Isaiah 49

<<  ISAIAH 49  >>

1  Aw tikulhte, i ngai tuu-ih.
Ram hla ngai ai mite, i ngai tuu-ih.
I nuu pum songai panin Bawipa in i ko i.
I nuu pum songin i hming khiah
amah in rel zo i.

2 Amah in i kaa khiah vangsau bangin bawn zo i.
A kut songah i thup zo i.
Amah in conkiang i bawt zo i.
Amah in conkiang dip songah i thup i.

3 Amah in i hnenah,
“Aw Israel, nangmah khiah i hnenum i si.
Na songin thangphathnak ngah tuh ing.”ti in i rel i.

4 Ciafangin kai in, “I naperhnak khiah a lovang i.
I tha khiah a lovang in hmang ing.
Ikhalselai i hlawhthap khiah Bawipa hnenah um i.
I naperhnak khiah Pathian hnenah um i.”ti in ti ing.

5 Tunin Israel khiah amah hnenah khawm leh thill thai in
Amah hnenah Jacob kawih leh tuhin
i nuu pum songin a Hnenum tuhai i bawntu Bawipa in,
(Ziangmanti fangin kaimah khiah Bawipa hmai ah
thangphat ngai tuh ing. I Pathian khiah i tha i tuh i.)

6 Amah in, “Jacob hinte tung leh tuhin le i him ruaihnak
Israel mite lang leh tuh khiah na ca ah a cik ze i.
Ciamanin Gentile mite ca ah Khuavar in na bawn tuh ing.
Ciafangin laivum a tongtian in i nun o tu i tuh i si.”ti in i ti i.

7  Israel mite Luangtlantu,
Amahte lakai a Cianghlim Pa, Bawipa in,
Mite ai nautathnak,
Mi phunte ai huahnak
Mi-ukte hnenum hnenah,
“Kumpibawite in hmu tuhai tho tuh i.
Mi-uktute in khai bia tuh i.
Ziangmanti fangin, a rinsan tlak Bawipa,
Israel mite a Cianghlim Pa in,
Nangmah khiah na ril zo i.”ti in ti i.

8  Bawipa in,
“A cuu teng in ning ngai sah ing.
Ohnak nia ah ning bawm ing.
Ningte khiah thukham bangin mite hnenah ning pe tuh ing.
Laivum khiah ningte in rem leh tuhin le
Zai khai um lohmun ram amahte ro khiah co ruai leh tuh in
ning him ruai tuh ing.

9  Ciafangin ningte in thawngtla te hnenah,
‘Feh tuu-ih.’ ti tuhai, khuathim songai umte hnenah,
‘Suak tuu-ih.’ti in rel tuh i si.
Amahte in lam hiang cang ah rong ei tuhai,
Zai um lohmun mual sang a veksen vumah
hampa um tuh i.

10 Amahte khiah rikam le tihaal tuh nawn lo i.
Khuasa le nisa in kang tuh lo i.
Ziangmanti fangin a ngaihhar tu Pa in
amahte khiah konghoi tuh i.
Cirhti hiang ah amah in kawih tuh i.

11 I mualtlang vum cang ah lampui bawn tuh ing.
I lamcehpui khiah sang ruai tuh ing.

12 Amahte khiah a hla ngai in hleng tuh i.
Sik tu. Saklam le nitla hmunlam in hleng tu le
Sinim ramai hleng tute.

13 Vancungte, lasa tuu-ih.
Aw laivumte, ang tuu-ih.
Aw mualtlangte, lasa in au tuu-ih.
Ziangmanti fangin Bawipa in a minungte
thinnuam ruai i hang.
A rimsute vumah ngaihhar tuh i.

14 Ikhalselai Zion in,
“Bawipa in i zam lio i.
I Bawipa in i hai lio i.”ti in ti i.

15 Nau nuu in a hnawifawptu nau khiah hai thill tuh im?
A pum songai a fapa khiah ninghio tuh lo im?
Amahte in hai khal selai,
Kai ngawn na hai tuh lo ing.

16 Sik tu. i kut songah na ngan zo ing.
Na sen khiah a catlo in i hmai ah um i.

17 Na fapate in a rang in tlan tuh i.
Na hnawmcantute le zai khai taang lo ai
na dah tute khiah na hnenin tlan tuh i.

18 Na mit thawn khuahlir tulai, na hiang cingkim sik tu.
Hete khiah hmunkhat in tai ai na hnenah kawi i.
Bawipa in, “I nung song hmuah in,
amahte khiah pon bangin sil tuh ai,
monu bang in amahte khiah
khi bangin awr tuh i si.

19 Ziangmanti fangin, a hnawmsio le zaikhai um lohmun te le
Ning hnawm hmun ram khiah,
minung um tuhin cik ze tuh i.
Ning ei awng tute khai a hla ngai ah um tuh i.

20 Ning fate thi hnua ai ning nai lehhnak fate in,
ning naa songah, ‘He hmun heh i ca ah cik ze i.
I umhmun tuh i pe tu.”ti in ning ti tuh i.

21 Ciafangin ning thin songin, ‘Hete khiah aisu song in
te i pa? I fate khiah thi sio manin lung leng ngai in
thawngtla hmun ah heta le khiata ah vak hnelhno ing.
Hete tu aisu in kawih i pa?
Kaimah lek ai i hlum awng i.
Hete tu akon in hleng i pa?’ti in ti tuh i si.” tin rel i.

22 Bawipa Pathian in,
Sik tuu-ih. Mi phunte hnenah thukham kongin
i kut tung tuh ing.
Mite ca in i lan tar ing.
Ning fapate khiah amahte kut in cawi tuh i.
Ning fenute khiah amahte kodar vumah phur tuh i.

23 Kumpibawite khiah ning paa khattate cang tuh i.
Kumpibawinute in ning hnawitultu cang tuh i.
Amahte in ning hmai ah laipua sik in bok tuh i.
Ning ke ai laivut khiah ning liak sah tuh i.
Ciafangin ningte in kaimah khiah Bawipa i,
ti ling tuh i si.
Ziangmanti fangin, i iang tute khiah zakthi tuh lo i.”
ti in rel i.

24 A rokhnak thilri khiah raalkapte hnenin
lang sah leh thill tuh im?
A dikcang thawngtlate khiah luat ruai thill leh tuh im?

25 Ikhalselai Bawipa in,
“Raalkapte ai pomhnak thawngtlate khai lang sah tuh i.
Cen mi puarte ai rokhnak thilri khai lang sah leh tuh i.
Ziangmanti fangin na tawng tu khiah tawng tuh ing.
Ning fate khiah ning o sah tuh ing.

26 Ning nemh tute khiah amahte sa lala ei ruai tuh ing.
Cen amahte thi lala khiah capittizu hlum bangin ding tuh i.
Minung hmuahhmuah in kaimah khiah ning Otu le
ning Luangtlantu le Jacob Bawipa Pathian i ti in
ling tuh i.” ti in ti i.

<<  ISAIAH 49  >>