1 “Bawipa Pathian Ciang Rauhla khiah i vumah um i.
Zaimanin ti fangin Bawipa in kaimah khiah
mi farahte hnenah thuthang pha tazahaw tuhin i ril zo i.
Thinhnawmte lawm ruai tuhin i hlat i.
Thawngtla te hnenah luathnak thu rel tuh in le
thawng song ai a henhnak te khiah hlat tuh in le
2 Bawipa ngaihharhnak kum i ti than tuhin le
kin Pathian in phuzul nia le
Lungsia ai kap tu te lawm ruai tuhin le
3 Zion ai lungsia in kaptute thinnuam ruai tuhin le
Amahte khiah vutkuang tahin a mawi pe tuhin le
Lungsia in kaphnak tahin anghnak thau pe tuhin le
Thinrit tahin cuanhnak thilthuam pe tuhin i hlat i.
Ciafanginin amahte khiah
dikcanghnak thingkung ti in ko tuhai,
Bawipa khiah thangphat tuhai Bawipa ai birhnak thingkungte i.
4 Amahte in a hnawmcia khua khiah sa leh tuh i.
Aisu um lo hmun te khiah rem leh tuh i.
San tampui hnawmzo hnak khuate khiah sa leh tuh i.
5 Ram dang mite in ning tu le me te ning khal sah tuh i.
Ram dang mite fate khiah ning lo vai tute le
ning vuandum kiltute i tuh i.
6 Ikhalselai ningte khiah Bawipa Phungkite
ti in hming ning pe tuh i.
Mite in ningte khiah Pathian Hnenumte ti in ning ko tuh i.
Gentile mite rong ei sah tuh i si.
Amahte thangphathnak khiah ning hngalhnak i tuh i.
7 Ning zakthi hnak tahin, zulhnak khiah a let nih in nai tuh i si.
Hmaisia hnak tahin, amahte ro lakah ang tuh i.
Ciamanin amahte ramah a let nih in co tuh i.
Kumzangza ai anghnak khiah amahte in ping tuh i.
8 Ziangmanti fang Bawipa kaimah in thuhman khiah i daih i.
Rukohnak khiah mai ai tai in hlu khiah i daih lo i.
Amahte perhnak khiah a hman in tham tuh ing.
Amahte thawn kumzangza lungkhim dunhnak
thukham bawn tuh ing.
9 Amahte tesin fate khiah Gentile mite in ling tuh i.
A fate khiah mite in ling sah tuh i.
Amahte hmu tu hmuah in, amahte khiah
Bawipa ai hmuifu burhnak fate i ti in upat tuh i.”
10 Bawipa lakah ang tuh bik ing.
I Pathian lakah i ang tuh i.
Ziangmanti fangin mohoi tu pa in thuam par bangin,
Mo nu in khi te kawmin par bangin,
amah in ohnak thilthuam thawn i silh zo i.
Dikcanghnak thuam thawn i khuk zo i.
11 Ziangmanti fangin, laipua in a song aite po ruai bangin,
Vuandum in a songai cinghnakte po ruai bangin,
Bawipa in khai dikcanghnak le cuanhnak khiah
mi phun hmuahhmuah hmai ah suak ruai tuh i.