1 Sik tuu-ih. I awhhnak i Hnenum.
I lungkhimhnak i Rilhnak Pa.
I Ciang Rauhla khiah a vumah dah zo ing.
Amah in Gentile mite khiah dikcang in thukhan tuh i.
2 Amah in kap tuh lo i. Au khai au tuh lo i.
Lam lakah khai mi za thai in au tuh lo i.
3 A ma nai phaikung khiah ek tuh lo i.
A khu hialho mica khai amah in hmit tuh lo i.
Thuhman thawn amah in thukhan tuh i.
4 Laivum ah amah in a hman in thukhan hlan lo
Amah khiah sung tuh lo i. Tha khai sia tuh lo i.
Tikulhte in amah thukham khiah iang tuh i.
5 Vancungte khiah bawn ai pharhtu,
Laivum khiah pharh ai a song ai umtu mite bawntu,
Laivum minungte khiah haihawh pe ai,
laivum ai vaktu te hnenah nunhnak pe tu,
Pathian Bawipa in,
6 “Bawipa kaimah in dikcang tuhin na ko zo ing.
Na kut na awh tuh ing.
Nangmah khiah kil na khawl tuh ing.
Nangmah khiah mite hnenah thukham bang in na pe tuh ing.
Gentile mite hnenah nangmah khiah khuavar bang i tuh i si.
7 Mitcaw te mit khiah hong sah tuh i si.
Thawngtla te khiah thawnginn songin suah tuh i si.
Thawnginn khuathim songah totute khiah suah tuh i si.
8 Kaimah khiah Bawipa ing. Cia khiah i hming i.
I thangphathnak khiah aisu khai pe tuh lo ing.
Cen i cuanhnak khai milim zukte hnenah pe tuh lo ing.
9 Hlanlai ai thilte khiah khim zo i hang.
Thil thar khiah ning rel ing.
Amahte khiah khim hlanah ning rel zo ing.
10 Tipui hnenah kawi tu le tipui songai umtute,
Ning tikulh le a songai umtu te,
Bawipa hnenah la thar sa tuu-ih.
Laivum tong ai panin a cuanhnak sa tuu-ih.
11 Nelrawn le a song ai khuate in au tu seh.
Kedar te umhmun khuate in au tu seh.
Sela khua ai umtu te in lasa tu seh.
Mual vumin amahte in au tu seh.
12 Amahte in Bawipa khiah thangphat tu seh.
Amahte in tikulh te lakah Pathian khiah cuan tu seh.
13 Bawipa khiah mi bawi pui bangin feh tuh i.
Raalkap pa bangin a zuamhnak khiah tho ruai tuh i.
Amah in aw cawm ngai thawn au tuh i.
A raalte khiah neh tuh i.
14 Pong lo in a rai ngai um i hang ing.
Mer lo in kaimah veve uk ngio ing.
Tun in naukai lak nupui bangin au tuh ing.
Haikik le haihawh dang in um tuh ing.
15 Mual le tlangte khiah a lovang cang ruai tuh ing.
Hampate khiah voi ruai tuh sio ing.
Runti te khiah tikulh ah can tuh ing.
Tikhur khiah ro ruai tuh ing.
16 Kaimah in mitcawte khiah a feh awng lo
lampui in kawih tuh ing.
Amahte ling awng lo lampui in konghoi tuh ing.
Amahte hmai ah khuathim khiah khuavar ruai tuh ing.
A kawn lampui khiah cang ruai tguh ing.
Hete khiah amahte ca in bawt sah tuh ing.
Amahte khiah zaam tuh lo ing.
17 Milim zuk rinsan tu le,
Milim zukte hnenah, “Ningte khiah kin pathian i si.”
ti ai rel tute khiah zakthi ngai in let leh tuh i.
18 Za tuu-ih, nangong te
Sik tu i lai hmu tuu-ih, mit caw te.
I hnenum lo aisu khiah mitcaw i?
I hlathnak i nalang lo aisu khiah nangong i?
Kaimah khiah i rinsan tu lo aisu khiah mitcaw i?
Bawipa hnenum bang in aisu mitcaw i?
20 Thil tam ngai hmu napui ai,
Ling lo i si.
A na khiah hong napui ai,
amah in za lo i.
21 Bawipa khiah a dikcanghnak manin,
a dan upadi khiah thupui le lian ruai tuhin lungkhim bik i.
22 Ikhalselai he mite khiah mite in rokhnak
le a thil ru sahhnak mite i.
Amahte khiah a veksenin kua songah thawngtla i.
Amahte khiah thawnginn songah thawngtla i.
Amahte khiah rek tuhai dahhnak i. Aisu in khai o lo i.
Amahte khiah a thil ru sah napui ai aisu in khai,
Rul leh tuu-ih.”ti lo i.
23 Ning lakah aisu in he thu khiah ngai tuh i si?
A hleng tuh lai tikcu khiah aisu in ngai tuh i?
24 Aisu in Jacob khiah a thilri ru sah tuhin pe i?
Aisu in Israel khiah ruko te hnenah pe i?
Amah lakah kin sual manin, Bawipa in pe i lo im?
Ziangmanti fangin amahte in a lampui khiah hlun nuam lo i.
Cen amahte in a dan upadi khai ngai nuam lo i.
25 Ciamanin amah in amah vumah a thinraw khiah burh i.
Raal tawnghnak thawn burh i.
A hiang cingkim ah mi in kang ai, amah in ling bul lo i.
Amah khiah kang napui ai, ngai cuang lo i.