1 Aw tikulhte, i hmai ah dapthen in um tuu-ih.
Mi phun hmuahhmuah in amahte tha khiah
kho ruai leh tu seh.
Amahte khiah a nong ah kawi in a thu rel tu seh.
Thukhan hmunah a nong in kawi tlang nga sing.
2 Aisu in nisuah lamin a dikcang mi pakhat tho ruai i?
Aisu in a naper sah tuh in ko i?
A hlan ai mite khiah aisu in amah khiah pe i?
Aisu in kumpibawite khiah uk ruai i?
A vangsau hnenah aisu in amahte khiah laivut bang in pe i.
Aisu in a kahpuk hnenah hlivua ai hmuthnak fangkung bang in pe i?
3 Aisu in amahte khiah hnawh ai, amah ke thawn
vak awng lo hmun lampui ah a him niu in khel i?
4 He khiah aisu in bawn panai a ben tian in bawn i?
A ngom ai panin mi phun hmuahhmuah ko i.
Bawipa, kaimah khiah a hmasaber ing.
Cen a hnuakhmunber khai kaimah ing.
5 Tikulh te in hmu ai lau i.
Laivum a tong tianin kih i.
Amahte khiah a nongah kawi i.
6 Aisu hmuah in a ompui khiah bawm ai,
a unau hnenah, “Thin kho in um tu.”ti in ti i.
7 Ciamanin lettama pa in sui pumsu tu pa khiah tha pe i.
Haibul thawn mam ruai tu pa in,
Thirtum vumah seu tu pa khiah thinso ruai i.
“Pumsu in a bethnak cu khim i hang.”ti in ti i.
Ciafangin amah in cia milim zuk khiah
tlu thai lo in tluangkhen thawn khen i.
8 “Ikhalselai, Israel ningte khiah i hnenum i si.
I rilh zo hnak Jacob.
I rual Abraham ai tesin fate,
9 Laivum a tong hmunin ning lang ing.
A hla ber ram in ning ko ing.
Ning hnenah, ‘Ningte khiah i hnenum i si.
Kaimah in ning ril zo ai ning lon lo ing.
10 Lau mah ih. Ningmah hnenah kaimah um ing.
Thin hnawm in um mah ih.
Kaimah khiah ning Pathian ing.
Tha ning pe tuh ing.
Ning bawm tuh ing.
A dikcang i kiahhan kut thawn ning do tuh ing.’
ning ti ing.
11 Ning lakah a raw tute khiah,
Zakthi ruai tuh ai hmingsia ruai tuh i.
Amahte khiah zai khai cang tuh lo i.
Ning tawng tute khiah rall tuh i.
12 Ning tawng tute khiah ningte in sii tuhai tawk tuh lo i si.
Ning raal tute khiah zai khai cang tuh lo ai,
a um awng lo thilri bang tuh i.
13 Ziangmanti fangin kaimah Bawipa na Pathian in
Na kiahhan kut in na awh tuh ing.
Ning hnenah, ‘Lau mah ih.
Ning bawm tuh ing.’ning ti ing.
14 Lau mah ih. pangang bang Jacob.
Lau mah ih. Israel minungte.
Ning luangtlan tu, Israel mite ai
a Cianghlim Pa, Bawipa in,
“Ning bawm tuh ing.” ning ti i.
15 “A san ngai a haa nai rong cimu seuhnak
karihza ah ning cang ruai tuh ing.
Ningte in mual pui khiah seu tuhai,
a cikniu ah cang ruai tuh i si.
Tlang te khiah laivut ah cang ruai tuh i si.
16 Amahte khiah khaap tuh i si.
Hlivua in amahte khiah lan tuh sio i.
Khuahu in amahte khiah zaih tuh sio i.
Bawipa lakah ning ang tuh i.
Israel mite ai a Cianghlim Pa lakah
ning ang tuh rauh i.
17 Mi farah le a sam tute in ti sii in um lo fangin,
Tihaal manin a lai khiah ro fangin,
Bawipa kaimah in amahte khiah za tuh ing.
Kaimah Israel Pathian in amah te khiah zaam tuh lo ing.
18 Dapsukso zai um lo hmun mual sangah
runti suak ruai tuh ing.
Nelrawn khiah tikhur ah cang ruai tuh ing.
Lairo khiah cirhti ah cang ruai tuh ing.
19 Nelrawn songah sida thing le akhakhia thing le
myrtle le thau thing bir tuh ing.
Nelrawn songah nempan thing le far thing le
papar thing cing tuh ing.
20 Ciafangin amah te in, he khiah Bawipa kut in bawnhnak le
Israel mite ai a Cianghlim Pa ai bawnhnak i, ti in ling tuh i.
21 Bawipa in, “Ning thu khiah rel tuu-ih.”ning ti i.
Jacob Kumpibawipa in, “Ning el nuamhnak thu
khiah kawih tuu-ih.”ti i.
22 Amahte milim te khiah kawih tu selai,
zai cang tuh kin rel tu seh.
Cen he hlan ai thute khiah kin rel tu selai,
tunin zai cang i hang ti ling nga ing.
Ihlahle, tunhnua ah cang tuhhnak thu kin rel tuu-ih.
23 Hmailam ah khim tuhhnak thute kin rel tu seh.
Ciafangin pathian ti ning ling tuh i ing.
Thin kin hnawm thai in le kin lau thai in
a pha le a pha lo khai bawn tuu-ih.
24 A ngaingai in ningmah khiah zai khai i lo i si.
Ning perhnak na khai a lovang i.
Ning ril tute khai a ningdul kul i.
25 Saklam ramin mi pakhat ril zo ing.
Amah khiah hleng tuh i.
Ni suak hmunlam in amah in i hming ko tuh i.
Amah in uktu bawite khiah nawng bang in tlawh tuh i.
Bel bawntu pa in laisawr tlawh bangin tlawh tuh i.
26 Kinte in ling thai in aisu in he hlanvom in
he thu khiah rel cia i?
Kinte in amah khiah mi dikcang ii, ti in rel tuhin,
a hlanvom in aisu in kin rel pa?
Aisu in khai kin hmuh lo i.
Aisu in khai kin rel lo i.
Aisu in khai na thu khiah na ngai lo i.
27 Zion hnenah, “Sik tu. Amahte khiah khiata ah i.”
ti in a hmasaber in rel ing.
Jerusalem hnenah thupha hlen tu nalaang pe tuh ing.
28 Ziangmanti fangin i sii fangin mi pakhat bang khai tawk lo ing.
Amahte lakah sii ai, amahte thurel thiam tu um lo i.
Amahte khiah i zawt fangin, i sawn thiam tu um lo i.
29 Amahte khai zai khai fai lo i.
Amahte perhnak khiah a lovang i.
Amahte milim zuk khiah a lovang hlivua bang teng i.