1 Ciafangin Baladan fapa Babylon kumpibawipa Berodach-Baladan in Hezekiah ur ai cak leh khiah za manin, lai le lehsawng te khuat i. 2Ciafangin Hezekiah in amahte khiah a phanniu in sik ai, a inn songah a hlawnthil ngun le sui le rimhmui le a mankhung thaute le a a thilkhawi hmunai raal thilthuamte kawmin a veksenin hmuh sio i. A inn songai le a ram songai a umhnak thil hmuahhmuah a hmuh lohnak pakhat khai um lo in Hezekiah in amahte khiah hmuh sio i.
3 Ciafangin prawfet Isaiah khai Kumpibawipa Hezekiah hnenah kawi ai, “He mite in zai na rel pa? Cen a kon ramin amahte khiah hleng i?”ti in zawt i. Hezekiah in, “Amahte khiah ram hla ngai Babylon in hleng i,”ti in sawn i. 4Ciafangin Isaiah in, “Na inn songah amahte in zai hmu pa?”ti in zawt i. Ciamanin Hezekiah in, “Amahte in inn songai umhnak hmuah a veksen in hmu liang i. I hmuh lohnak hlawnthil pakhat khai um lo i,”ti in sawn i. 5Ciafangin Isaiah in Hezekiah hnenah, “Vancung mite Bawipa thu khiah ngai tu: 6‘Na inn songah umhnak hmuahhmuah le na paa ai tun nia tian khawlhnak hmuahhmuah khiah pakhat khai taang lo in Babylon ah phur tuhhnak nia hleng tuh i lai. 7Cen na songai suakhnak na fapa a hrekkhatte khai amahte in lang tuh ai Babylon kumpibawi inn ah amahte khiah a til ret sa in naper tuh i,’ti in Bawipa in rel i,”ti in rel i. 8Ciafangin Hezekiah in Isaiah hnenah, “Na relhnak Bawipa thu khiah pha i,”ti in sawn i. Ziangmanti fangin Hezekiah in, “I nun song tengteng ah thuhman le remhnak um tuh lo i.”ti in ti i.