1He thute khiah Jeremiah in Jerusalem in Babilon ah Nebukhadnezzar ai phurhnak thawngtla ai a taanghnak mi upate – phungki, prawfet le mi veksente hnenah kuathnak lai i. 2(He khiah kumpibawipa Jekhawniah le kumpibawi ai a nuu le tilret sa mite le Judah le Jerusalem ai bawite le lettamate le pumsutute khiah Jerusalem in thiar hnua ah canghnak i.) 3Cia lai khiah Judah kumpibawipa Zedekiah in Babilon ah Babilon kumpibawipa Nebukhadnezzar hnenah Shaphan fapa Elasah le Hilkiah fapa Kemariah kut in kuat hnak lai i. Hetih bangin ngan i:
4 Vancung mite BAWIPA, Israel mite Pathian in,
Jerusalem in Babilon ah phur tuhin i bawn bangin,
thawngtla ai phurhnak mite veksen hnenah:
5 Inn sa tu i lai hluh tuu-ih.
Vuandum bawn in a thai ei tuu-ih.
6 Nu nai tuu i lai, fapa le fenute cawi tuu-ih.
Ning tlawm lo in ning zaai thai in,
ning fapate khiah nuhoi sah tuu i lai,
ning fenute khiah pa nai ruai tuu i lai,
amahte in fapa le fenute cawi tu seh.
7 Cen kaimah in ningte khiah thawngtla in
ning phur ruai hmun khua ca in
raalremhnak sii tuu-ih.
Cia khua ca in BAWIPA hnenah sawngen sah tuu-ih.
8 Ziangmanti fangin vancung mite BAWIPA, Israel mite Pathian in:
Ning lakai umtu ning prawfet te le
tlahsantute in ning zawl ma seh.
Ning man ruaihnak mang khai sang mah ih.
9 Ziangmanti fangin amahte in i hming in
ning hnenah thudon in prawfet thu ning rel i.
Kai in amahte khiah ruai lo ing, ti in BAWIPA in ti i.
10 Ziangmanti BAWIPA in: Babilon ah kum sawmsarih
ning um ben fangin, ning tlawng leh tuhai,
ciafangin ning hnenah thu pha i relhnak bangin bawn tuhai,
he hmunah ning tlung ruai leh tuh ing.
11 Ziangmanti fangin, ningmah ca ai
i ruathnak khiah ling ing.
A pha lo ruathnak i lo ai thinnuamhnak le
hmailamah ummhnak um tuhin
ning ruat sah ing, ti in BAWIPA in ti i.
12 Ciafangin ningte in i ko tuhai, i hnenah feh in
sawngen tuh le ning ngai sah tuh ing.
13 Ciafangin ningte in ning thinlung ngaingai
in i sii tuh ai i tawk tuh i si.
14 Ningte in i tawk tuh ai, ning thawngtla
hmunin ning lang leh tuh ing, ti in BAWIPA in rel i.
Mi phun caangcaang le kaimah in ning
hnawt hmun veksen hmunin thawngtla
tuhai ning hnawt hnak hmun ah
ning kawih leh tuh ing, ti in BAWIPA in rel i.
15 Ningte in, “BAWIPA in Babilon ah kin ca
in prawfette suak ruai zo i,”ti in rel manin
16 BAWIPA in David kumpibawipa tauhkheng ai totu le,
he khua songai um tu mite veksen le
ning thawn in thawngtla ai feh lo tu ning unaute thu ah,
17 Vancung mite BAWIPA in:
Amahte vumah vangsau le rian le
urhnak hleng ruai tuhai,
amahte khiah a hnawm ze manin
ei pha lo a hmon thaihmin bang in
bawn tuh ing, ti in ti i.
18 Amahte khiah vangsau le rian le
urhnak thawn hnawh tuh ing.
Amahte khiah rimsu pe tuh ing.
Laivum ai kumpibawi hmuahhmuah te
lakah awrsia camhnak, ngaihsun urhnak,
nautathnak le zauhsuamhnak cang tuhin
mi phun hmuahhmuah lakah amahte khiah hnawt zo ing.
19 Ziangmanti fangin zingniu in tho ai
amahte hnenah feh tu i hnenum prawfette
hnenai i relhnak thu khiah ngai nuam lo i.
Cen ningte in khai ngai ce lo i si, ti in BAWIPA in ti i.
20 Ciamanin Jerusalem in Babilon ah i
kuathnak, thawngtla tu ning veksen in
BAWIPA thu khiah ngai tuu-ih.
21 Vancung mite BAWIPA, Israel mite Pathian in,
i hming in prawfet thu rel tu
Kolaiah fapa Ahab le Masseiah fapa Zedekiah thu ah:
Amahte khiah Babilon kumpibawi
Nebukhadnezzar kut ah ap tuhai,
amah in amahte khiah ning hmai ah rek tuh i.
22 Amahte manin Babilon ai umtu thawngtla Judah mi veksen in,
“Babilon kumpibawipa in mai ah
em hnak Zedekiah le Ahab bang in
BAWIPA in na bawn tu seh.” ti in awrsia camhnak in hmang tuh i.
23 Ziangmanti fangin amahte in hmaisia kul khiah Israel ram songah bawn i.
A ompuite nu thawn nulepa sual bawn i.
Amahte in i ruai lohnak thudon khiah i hming in rel i.
Kaimah khiah a tetti ing.
Ciamanin ling rori ing, ti in BAWIPA in rel i.
24 Cen Nehelam mi Shemaiah khai hetih in rel tu:
25 Vancung mite BAWIPA, Israel mite Pathian in:
Na hming in Jerusalem ai umtu mi veksen
hnenah le phungki Maaseiah fapa
Zephaniah le phungki veksen te hnenah,
26 BAWIPA in BAWIPA inn uktu tuhin
phungki Jehoida ca in phungki na dah zo i.
Prawfet tum tu mi-am hmuahhmuah khiah
thawng hla tuh sio i si.
27 Ciamanin, zaimanin na hnenah amah veve
khiah prawfet tum tu Anathoth ai
Jeremiah khiah hau lo i si?
28 Ziangmanti fangin amah in Babilon ah kinte hnenah,
‘A raipui thawngtla tuh i si.
Inn sa in hluh tuu-ih.
Vuandum bawn in a thai ei tuu-ih.’
ti in lai kin kuat i.’ ti in ti i si.”ti in rel tu, tin BAWIPA in rel i.
29 Ciafangin phungki Zephaniah in he lai khiah Jeremiah zak in siar i. 30Ciafangin Jeremiah hnenah BAWIPA thu khiah, 31“Thawngtlate a veksen hnenah, ‘BAWIPA in Nehelam mi Shemaiah thu khiah, “Kaimah in ruai napui lo ai Shemaiah in thudon ning sang ruai tuhin prawfet thu rel manin, 32BAWIPA in, “Nehelam mi Shemaiah le a innkuate khiah cawh tuh ing. He mite lakah a minung aisu khai um tuh lo i. Cen i minungte ca ai a pha i bawnhnak khai amah in hmu tuh lo i. Ziangmanti fangin amah in BAWIPA tawng tuhin raaltho tuhin cuk i.” ti i.’ti in rel tu.” ti in BAWIPA thu khiah hleng i.