1 Vancung mite Bawipa, Bawipa in Jerusalem le Judah songin,
Rong le thilri veksen le ti veksen le
2 Mi bawite le raalkapte le
Thukhantute le prawfette le
Tlahsantute le mi upate le
3 Raalkap sawmnga uktu captain le
Mite ai upathnak mi le
Mi thuso tu le thil bawn thiamte le
Thurel thiamte khiah lang sio i.
4 Amahte bawi tuhin naupang pe tuh ing.
Amahte khiah nausen te in uk tuh i.
5 Mite in pakhat le pakhat khiah nemh dun tuh i.
A ompui thawn khai nemh dun tuh i.
Nauta te in upate khiah zainam tuh lo i.
Mi zai fai lo te in mi upathnak mite khiah zauhsuam tuh i.
6 Mi pakhat in a paa inn ai a unau pakhat khiah duk tuh ai,
“Nang in thilthuam nai ii si. Ciamanin kin uk tu.
He hnophnakte khiah nangmah in tavuan lang tu.”
ti in ruai tuh i.
7 Cia nia ah cia pa in,
“Ning harsahnak khiah ning bawl sah thill lo ing.
Ziangmanti fangin kin inn ah rong khai um lo i.
Thilthuam khai um lo i.
Mi te uktu tuh bawi in i bawn mah.” ti in el tuh i.
8 Ziangmanti fangin Jerusalem khiah bah lio i.
Judah khai tlu lio i.
Amahte kaa le amahte bawnhnak in
Bawipa khiah tawng ai Bawipa khiah thintok ruai i.
9 Amahte mithmai in amahte lakah tettikhan i.
Amahte sualhnak khiah Sodom bangin laar ruai ai thup lo i.
Amahte khiah rimsu tu seh.
Ziangmanti fangin amahte vumah a pha lo khiah
amahte in hleng ruai i.
10 Mi dikcang te hnenah,
“Aican mah. Ziangmanti fangin,
amahte naperhnak rong khiah ei tuh i.”
ti in rel tu.
11 Misualte khiah rimsu tu seh.
Amah khiah ur tuh i.
Ziangmanti fangin amahte kut ai perhnak bangin
amahte khiah hlawhtham tuh i.
12 I minungte khiah, naupangte in amahte khiah nemh ai,
Nupuite in amahte khiah uk i.
Aw i minungte! Kong ning hoitute in lam ning khelh ruai i.
Ning lampui khiah ning hmawm sah i.
13 Bawipa khiah thukhan hmun zungah dingai,
Mite thukhan tuhin ding i.
14 Bawipa in a minung lakai upate le a bawite khiah,
“Vuandum khiah ei berh i si.
Mi farahte ning rokhnak thilri khiah
ning inn songah um i.
15 Zai ca in i minungte khiah seu hnelhno i si?
Zai ca in mi farahte hmai khiah nuai hnelhno i si?”
ti in vancung mite Bawipa Pathian in ti i.
16 Ciazolo ah Bawipa in,
“ Zion fenute khiah a hngal ngai in, a hawng khiah
tik kong in vak ai a mit thawn mi en hnelhno i.
Cen amahte in a style ngai in rung liang lo in vak i.
17 Ciamanin Bawipa in Zion fenute lu vumah
hmaihma po ruai tuhai,
amahte khiah lukolh ruai tuh i.” ti in ti i.
18 Cia nia ah Bawipa in amahte thilri: a titiruh ai ngun, a lukhip, a khi, 19a bilvuh, a nguun le a hmaihuphnak pon niu, 20lupawng le titiruh ai awrhnak khi le el ai penhnak pon niu le zihmui palangte le mizawl hnak thilri le 21kutrukte le hnarkua ai thilri le 22puai ai silhnak thilthuam le angki saupui le kawt angki le paisa dip le 23hlalang te le ponthan le lukhuk le angki pua ai silhnak thilthuam khiah long sah tuh sek i.
24 Ciafangin, a hmui tah in a uih um tuh i.
Pon niu tah in rihual;
Sam bor tahin lukolh;
Thuam pha ngai tah in, vaidip;
A mawi hliang tahin zakthi kul um tuh i.
25 Ning minungte khiah vangsau thawn ning rek sah tuh ai,
Ning raalkapte khiah raal in rek tuh i.
26 Zion kawldawngkhamte khiah lungsia in kap tuhai,
Dap sukso in amah in laipua ah to tuh i.