1 Ikhalselai aw Jacob i hnenum, I rilhnak Israel, i ngai tuu-ih.
2 Na bawn tu, na nuu pum songin na bawn tu,
na bawmtu Bawipa in, “I hnenum aw Jacob,
lau mah. Cen nang i rilhnak Jeshurun, lau mah.
3 Ziangmanti fangin tihaal tute vumah ti burh tuh ing.
Lai ro vumah tilawi tlung ruai tuh ing.
Na tesin fate vumah i Rauhla burh tuh ing.
Na fate vumah i hmuifu bur tuh ing.
4 Ti hiang ai nempan bangin,
amahte khiah hampa kualak ah po tuh i.
5 Pakhat pa in, ‘Kaimah khiah Bawipa minung ing.’ti tuh i.
Pakhat in amah veve khiah Jacob hming in ko tuh i.
A dang pakhat in a kut thawn, ‘Bawipa ai minung.’ ti in ngan tuh i.
Amah veve khiah Israel hming in ko tuh i.
6 Israel Kumpibawi, Israel luangtlan tu, vancung mite
Bawipa, Bawipa in, ‘Kaimah khiah a hmasaber le a hnuataber ing.
Kaimah lo a dang Pathian um lo i.
7 Kaimah bang aisu um i? Um lekhaw, suak in hmuh tu seh.
Hlanlai ai minungte i bawn khelleh ai a canghnak hmuah i hmai ah rel tu seh.
A hleng tuh lai thilte khai amahte hnenah hmuh tu seh.
8 Lau mah ih. Kih mah ih.
Cialai in ning rel zo lo ing? Ning hmuh zo lo ing?
Ningte khiah i tetti i si.
Kaimah lo a dang Pathian um im?
A dang Lungpui um lo i.
Um lekhaw ling lo ing.’ti in ti i.”ti in rel i.
9 Milim zuk bawn tuhte khiah a veksen in a lovang i.
Amah te ai a mankhung ngai thilte in miat ruai tuh lo i.
Amahte khiah amahte tetti i.
Amahte in hmu khai hmu lo ling khai ling lo.
Ciamanin zakthi khai hal lo i.
10 Zai khai hnempui ruai lo pathian le milim zuk
khiah aisu in bawn tuh i?
11 A rualpuite khai zakthi tuh rori i.
Ciabang napertute khiah minung menma i.
Amahte khiah hmunkhat in ding tlang tu seh.
Inapui amahte khiah lau tuh i.
Hmunkhat in zakthi tlang tuh i.
12 Pumsu tu pa in maihol lakah thirfung thawn naper i.
Haibul thawn seu ai rem i.
A banpui tha thawn per i.
Ciafangin rikam ai ani khai cawl i.
Amah in ti ding lo manin bang i.
13 Lettamapa in a pidan thawn teh i.
Miphio thawn rin i.
Zibaw thawn mam ruai i.
Kompas thawn a zuk suai i.
Inn songah bia tuhin dah tuhin,
a mawi ngai minung bangin, minung zuk bawn i.
14 Amah in sida thing khiah vawng i.
Saipres thing le hlim thing khai lang i.
Tupui songai thing te lakah po ruai i.
Amah in farthing khai bir ai ruah ti in khaang ruai i.
15 Ciafangin cia thing khiah mite in tai tuh i.
A hrekkhat khiah amah in lang tuhai
amah khiah khualum ruai tuh i.
Cia thing thawn mai sem tuhai rong suang tuh i.
Cen cia thing khiah pathian ah bawn ai amah in bia i.
Amah in cia thing khiah milim ah bawn ai
a hmai ah bok in bia i.
16 Cia thing a hrek khiah mai ah tih i.
Cia mai thawn rong suang i.
A vumah sa em ai ei le rongkham i.
Cia mai khiah aai ai, “Khua i lum hang.
Miko hmu zo ing.”ti in ti i.
17 Cia a valhnak thing khiah pathian ah bawn i.
Milim zuk ah bawn i.
A hmai ah bok in bia i.
Cia milim zuk hnenah, “Nangmah khiah i pathian i si.
Ciamanin i o tu.”ti in sawngen i.
18 Amahte in ling bul lo i.
Ziangmanti fangin amah in amahte mit khiah
hup manin amahte in hmu thill lo i.
Amahte thinlung khiah khuk sah manin
amahte in ling thill lo i.
19 Ikhalselai aisu in khai a thin songin,
“He thing a hrekkhat khiah mai ah tih ing.
A maihol vumah rong suang ing.
Sa khai em ai ei zo ing.
Ciamanin a taanghnak thing khiah
ningdul kul ah bawn tuh ing?
thing tum hmai ah bok in bia tuh ing?”ti in
ruat hal tu um lo i. Ciatih in ling hal tu khai um lo i.
20 Amah in vutkuang khiah ei i.
A zawlhnak thinlung in amah khiah lamkhelh ruai i.
A rauhla khiah amah in o ben lo i.
Cen, “He i kiahhan lamai thing khiah thudon pui i lo im?”
ti in khai pong thiam lo i.
21 Aw Jacob, aw i hnenum Israel, hete khiah hih tu.
Kaimah in ning bawnhnak i. I hnenum i si.
Aw Israel, ning hai tuh lo ing.
22 Mairo sah pui bang ning mawhhnak khiah phiat zo ing.
Mairo bang ning sualhnak khiah phiat zo ing.
Ning tlan zo ing. Ciamanin i hnenah letleh tuu-ih.
23 Aw vancungte, lasa tuu-ih.
Ziangmanti fangin Bawipa in bawn zo i.
Lai hnia te, au tuu-ih.
Mualtlangte, lasa tu lianglo i.
Tupui le a songai thing te lasa tuu-ih.
Ziangmanti fangin Bawipa in Jacob khiah luangtlan zo i.
Israel lakah amah veve thangphat zo i.
24 Na luangtlan tu le na nuu pum songai
na bawntu Bawipa in,
“Kaimah khiah Bawipa ing.
Zai hmuahhmuah kaimah in bawnhnak i.
Kaimah lekniu in vancungte khiah tar ing.
Kaimah lekniu in laivum khiah pharh ing.
25 Thudon reltu te hnikhnaihhnak khiah hnawm sah tu ing.
Tlahsantue khiah raw ruai ing.
Mifim te khiah voi ruai ing.
Amahte fimhnak khiah voihnak ah can sah ing.
26 A hnenum relhnak thu khiah khim ruai ing.
A nalaangte thurelhnak bang in bawt sah ing.
Jersalem khua hnenah, ‘Na hluh leh tuh i.’ti in rel tu ing.
Judah ramai khuate hnenah, ‘Ning sa leh tuh i.’ ti in rel tu ing.
A hnawm hmunte khiah sa leh tuh ing.
27 Tipui hnenah, ‘Kaang tu lio. Na runti khiah
kaang ruai tuh lio ing.’ti in rel ing.
28 Cyrus thu khiah, ‘Amah khiah i tute khaltu i.
Amah in i daihhnak bangin per tuh i.’ti in rel ing.
Amah in Jerusalem hnenah, “Na sa leh tuh i.” ti in rel ai,
Temple hnenah, “Na ham khiah sa leh tuh i.”ti in rel i.”
ti in Bawipa in rel i.