1Ciafangin BAWIPA in, “Judah kumpibawi inn ah zu tulai he thu rel tu. 2‘David kumpibawipa tauhkheng vumai to tu aw Judah kumpibawipa le na hnenumte le he kawldawngkham songin lut tu ning minungte, BAWIPA relhnak thu khiah za tuu-ih. 3BAWIPA in, “Thuhman in thukhan tu i lai, dikcanghnak bawn tuu-ih. Mi ai rokhnakte khiah a nemh tute kut songin luat ruai tuu-ih. Mikhual le paa nai lote le hmaitongte lakah a pha lo bawn mah ih. Puarthau in khai um mah ih. Cen he hmun ah mawh nai lote thi luang ruai mah ih. 4Ziangmanti fangin ciatih in bawn leisikhaw, ningte khiah he inn kawldawngkham songah siphuh le siphuh leng to kong in, hnenum le mite le David kumpibawi tauhkheng vumai totu kumpibawite kawmin lut tuh i si. 5Ikhalselai he thute khiah ngai hlah leisikhaw, he inn ah aisu khai um lo in dap sukso in um tuh khiah kaimah rori in cukcam ing.” ti in ti i.’ ti in rel tu.” ti in i ruai i.
6Ziangmanti fangin BAWIPA in Judah kumpibawipa hnenah,
“Nangmah khiah i hnenah Kilead i si.
Lebanon lu i si.
Ikhalselai nangmah khiah aisu in khai
hluh lohmun nelrawn le khuate ah na bawn tuh ing.
7 Amahte raal thilthuam thawnin na tawng
tuhin na raalte na bawt sah tuh ing.
Na lawithing a pha berber khiah na vawng sah tuh berh ai
Mai ah na tih sah tuh i.
8 Ciafangin ram dang mi tamngai in he khua khiah khel tuhai a ompui hnenah, ‘Zaimanin he khua lianpui khiah BAWIPA in hetih in bawn i pa?’ ti in zawt tuh i. 9Ciafangin amahte in, ‘Aw amahte in amahte BAWIPA Pathian thawn lungkhim dunhnak a thukham khiah zam ai a dang pathiante khiah bia ai a naper sah manin i.’ ti in sawn tuh i.” ti in rel i.
10 A thi ca in kap mah ih.
Kah khai kah mah ih.
Ikhalselai raalte ai pomhnak te khiah
lungsia ngai in kah tuu-ih.
Ziangmanti fangin amahte khiah tlung leh tuh nawn lo i.
Amahte ram khai hmu leh tuh lo i hang.
11 Ziangmanti fangin BAWIPA in, he ramin suak tu a paa Josiah ca in kumpibawi per tu, Judah kumpibawi Josiah fapa Shallum thu khiah, “Amah khiah he hmun ah let leh tuh lo i. 12Ikhalselai amahte in thawnghla hmunah amah khiah thi tuhai, he ram khiah hmu leh tuh nawn lo i hang.” ti in rel i.
13’Dikcanglo ai inn sa tu pa hnenah rimsuhnak um tu seh.
A hman lo ai amah innkhaante sa tu pa hnenah rimsuhnak um tu seh.
A ompui per man khiah hlawhtham pe lo i.
A per man khiah zaikhai pe lo i.
14 Amah in, ‘Inn kau ngai khiah
a khaan tamngai thawn sa tuh ing.
Padinpauh te khai dah tuh ing.
lawi thingtlep bangkhang bawn tuh ing.
Si san thawn mat tuh ing.’ ti in rel i.
15 Lawi thingtlep thawn kulh manin
kumpibawi cang tuh i sim?
Na paa in ei le ding in um ai
Thuhman le a dikcang in bawn lo im?
Ciamanin amah vumah phathnak hleng i.
16 Amah in mi farah le samhnak naite thu khiah a hman in rel sah i.
Ciamanin pha i.
Cia khiah kaimah i ling manin i lo im?” ti in BAWIPA in ti i.
17 Ikhalselai ning mit le ning thinlung khiah
mi thil irhnak tuh le mawh nai lote thi luang
ruai tuh le mi nemh hnak le puar thauhnak ian in hmang i si.”
18 Ciamanin BAWIPA in Judah kumpibawipa Josiah fapa, Jehoiakim thu khiah,
“Amahte in amah khiah kah tuh lo i.
‘Aw i hmingpa, aw i farnu.’ ti in kah tuh lo i.
Amahte in amah khiah kah tuh lo i.
‘Aw, bawipa, aw a thangphathnak.’ ti in kah tuh lo i.
19 Amah khiah lak bang in vui tuh i.
Amah khiah duk tuhai, Jerusalem kawl dawngkham pua ah lon tuh i.
20 “Lebanon ah hong tu i lai, kap tuu-ih.
Bashan ah ning aw suah in kap tuu-ih.
Abarim hmunin kap tuu-ih.
Ziangmanti fangin ning ithnakte khiah thi sio i hang.
21 Nun ning nuam teng in ning pon ing.
Ikhalselai ningte in, ‘Za tuh lo i ing.’ti i si.
I thu i ngai lo heh ning naulai ai panin ning dan i.
22 Hlivua in ning uktute khiah ei tuh sio i.
Ning ithnakte khiah thawngtla tuh sio i.
Ciafangin ning sualhnak veksen ca in
zakthi in hmai ning sia hlai buang na tu.
23 Aw Lebanon ai umtute,
Lawithing ah bu sa tute,
Nupui nuu khiah naukai ai ur bangin
urhnak khiah ning vumah hleng fangin,
zaitluk in hmunthiam nga i si?
24BAWIPA in, “Judah kumpibawipa Jehoiakim fapa Khawniah khiah i kiahhan kut ai hmingthu hnak kutruk i rinin, na hawk tuh lio ing. 25Ciale na rek nuamtu te kut songah le a hmai na kih hnak Babilon kumpibawipa Nebukhadnezzar kut ah le Khaldean te kut ah na ap tuh lio ing. 26Na cawitu na nuu le nangmah khiah na te lo hmun ram a dang ah na lon tuh teu ai ciata ah na thi tuh i. 27Ikhalselai amahte daih hnak ramah tu tlung leh tuh lo i.
28 He Khawniah paa khiah mite nautathnak
A khoi milim zuk i awm?
Amah khiah aisu daih lohnak bel i awm?
Amah le a fate khiah zaimanin lon teu i pa?
Zaimanin amahte ling lo hmunah lon teu i pa?
29 Aw laipua, laipua, laipua,
BAWIPA thu khiah ngai tuu-ih.
30 BAWIPA in, ‘He paa khiah fatong i ti in khum tu.
A nun songah khangso tuh nawn lo i.
Ziangmanti fangin a fate pakhat bang khai khangso tuh lo i.
David kumpibawi tauhkheng vumah to in
Judah ram khiah uk tuh nawn lo i hang.’ ti in ti i.” ti in rel i.