1 Zion dikcanghnak khiah a tleu ngai in suak hlan lo le,
A ohnak khiah mai-inn ko bangin
var hlan lo Zion ca manin, pong lo in um tuh lo ing.
Jerusalem ca manin com tuh lo ing.
2 Gentile mite in na dikcanghnak khiah hmu tuh i.
Kumpibawite veksenin na thangphathnak hmu tuh i.
Bawipa ka songin hming na sa tuhai
A hming thar thawn na ko tuh i.
3 Bawipa kut songah nangmah khiah
thangphathnak lukhuk i tuh i si.
Na Pathian kut songah, kumpibawi lukhip i tuh i si.
4 Nangmah khah a Zamlio hnak ti in na ko tuh nawn lo i hang.
Na ram khai Zai khai um lo hmun ti in ko tuh lo i hang.
Ikhalselai nangmah khiah Hephzibah ti in na ko tuh i.
Na ram khai Beulah ram ti in ko tuh i.
Ziangmanti fangin Bawipa in na lakah lungkhim ngai ai,
Na ram khai nupa bangin hoi tuh i.
5 Ziangmanti fangin tlangval pa in fenu niu hoi bangin,
Na fapate in na hoi tuh ve i.
Mohoi pa in mo nu nuu lakah ang bangin,
Na Pathian in khai na vumah ang tuh i.
6 Aw Jerusalem, na sen vumah santari na dah sah zo ing.
Amahte in sun le zan pong lo in um tuh lo i.
Bawipa hih tu ningte in pong lo in um mah ih.
7 Amah in Jerusalem khiah kho ruai in
laivum ah mite in cuanhnak tuhin a bawn hlan lo,
Amah khiah com siang mah ih.
8 Bawipa in a kiahhan kut le a banpui tha rinsan in:
“Na perhnak na rongte khiah na raalte in
ei tuhin pe tuh nawn lo i hang ing.
Ram dang mi te fate in na capittizu
khai na ding tuh nawn lo i hang.
9 Ikhalselai a khawm tute in ei tuh i.
Bawipa khiah cuan tu.
Hmunkhat ai capittizu a kawih tute in
a cianghlim i tualvan ah ding tuh i.”
ti in thukham zo i.
10 Feh tu, Kawl dawngkham songin feh tu.
Mite ca in lam sel tu.
Sa tu, Lamceh pui khiah sa tu.
Lungtote khiah lon tu sio.
Mite ca in a lan khiah tar tu.
11 “Zion fenu hnenah,
‘Na ohnak cu khiah hleng i hang.
A lehsawng khiah amah thawn um i.
A hlawhtham khiah amah in nai i.’
ti in rel tu.”ti in Bawipa in laivum
pumpalah ah than zo i.
12 Amahte in amahte khiah, Mi cianghlim,
Bawipa ai Luangtlanhnak, ti in ko tuh i.
Nangmah khiah A Siihnak,
Zam lohnak Khuapui, ti in na ko tuh i.