1 Bel in a lu ut i. Nebo khai ut i.
Amahte milim zuk khiah siphuh le
kawlpawte vumah phur i.
Ning kawlpawleng te khai thilrit ngai i.
A cawl te ca ah thilrit rauh i.
2 Amahte khiah a ut in vak tlang i.
Amahte in a thilrit khiah phur ben lo i.
Ikhalselai amahte khiah raalte in pom sek i.
3 Jacob songkhatte le
Israel mite a taanghnak ning veksen in,
i ngai tuu-ih.
Ning te pah in ning cawi ing.
Ning nuu pum songai panin ning phur ing.
4 Ning tar hnua rinin kaimah khiah amah ing.
Ning puak par tianin ning phur tuh ing.
Kaimah in ning bawn zo ing. Ning phur tuh ing.
Ning cawm tuh ing. Ning o tuh ing.
5 Aisu thawn i teh tuh i si?
Aisu thawn i bang tuh i?
6 Amahte in a dip songin sui khiah khawlh ai,
Ngun khiah zazu in teh i.
Sui pumsu pa khiah zawng ai,
amah in pathian bawn i.
Amahte in cia hmai ah bok ai bia i.
7 Amahte in cia milim khiah a kodar ah tauh ai phur i.
A umhmun tuhah tauh ah ciata ah um i.
Ciata in cia milim khiah thawn tuh lo i.
A hnenah kap rin in cia milim in
amah khiah a rimsu hnak songin o ben lo i.
8 He khiah hih in pasalpui bangin um tuu-ih.
He khiah hih tu, ning misualte.
9 Hlanlai ai thute khiah hih leh tuu-ih.
Ziangmanti fangin, kaimah khiah Pathian ing.
A dang Pathian um lo i.
Kaimah khiah Pathian ing. I bang um lo i.
10 Kai bangin, a ngom ai panin a bo tian,
Hlanlai in thilte khiah a bawn rin bawn hlanah,
‘I relhnak bang in khim tuh i.
I nuamhnak hmuah a veksenin bawn tuh ing.’
ti in rel thiam tu um lo i.
11 Nisuak hmunlam in mudokka khiah ko ing.
Ram hla ngai in i relhnak bawn tuhin mi pakhat ko ing.
Kaimah in rel zo ing.
I rel bangin khim ruai tuh ing.
Bawn tuhin tum zo ing.
Ciamanin bawn tuh ing.
12 Ning thinruh mite, i ngai tuu-ih.
Dikcanghnak thawn ning hla ngai i.
13 I dikcanghnak khiah a nong ah kawih ing.
A hla ngai ah um tuh lo i.
I ohnak khiah hnuakfual tuh lo i.
I thangphathnak Israel mite ca in,
Ohnak khiah Zion ah haih tuh ing.