1 Bawipa in,
“I mahnak na nuu mahnak lai khiah akonah i?
Aisu i baa hnak mi hnenah kaimah in na zuar ing?
Ningmah sualhnak ca in ningmah veve zuar zo i si.
Ning sualhnak manin ning nuu khiah ma zo i.
2 Zaimanin i kawi fangin aisu khai um lo i?
Zaimanin i ko fangin aisu in khai i awi lo i?
I kut khiah com manin aisu khai luat ruai ben lo ing?
Luat ruai benhnak tuh huthawm nai lo ing?
Kaimah in tipui khiah hau fangin kaang lio i.
Runti te khiah nelrawn ah cang ruai lio ing.
Ti um lo manin ti song ai nga te khiah uih berh i.
Tihaal in thi berh i.
3 Kaimah in van khiah a hang thawn khuk ing.
Amahte khiah vaidip thawn khuk ing.”ti in rel i.
4 A cawlte khiah khiah pon thiam thai in
Bawipa Pathian in fimhnak ponka i pe i.
Zing khat hnua zing khat i phawr tio i.
Mifim bangin za thai in i bil i phawr sah i.
5 Bawipa Pathian in i bil khiah i hong sah fangin,
Thinraw in tawng lo ing.
Tlan khai tlan lo ing.
6 I vit tute khiah i zaang lam piah ing.
I kahmul i phai sah tute khiah
i biang khai pe ing.
Zauh i suam tu le cil i thuih tute hnenin
i hmai khiah thup lo ing.
7 Ziangmanti Bawipa Pathian in i bawm tuh i.
Ciamanin hmai i sia tuh lo i.
Ciamanin i hmai khiah lungto bangin cang ruai tuh ing.
Zak i thi tuh lo i ti khiah ling ing.
8 I luat ruai tu khiah i hiang ah um i.
Aisu in mawh i hluk tuh i?
Hmaiton in sik dun nga sing.
I zuartu khiah aisu i?
I nong ah kawi tu seh.
9 Bawipa Pathian in i bawm tuh i.
Aisu in i cawh tuh i?
Amahte khiah angki hlun bangin tar tuh i.
Amahte khiah pelep in ei tuh sek i.
10 Ningte lakah aisu in Bawipa khiah kih i si?
Aisu in a Hnenum aw khiah ngai pa?
Khuathim lakah vak in maivar nai lo aisu um i?
Amah in Bawipa hming khiah rinsan tu selai,
A Pathian khiah rinsan tu seh.
11 Maifar khiah var ai maifar sin tu ningte khiah,
Ning veksenin ning maifar varhnak thawn vak tuu-ih.
I kut in he khiah ngah tuh i si:
Thin ur rauh in tal tuh i si.