Jeremiah 30

<<  JEREMIAH 30  >>

1Jeremiah hnenah BAWIPA thu khiah, 2“Israel mite Pathian BAWIPA in, ‘Na hnenah i rel hnak hmuahhmuah khiah ca-uk songah khum tu. 3I minung Israel le Judah mite khiah thawngtla hmunin kawih leh hnak cuu khiah khim i hang. A paate hnenah i pehnak ram ah let ruai leh tuh ai amahte in cia ram khiah ping tuh i.’ ti in ngan tu.” ti in hleng i.

He thu te khiah BAWIPA in Israel le Judah mite thawn senghnak thurel hnak i. 5Ziangmanti fangin BAWIPA in:

   “Thinnuamhnak aw i lo ai
Thincawlhnak le lauhnak aw khiah za i ing.

6  Pasal pakhat bang tang naukai awng awm?
Zawt in sik tu cuk ih.
Cia ilekhaw, zaimanin pasalte khiah nupui
naukai bangin, a veksenin a ril dom in um ai
amahte hmai khiah raudia in um i?

7  Ai-aw! Cia nia khiah thupui rauh manin
cia nia bang um tuh lo i.
Cia nia khiah Zakuk harsahnak nia i.
Ikhalselai amah khiah cia nia songin luat ruai tuh i.

8  Ziangmanti fangin cia nia ah,
Amah hak khiah na hawng in ek sah tuh ing.
Na henhnak rite khiah cat ruai tuh ing,
ti in BAWIPA in rel i.
Ram dang mite in amahte khiah sal ah
cang ruai tuh nawn lo i hang.

9  Ikhalselai amahte in amahte BAWIPA
Pathian le amahte ca in i suak ruai
tuhhnak amahte kumpibawi
David na khiah per sah tuh i.

10 Ciamanin aw i hnenum Zakuk,
lau mah, ti in BAWIPA in ti i.
Thin tawp in khai um mah, aw Israel.
Ziangmanti fangin ram hla ngai hmun in na o tuh ing.
Na fate khiah amahte thawngtla hmun ramin o tuh ing.
Zakuk khiah tlung leh tuhai,
thinnuam le dapniu in um tuh i.

11 Ziangman ti fangin na o tuhin kaimah
khiah nangmah thawn um tuh ing, ti in BAWIPA in ti i.
Kaimah in ning hnawt hmun ramte khiah
hnawm ruai berh khal ingkhaw,
Na hnawm ruai berh tuh lo ing.
Ikhalselai a hman bangin ning tiam tuh ing.
Cawh lo in ning luat ruai tuh lo ing.” ti in rel i.

12 Ziangmanti fangin BAWIPA in:
‘Ning rimsu tuarhnak khiah a bawl thill lo i.
Ning maa khiah a rauh ngai i.

13 Ning hmaihma ning pen sah tuhin
ning ngen sah tu tuh um lo i.
Lawm ruaihnak tuh sii nai lo i si.

14 Ning tlak awngtute in ning hai sio i hang.
Amahte in ning sii lo i.
Ziangmanti fangin ning raalte in ning ur ruai ing.
Mi riahsia ngai pa thawn ning tiam i.
Ning sualhnak a tam ze manin le
Ning sualhnak khiah tam amam manin.

15 Zaimanin ning rimsuhnak manin kap i si?
Ning lungsia hnak khiah lawm ruai thill lo i.
Ning sualhnak a tam ze manin le
Ning sualhnak khiah tam amam manin
Hete khiah ning lakah bawn ing.

16   Ciamanin ning kai tute khiah kai tuh ve i.
Ning raalte khiah a veksenin thawngtla tuh i.
Ning rok tute khiah rok tuh ve i.
Ning dawp tute khiah dawp tuh ve in bawn tuh ing.

17 Ziangmanti fangin ning cak ruai leh tuh ing.
Ning maa te khiah ning bawl sah tuh ing,
ti in BAWIPA in rel i.
Ziangmanti fangin amahte in ningmah khiah, mite ai hnawt hnak ti in ning ko ai, ‘He khiah Zion i.
Amah khiah aisu in khai si lo i.’ ti in ning ko i.

18 “BAWIPA in, ’Thawngtla tu Zakuk bukte
khiah tlun leh tuh ing.
A umhmunte khiah ngaihhar sah tuh ing.
Jerusalem khua khai a hnawm hmun kel ah sa leh tuh i.
Cen kumpibawipa inn khai a umhmun kel ah um tuh hlen i.

19 Ciafangin amahte songin anhnak aw le
Puai bawn ai anghnak aw khiah suak tuh i.
Amahte khiah zaai ruai tuh ing.
Tlawm ruai tuh lo ing.
Amahte khiah thangphat tuh ing.
Amahte khiah a lovang cang tuh lo i.

20 A fate khai hlanlai bang in um tuh i.
Amahte pawlpui khai i hmai ah kho ruai tuh ing.
Amahte nemh tute khai a veksen in cawh tuh ing.

21 A bawite khiah amahte mite i tuh ai
A uktu khai amahte songin suak tuh i.
Amahte uktu khiah i hnenah nong ruai tuhai,
Amah in i nong tuh i.
A thin songin i nong tuhai thukham tu
khiah aisu i?’ ti in BAWIPA in ti i.

22 ‘Ningte khiah i minung i tuh ai,
kaimah khiah ning Pathian i tuh ing.’ ti in ti i.

23 BAWIPA hnenin khuahu khiah a siava
rauh in feh ai a zomzet in zuang i.
Mi sual pa lu vumah a rauh ngai in tlok tuh i.

24 BAWIPA khiah thinraw bik i.
A thinlung ai a tumhnak bangin bawn ben
hlanlo let leh tuh lo i.
Tunhnua lamah ling leh tuh i si.

<<  JEREMIAH 30  >>