Jeremiah 14

<<  JEREMIAH 14  >>

Jeremiah hnenah BAWIPA in ruahsi lohnak thu relhnak.

2  “Judah mite in kap i.
Amahte khuate khiah ro sio i.
Amahte ram ca in kap i.
Jerusalem khua songin kaphnak aw suak i.

3  A bawite in tlangvalte khiah ti cawi tuhin feh ruai i.
Amahte in tikhur ah kawi ai ti tawk lo i.
Amahte bel khiah a kualawng in tlun i.
Amahte khiah zakthi ai ngaihsun ur i.
Ciamanin amahte lu khiah khuk i.

4  Laipua ah ruahsi lo manin, laipua khiah ro i.
Lovai tute khiah zakthi i.
Ciamanin amahte lu khiah khuk i.

5  Kiho in khai hampalak ah a fa nai ai,
Hampa um lo manin zam lio i.

6  Hampalak ai lakte khai zaikhai
um lo hmun mual saang vumah
ding ai mehleng bangin haihhawh i.
Hampa um lo manin amahte khiah khuahmu lo i.”

7  Aw BAWIPA, kin sualhnak in tetti kin khan napuikhaw,
Na hming ca in kin bawn sah tu.
Kin sang thanau hnak tam ngai i.
Nangmah lakah sual zo i ing.

8  Aw Israel mite Ummhnak,
Amahte khiah harsa fangin Otu.
Ziangman in kin ram songah mikhual bangin um i si?
Ziangman in zan khat caam tuh ai
khualsi tu bang in um i si?

9  Ziangman in ngaihsun ur tu pa bang in um i si?
A o ben lo tu pa bang in ziangman in um i si?
Ikhalselai nangmah BAWIPA khiah kin lakah um i si.
Kinmah khiah na hming ai ko hnak minung i ing.
Kin hlum mah.

10 BAWIPA in he mite hnenah,
“Amahte in vak hnelhno nuam i.
Amahte ke khiah hen lo i.
Ciamanin amahte khiah BAWIPA in saang nuam lo i.
Amah in amahte sualhnak khiah
hih sah tuh ai amahte sualhnak khiah cawh tuh i.” ti in rel i.

11Ciafangin BAWIPA in i hnenah, “Amahte phat hnak tuhin he mite ca ah sawngen sah mah. 12Amahte in rongul fangin, amahte kaphnak khiah ngai sah tuh lo ing. Amahte in mai ai taihnak a hlu le rongmu te hlu fangin saang sah tuh lo ing. Ikhalselai amahte khiah vangsau le rian le urhnak thawn rek tuh ing.” ti in i rel i.

13Ciafangin kai in, “Aw BAWIPA Pathian! Prawfette in amahte khiah, ‘Vangsau khai hmu tuh lo i si. Rian khai tlung tuh lo i. Ikhalselai heta ah raalremhnak ning pe tuh ing.’ ti in rel i.” ti in rel ing. 14Ciafangin BAWIPA in i hnenah, “Prawfette in i hming in thudon thu rel i. Amahte khiah feh ruai lo ing. Rel khai rel ruai lo ing. Pon khai pon lo ing. Amahte in ning hnenah thudon mang le tlahsanhnak le a lovang thu ning rel i. Amahte thin song ai ruat sualhnak thu ning rel i. 15Ciaman in kaimah in hlat napui lo ai i hming in, ‘Vangsau le rian khiah hleng tuh lo i.’ ti ai rel tu prawfette khiah BAWIPA in, ‘Cia prawfette khiah vangsau le rian in thi tuh i. 16Cen amahte ai prawfet thu relhnak za tu mite khai rian le vangsau manin Jerusalem lampui lakah lon tuh sio i. Amahte le a nute le a fapa le a fenute vui tu tuh aisu khai um tuh lo i. Ziangmanti fangin amahte vumah amahte phat lohnak khiah burh tuh ing.’ ti in ti i.

17Ciamanin amahte hnenah he thu khiah rel tu:
‘Sun le zan in mithli i far tu seh.
Com tau lo in far tu seh.
Ziangmanti fangin i minung te fenu niu
khiah a rauhpui in vit manin ek lio i.

18 Lo lakah suak lengkhaw,
ciata ah vangsau thawn rekhnak mite um i.
Khua songah lut lengkhaw,
Ciata ah rian manin ur tute um i.
Prawfet le phungki te khai
amahte ling lo hmun ram songah vak i.”
ti in rel i ruai i.

19 Judah mite khiah hnawl bul lio i sim?
Zion khiah na hua bul lio im?
Zaimanin kin lawm thill lo in kin ur ruai i si?
Thinnuamhnak sii ai a pha um lo i.
Ur lawmhnak tuh sii ai rimsuhnak lek um i.

20 Kin sualhnak le kin paate mawhhnak
khiah sir i ing, aw BAWIPA.

21 Na hming ca manin kin hua mah.
Na thangphathnak kumpibawi
tauhkheng khiah hmaisia ruai mah.
Kin thawn ai lungkhim dunhnak
na thukham khiah hnawm tuh lo in hih tu.

22 Mi dangte milimte lakah
ruahsi ruai thai milim um awm?
Vancungte in ruahsar sii ruai thill awm?
Aw BAWIPA kin Pathian, nangmah khiah amah i lo i sim?
Ciamanin, nangmah in hete khiah
bawn manin, Nangmah khiah na iang tuh i ing.

<<  JEREMIAH 14  >>