1 Bawipa in a rilhnak Cyrus khiah,
A kiahhan kut in awh ai,
Amah in a hmai ai mi phunte khiah neh tuhai
Kumpibawite raal thilthuam khiah hawk sah tuh le
A hmai ai dawngkham kham nih hong tuhin le
cia dawngkham khiah kham tuh lo in,
a rilhnak Cyrus hnenah,
2 “Na hmai ah feh ngangkhaw,
Lam kingkawnte khiah cang ruai tuh ing.
Dar thawn sahnak dawngkham te khiah
nawi lio in seu tuh ing.
Thir khuamte khiah cem tuh sio ing.
3 Khuathim songai hlawnthilte khiah na pe tuh ing.
A thuphmun ai thilri thuphnak na pe tuh ing.
Ciafangin nangmah in,
na hming ai na ko tu pa Bawipa kaimah khiah,
Israel mite Pathian i, ti in ling tuh i si.
4 Ziangmanti fangin i hnenum Jacob le
I rilhnak Israel ca in,
Na hming in na ko ai,
Nangmah in i ling napui lo ai hming na sa ing.
5 Kaimah khiah Bawipa ing. A dang Bawipa um lo i.
Kaimah lo a dang Pathian um lo i.
Nangmah in i ling napui lo ai
Na kho ruai tuh ing.
6 Ciafangin nisuak hmun lamai panin
nitla hmunlam tian in amahte in
kaimah lo a dang um lo khiah ling tuh i.
Kaimah khiah Bawipa ing. Kaimah lo a dang Bawipa um lo i.
7 Kaimah in khuavar le khuathim bawn ing.
Nunnuamhnak le rimsuhnak khai kaimah in bawn ing.
Bawipa kaimah in hete khiah bawn liang ing.”ti in rel i
8 Ning vancung te, a vumin ruahsi ruai tuu-ih.
Van in dikcanghnak khiah sii tu bial seh.
Laipua in hong tu seh.
Amahte in ohnak khiah kawih tu seh.
Dikcanghnak khiah hmunkhat in po tu seh.
Bawipa kaimah in bawn zo ing.
9 A Bawntu pa tawng tu pa vumah rimsuhnak um tu seh.
Laibel khoihnak pakhat niu in laibel khiah tawng tu seh.
Laisawr in a bawn tu pa hnenah,
“Zai bawn i si?”ti in zawt ngai im?
Na bawnhnak thil in, “Amah in kut nai awm?” ti in ti ngai im?
10 A paa hnenah, “Zai bang fa nai i pa si?” ti tu le
a nuu hnenah, “Zai bang fa te ruai i si?”
ti tu fa vumah rimsuhnak hleng tu selaw.
11 Israel bawntu le Israel mi te Cianghlim Pa,
Bawipa in, “I fapate vumah hleng tuhhnak
thu i zawt tu. I kut ai bawn tuhhnak khiah i ruai tu.
12 Kaimah in laivum bawn zo ai
A vumah minung bawn ing.
I kut in vacungte khiah tar zo ai
amahte arsi khiah a veksenin thu pe zo ing.
13 Amah khiah dikcanghnak thawn khang ruai zo ing.
Amah khiah kong hoi tuh ing.
Hlawhtham le lehsawng pe kul lo in
Amah in i khuapui khiah sa tuhai,
Raalte ai pomhnak i minungte khiah hlat tuh i.”
ti in vancung mite Bawipa in rel i.
14 “Izip mite perhnak le
Cush te dawr thilri le
Mi dung sang Sabean mite thilri khiah
Na hnenah hleng tuhai
nangmah ai cang tuh i.
Amahte khiah na hnua in thilri thawn
hen in hleng tuh i.
Amahte in na hmai ah lu ut tuhai,
‘Pathian khiah ning songah um i.
A dang Pathian um lo i.’
ti in ninghio ning ngen tuh i.”
ti in Bawipa in rel i.
15 A ngaingai in nangmah khiah a thup ai umtu
Pathian i si, aw Israel mite Pathian, Nun Otu.
16 Milim zuk bawntute khiah a veksenin zakthi in hmaisia tuh i.
Amahte khiah am tuh i.
17 Ikhalselai Israel mite khiah Bawipa in kumzangza in o tuh i.
Kumzangza in zak thi le hmaisia in um tuh lo i si.
18 Ziangmanti fangin vancungte bawntu,
Laivum bawntu
Laivum khiah kho ruai tu
Laivum khiah a lovang in bawn lo ai
minungte ai hluh tuhin bawntu, Pathian Bawipa in,
“Kaimah khiah Bawipa ing.
Kaimah lo a dang Bawipa um lo i.
19 Laivum khua thim lakah a thupniu in rel lo ing.
Jacob fate hnenah, ‘A lovang in i si tuu-ih.’ ti lo ing.
Bawipa kaimah in a dikcang thu lek pong ing.
A hman thu lek rel ing.
20 Mi ram songai suak ngah tu ningte,
Khawm in kawi tuu-ih.
Hmunkhat in a nongah kawi tuu-ih.
Thing milim zuk phur tute le
Aisu khai o ben thai lo pathian hnenah
sawngen tute khiah fimhnak nai lo i.
21 Ning thu khiah kawih in rel tuu-ih.
Amahte in hmunkhat in thusawm tlang tu seh.
Aisu in he thu khiah a hlanlai in rel awng zo i?
Cia lai ai panin aisu in rel awng i?
Bawipa kaimah in rel lo ing?
Kaimah lo a dang Pathian um lo i.
A hman Pathian le nun Otu,
Kaimah lo a dang um lo i.
22 Laivum mi hmuahhmuah in,
i sik tu i lai, ohnak ngah tuh i si.
Ziangmanti fangin kaimah khiah Pathian ing.
A dang Pathian um lo i.
23 Kaimah in cukcam zo ing.
I kaa songin i pon khiah dikcang ngai in
suak zo i. Let leh tuh lo i.
Aisu hmuahhmuah in i hmai ah khukhlep tuh i.
Kaa hmuahhmuah in thukham tuh i.
24 Amah in, ‘A ngaingai in Bawipa songah dikcanghnak
le tha nai ing. Amah hnenah mite kawi tuh i.
Amah lakah raw tute khiah zakthi tuh i.’ti in rel tuh i.”
ti in Bawipa in rel i.
25 Bawipa songah Israel fate khiah dikcang in
tawk tuhai ang tuh i.