1 He manin i thin khiah tlo biakbo i.
2 Khuari bangai cawm a aw khiah
ngaai tuu-ih.
A kaa songai ponghnak khai ngaai tuu-ih.
3 vantlingtlaleuh khiah van hang hnia le
laivum pimpalah ah hlat i.
4 Cia hnua fangin, a hukhnak aw hleng i.
A cawm ngai in khuari bangin au i.
A aw khiah suak fangin amah in zai khai kham
lo in hlat sio i.
5 Khuari bang Pathian aw khiah
ngaisun urkul ngai in au i.
A lian ngai ngai a bawnhnak thilte khiah
kin in ling ban lo i sing.
6 Amah in vur hnenah,
‘Laivum ah tla tu.’ ti in ruai i.
Ruah sar hnenah, ‘A tuk rauh in sii tu.’ ti in ti i.
7 Amah bawnhnak minungte in ling thai in,
aisu hmuah khai amahte naper hmunin com ruai
8 Sumhnamte in a buanhmun tuh sii ai
amahte kua ah um i.
9 Khuahu khiah hlanglam in hleng i.
Saklam ai hlivua in khuasik hleng ruai i.
10 Pathian haihawh in ti khal ruai i.
Ti kau ngai khiah khal berh i.
11 Cen maici thawn mairo khiah dim ruai i.
Amah in a ngo ngai a mairote khiah zaih sio i.
12 Amah ruaihnak bangin amahte khiah
her hnelhno i.
Ciatih bangin laivum pumpalah ah amahte in
amah ruaihnak bangin bawn i.
13 Pathian in mairote khiah,
minung cawhhnak tuh maw
amah laipua burh tuhin maw
a ngaihharhnak hmuh tuhin kawih i.
14 Aw Job, he khiah ngai tu.
Ding tu meng lai Pathian ai bawnhnak
ngaihsun urkul naperte khiah ruat tu.
15 Kontih bangin Pathian in mairote khiah uk ai
a vantlingtlaleuh khiah tleu ruai i ti khiah
ling aw sim?
16 Mairote khiah a kontihin tar i ti le
fimhnak khim liang naitu Pa ai bawnhnak
ngaihsun urkulte khiah ling aw sim?
17 Ziangmanin Amah in hlanglam hlivua thawn
laipua khiah dap ruai fangin
na thuamte khiah saa im?
18 A erhnak dar bangin a cang meng vanvumte
khiah zaar tuhin amah khiah bawm aw sim?
19 Amah hnenah zai rel tuh khiah kin cuk tu.
Khuathim manin kinte in zaikhai bawn thill lo i ing.
20 Pong i nuam i ti in amah khiah rel tuh ing?
Mi pakhat in pong selai amah khiah lem tuh lio i.
21 Tun rinin mite in van vumai khuavar khiah
hlivua in amahte khiah lan ben fangin,
a tleu ze manin, sik thill lo i.
22 Saklam in amah khiah sui bangin
mawi in hleng i.
Pathian khiah a kihkul kumpibawipa i.
23 A Cungnung Pathian khiah kinte in
tawk thill lo i sing.
Amah in huthawm lian ngai nai ai, amah in
cawhkuan pe ai a hman ngai in thukhan i.
Amah in aisu khai nemh lo i.
24 Ciamanin mite in amah khiah kih ai,
amah in thinlung fimte khiah hmaisong lo i.” ti
in rel i.