisu khai um tuh lo i.

13 Cen ning milim zukte khai ning cem sah tuh sio ing.
Ning lakah ning biahnak khan te khai hnawmcan tuh ing
Ning kut ai bawnhnak thil khiah
ningte in bia tuh nawn lo i si.

14 Ning lakai thing zuk te khai phai tuh sio ing.
Ciatih bangin ning khua te khiah hnawm ruai tuh ing.

15 I thu a ngai lo tu mi phunte khiah
i thinraw in phuzul tuh ing.” ti in ti i.

<<  MICAH 5  >>

Recent Posts