1 Tho in tleu tu.
Ziangmanti fangin na khuavar khiah hleng i hang.
Bawipa thangphathnak khiah na vumah tho zo i hang.
2 Ziangmanti fangin khuathim in laivum khuk tuh i.
Khuathim bik in minungte khiah khuk tuh i.
Ikhalselai Bawipa khiah na vumah tho tuh i.
A thangphathnak khiah na vumah hmu tuh i.
3 Gentile te khiah na varhnak hnenah kawih tuh i.
Kumpibawite khiah na khuavar a tleu hnenah kawi tuh i.
4 “Na hiang cingkim khiah khuahlir tulai, sik tu.
Amahte khiah hmunkhat in tai ai, na hnenah kawi i.
Na fapa te khiah a hla ngai in hleng tuhai,
Na fenute khiah na hiang ah hnawitul tuh i.
5 Ciafangin nangmah in hmu tuhai hmai na zaal tuh ngai i.
Na thinlung khiah anghnak thawn dim tuh i.
Tipui songai umhnak thil tamngai khiah na hnenah kawih tuh i.
Gentile mite naihhnak thil khiah na hnenah kawih tuh i.
6 Kala-uk tam rauh thawn na ram khiah dim tuh i.
Kala-uk niu te khiah Midian le Ephah le
Sheba ai a veksen kawmin kawi tuh ai;
Amahte in sui le rimhmui kawih tuh i.
Amahte in Bawipa khiah cuan tuh i.
7 Kedar ai tu le me te khai na hnenah
hmunkhat in khawm tuh sio i.
Nebaioth ai tu cang te in na naper sah tuh i.
Amahte khiah i awlta vumah hlu tuhin saang tuh i.
I thangphathnak inn khiah thangphat tuh ing.
8 Mairo bang ai zuangtu hete khiah aisu i?
A riak hmun ah zuangtu khuro bang khiah aisu i?
9 Tikulh te in i hak tuh rori i.
Tarshish ai timbawte khiah hleng hmasa tuh i.
Cia timbawte in ning fapate khiah ram hla ngai in kawih tuh i.
Bawipa ning Pathian hming le Israel mite
a Cianghlim Pa hnenah amahte ngun le sui kawm in kawi tuh i.
Ziangmanti fangin Bawipa in thang ning phat zo i.
10 Ram dang mite fate in na sen na sa sah tuh i.
Amahte kumpibawite in na naper sah tuh i.
Ziangmanti fangin thin i raw manin na beng i.
Ikhalselai nangmah khiah zar na to manin ngaih na har ing.
11 Ciamanin na kawl dawng khiah a catlo in hong tuh i.
Sun le zan in khai dawngkham tuh lo i.
Mite in Gentile mite thilri khiah na kawih sah tuh i.
Ciate khiah kumpibawite in konghoi tuh i.
12 Ziangmanti fangin na na per nuam lo
mi phun hmuahhmuah le kumpibawite khiah rall tuh i.
Cia mi phunte khiah a vuva in hnawm tuh sio i.
13 Lebanon thangphathnak khiah na hnenah hleng tuh i.
Farthing le thing phun dangte kawmin
i temple khiah mawi ruai tuh i.
I ke fot hmun khiah mawi ruai tuh rauh ing.
14 Rimsu na pe tute fate khai kawi tuhai
lu ut in na bia tuh i.
Nau na tat tu te khai na ke ah bok tuh i.
Amahte in nangmah khiah Bawipa Khuapui,
Israel mite a Cianghlim Pa ai Zion ti in na ko tuh i.
15 Nangmah khiah na zam ai na hua awng manin,
aisu khai na songin vak awng rih lo napui ai,
nangmah khiah kumzangza in
a pha rauh in na bawn tuh ing.
Minung san tamngai te ang hmun tuh in na bawn tuh ing.
16 Gentile mite hnawi khiah a kaang lio in ding sah tuh i si.
Kumpibawite hnawi khiah sut sah tuh i si.
Bawipa kaimah khiah na Otu, na Luangtlantu,
Jacob Pathian ing ti khiah ling tuh i si.
17 Dar tahin sui na kawih sah tuh ing.
Thir tahin ngun na kawih sah tuh ing.
Thingtum tahin dar na kawih sah tuh ing.
Lungto tahin thir na kawih sah tuh ing.
Remhnak khiah na bawite i tuh i.
Dikcanghnak khiah na uktute i tuh i.
18 Na ram songah tawngdunhnak khiah
za tuh nawn lo i hang.
Na ram songah thil ru dun le hnophnak khai
um tuh lo i hang.
Ikhalselai na sente khiah Ohnak ti in ko tuh i si.
Na kawldawngkham khiah Cuanhnak ti in ko tuh i si.
19 Sun in varhnak na pe tu khai ni i tuh nawn lo i.
Cen a tleu na pe tu khai hla var i tuh nawn lo i.
Ikhalselai Bawipa khiah kumzangza in na khuavar i tuh i.
Na Pathian khiah na thangphathnak i tuh i.
20 Na ni khai tla tuh nawn lo i.
Na hla khai pai tuh nawn lo i.
Ziangmanti fangin Bawipa khiah kumzangza in
na khuavar i tuh i.
Lungsia ai na kap nia khiah bo tuh i.
21 Na minungte khai dikcang tuh i.
Na ram khiah kumzangza in co tuh i.
Kaimah khiah thang i phat thai in
Amahte khiah i birhnak thingkak te i.
I kut ai bawnhnak te i.
22 A cik niu pakhat khiah thawngkhat cang tuh i.
A cik niu pakhat khiah mi phun lian ngai cang tuh i.
Bawipa kaimah in a cu fangin ngaihhar in khim ruai tuh ing.