1 “I minungte khiah thinnuam ruai tuu-ih.
Thinnuam ruai tuu-ih.”ti in ning Pathian in rel i.
2 “Jerusalem te hnenah thinnuam hnak rel in
Amahte anharhnak khiah bo i hang.
Amahte sualhnak khiah zah zo i.
Ziangmanti fangin Bawipa kut songin
amahte sual manin a let nih in
ngah zo khiah, aw nem niu in rel tu.
3 Nelrawn songin aw pakhat khiah,
“Bawipa lampui khiah sel tuu-ih.
Pathian lamcehpui khiah
Nelrawn songah caang ruai tuu-ih.
4 Rawn thuk hmuahhmuah khiah sang ruai tuh i.
Mual le tlang hmuahhmuah khiah niam ruai tuh i.
A kon hmunte khiah caang ruai tuh i.
A dawh hmunte khiah mam ruai tuh i.
5 Bawipa thangphathnak khiah larruai tuhai
Mi hmuahhmuah in hmunkhat in hmu tlang tuh i.
Ziangmanti Bawipa ka in rel zo i.”ti in au i.
6 Aw pakhat in, “Au tu.”ti in ruai i.
Amah in, “Zai au tuh ing?”ti in zawt i.
“Minung hmuahhmuah khiah hampa bang i.
Amahte khiah lo lai ah paparte bang in mawi i.
7 Hampa khai voi lio ai, papar khai ria lio i.
Ziangmanti fangin Bawipa haihawh khiah
amahte vumah hmut i.
8 Hampa khai voi lio ai paparte khai ria lio i.
Ikhaselai kin Pathian thu tu kumzangza
in taang ngio i. Minungte tu hampa bang i.
9 Thupha hlen tu, nangmah aw Zion khiah,
Mual sang vumah kaai tu.
Thupha hlen tu, nangmah aw Jerusalem khiah,
Aw cawm ngai in au tu.
A cawm ngai in au tu. Lau mah.
Judah te khuate hnenah,
“Sik tu, ning Pathian.”ti in rel tu.
10 Bawipa Pathian khiah huthawm thawn hleng tuh i.
A huthawm lian ngai in amah ca in uk tuh i.
A lehsawng khiah amah thawn um i.
Amah in rul leh tuh i.
11 Tukhal pa bangin a tu te khiah rongpaih tuh i.
Tu fate khiah a kut thawn kuah tuh ai,
a kang ah cawi tuh i.
Tu faniu naite tu khiah a nuamniu in fehpui tuh i.
12 Aisu in ti khiah a kut songah teh awng i?
Aisu in van khiah a kutzapek thawn teh awng i?
Aisu in laivut khiah zazu thawn teh awng i?
Aisu in mualte khiah cuai ah khaai awng i
Aisu in tlangte khiah zazu thawn teh awng i?
13 Aisu in Bawipa Ciang Rauhla khiah konghoi awng i?
Aisu in amah khiah thucuk awng i?
14 Amah in aisu khiah thuzawt awng i?
Aisu in amah khiah zirh awng i?
Thuhman lamah aisu in amah khiah cuk awng i?
Aisu in amah khiah fimhnak zirh awng i?
Aisu in amah khiah linghnak hmuh awng i?
15 Mi phun hmuahhmuah khiah pung songah
far khat bang teng i.
Zazu songah laivut cikniu bang teng i.
Sik tu. Amah in tikulhte khiah a cik niu thil bangin daang i.
16 Lebanon khiah mai in tih tuhin tham lo i.
Cen a ramsate khai mai ai tai ai raithawihnak tuh in tham lo i.
17 A hmai ah mi phun hmuahhmuah khiah zai khai i lo i.
Amah in amahte khiah a lovang zai haih tlak lo
hnak in tlawm sawn in siar i.
18 Ciamanin Pathian khiah aisu thawn santeh tuh i si?
Aisu thawn bangin santeh tuh i si?
19 Milim zuk khiah lettama pa in bawnhnak i.
Pumsutu pa in sui thawn mat i.
Pumsutu pa in ngun khi khiah bawt i.
20 Ciabang hlu ben lo ai farahte in
A hmon thai lo thing pakhat ril i.
Cia pa in letama thiam ngai pakhat khiah sii ai
a vak thiam lo milim zuk khiah bawn ruai i.
21 Ling awng lo i sim?
Za awng lo i sim?
A ngom ai panin ning rel awng lo im?
Laivum pan ngom ai panin ling awng lo i sim?
22 Laivum pum pui vumah totu khiah amah i.
Laivum mite khiah khokhuakte bang i.
Amah in vancung te khiah
dawngkham zarhnak pon bangin tar ai
umhmun tuh buk bangin zaar i.
23 Bawite khiah a lovang cang ruai i.
Laivum ai mi-uk tute khai hnempui
hnak um lo in cang ruai i.
24 Amahte khiah bir sawng le,
cing sawng ai laipua songah
a hnuk hla sawng fangin,
Amah in amahte khiah hmut ai
amahte khiah voi sek i.
25 A Cianghlim Pa in,
“Aisu thawn san i teh tuh i si?
Aisu thawn camra tuh ing?”ti in ti i.
26 Ning mit thawn vancung lamah hlir tuu-ih.
Hete khiah aisu in bawn i?
Amah in van ai arsi te khiah
pakhat hnuan pakhat a hming in ko ai,
a huthawm le a tha thawn amahte khiah
pakhat bang khai pai ruai lo i.
27 Aw Jacob, aw Israel,
Zaimanin, “I lampui khiah Bawipa hnenin thup i.
I Pathian in i thu khiah zai i siar sah lo i.” ti in rel in cam i si?
28 Ling awng lo i sim?
Za awng lo i sim?
Kumzang Pathian, Bawipa khiah
Laivum a tong tian ai Bawntu i.
Amah khiah bang le cawl awng lo i.
A linghnak khiah si man um lo i.
29 Amah in tha naute khiah huthawm pe i.
Tha nai lote khiah tha pe i.
30 Mino te rin bang in cawl tuh i.
Tlangvalte rin bah tuh i.
31 Ikhalselai Bawipa naper sah tute in
amahte tha khiah cak leh tuh i.
Amahte khiah mu bangin ko thawn zuang tuh i.
Amahte in dawp tuhai cawl tuh lo i.
Vak tuh ai bang tuh lo i.