1Ciafangin BAWIPA in i hnenah, “Moses le Samuel rin i hmai ah ding selai, i thin in he mite khiah zarto thill tuh lo ing. I hnenin hnawt tu sek. Amahte khiah tlan tu seh. 2Amahte in, ‘Konah kawi tuh i ing?’ ti in na zawt lekhaw, amahte khiah nangmah in, ‘BAWIPA in,
“Thi tuar tuhte khiah thihhnak ah feh tu seh.
Vangsau tuar tuhte in vangsau hnenah feh tu seh.
Rian tuar tuhte in rian hnenah feh tu seh.
Raalte ai pom tuh te khiah raalte in pom tu seh.”
ti i.’ ti in i rel i.
3“Amahte khiah phun li in hnawm ruai tuh ing: a rekhnak tuhai vangsau, a duktu tuh ah uico le amahte khiah ei le hnawmcan tu tuh ah van ai vaniu le laivumai ram sa te dah tuh ing. 4Judah kumpibawipa Hezekiah ai fapa Manasseh in Jerusalem ah a bawnhnak manin amahte khiah laivum ai kumpibawite hmuah hnenah rimsu ruai tuhin pe tuh ing.” ti in BAWIPA in ti i.
5 “Aw Jerusalem, aisu in ning na hio tuh i?
Aisu in na kah tuh i?
Akontih bang i si ti in aisu in na fan tuh i?
6 BAWIPA in, “Ningte in i zam lio i si.
Khelleh lam sawnah let i si.
Ciamanin i kut khiah pharh ngangkhaw,
ning rek tuh ing.
Ngaih ning har hnelhno khiah i cawl sek i.
7 Lai ramai kawldawngkham ah
amahte khiah fang kung khaap bangin
khaap tuh ing.
Amahte in a nundan khiah thleng lo manin,
Amahte khiah fate nai lo in dah tuh ing.
I minungte khiah rek tuh ing.
8 Amahte hmaitong khiah tipui ai
runsiat tah in tam tuh i.
Sunlai ah amahte lakah le tlangvalte nuute
lakah mi roktu hleng ruai tuh ing.
Amahte vumah thin-urhnak le lau hnak
khiah cammalak in hleng ruai tuh ing.
9 Fa pasarih cawi tu nuu khiah thikhum in
um tuhai, a haihawh khiah bo tuh i.
Khuavar lai pah in cia nuu ni khiah tla tuh i.
Amah khiah zakthi ruai tuhai ngaihsun ur ruai tuh i.
A taanglai te khiah amahte raalte hmai ah
vangsau thawn rek tuh ing.” ti in BAWIPA in rel i.
10 Kaimah khiah rim i su i, i cawitu i nuu.
Kaimah khiah laivum pumpuhluk thawn tawng tu pa ing.
Aisu khai a miat thawn zawn awng lo ing.
Cen aisu in khai a miat thawn i zawn awng lo i.
Ikhalselai aisu hmuah in awrsia in i cam i.
11 BAWIPA in, “Nangmah khiah phathnak ca in na luat ruai tuh ing.
Harsa cu le rimsu cu fangin na raalte in ninghio na ngen ruai tuh ing.
12 Aisu in thir khiah ek thill i?
Aisu in saklam ai thir le dar khiah ek thill i?
Ning ram song ai ning sualhnak veksen manin,
Ning naihhnak le ning hlawnthil khiah
a lovang in mite in ning rok ruai sah tuh ing.
14 Ning ling lo hmun ramah ning raalte thawn ning feh ruai tuh ing.
Thin i raw manin mai khiah sem zo ai
nangmah khiah na kang tuh i.” ti in ti i.
15 Aw BAWIPA, nangmah in ling i si.
I hih tulai i leng tu.
I rektute khiah phu i zul sah tu.
Nangmah khiah thin sau ngai manin
I lang lio mah.
Nangmah ca in mi hauhnak tuar khiah lo ling tu.
16 Na thu khiah tawk fangin, ei ing.
Na thu khiah i thin songah anghnak i.
Ziangmanti fangin kaimah khiah na hming in i ko i.
Aw vancung mite BAWIPA Pathian.
17 Mi zauhsuamtute lakah to awng lo ing.
Ang khai i ang lo i.
Na kut khiah i vumah dah ai
thinrawhnak thawn i dim ruai manin,
kaimah lek in to ing.
18 Zaimanin a zomzet in i ur i?
Zaimanin i maa khiah lawm thill lo i?
Zaimanin lawm nuam lo i?
Nangmah khiah i hnenah a rinsan tlak lo
rawnti le a kaang lio cirhti bang i nga sim?
19 Ciamanin BAWIPA in,
“Sir lesikhaw, na tlun leh tuh ing.
I hmai ah ding tuh i si.
A mankhung thil khiah a pha lo hmunin lang lesikhaw,
Nangmah khiah i kaa ah na dah tuh ing.
Amahte khiah na hnenah let tu seh.
Ikhalselai amahte hnenah let tuh lo i si.
20 Nangmah khiah mite ca ah dar thawn
sahnak a kho ngai seen ah na bawn tuh ing.
Amahte in na tawng tuh i.
Ikhalselai amahte in na neh tuh lo i.
Ziangmanti fangin na o tuh le na tlanh tuhin
nangmah thawn um tuh ing.” ti in BAWIPA in rel i.
21 “Mi sualte ramin na luat ruai tuh ing.
Mi puarte kut songin na tlanh tuh ing.”