1 Judah le Jerusalem vumah hleng tuhhnak khiah Amoz fapa Isaiah ai relhnak thu.
2 Ni hnuataber lam hleng fangin,
Bawipa temple sa hmun mual khiah
mualtlang a saangber vumah sa tuhai,
tlang hmuahhmmuah tah in saang tuh sawn i.
A song ah mi phun hmuahhmuah lut tuh i.
3 Mi tamngai in, “Bawipa mual vumah hong nga sing.
Zakuk ai Pathian inn ah kawi nga singkhaw,
Amah in a thu kin cuk tuh ai,
Kinte in a lampui ah vak tuh i sing.” ti in rel tuh i.
Ziangmanti fangin Zion in dan upadi khiah suak tuhai,
Jerusalem in Bawipa thu khiah hleng tuh i.
4 Amah in mi phun khat le mi phun khat thu
khiah khan sah tuhai, mi tamngai khiah hau tuh i.
Ciafangin amahte in amahte vangsaute
khiah tuhmui ah bawn tuhai,
Amahte feipui khiah thing hlawrhnak vang ah can tuh i.
Mi phun khat le mi phun khat khiah tawng dun tuh lo ai,
raal tawng dan khai zir tuh lo i hang.
5 Aw Zakuk innkuate, Bawipa pehnak khuavar
songah kawi in vak nga sing.
6 Ziangmanti fangin nangmah in na minung,
Zakuk innkuate khiah amahte in Nisuak hmun lam ai
umtu mite khiah cung manin, zam lio i si.
Amahte in Filistin mite bangin tlahsantute i.
Ram dang mite thawn lungkhim dun i.
7 Amahte ramah tangka le sui khiah a dim in um i.
Amahte hlawnthil khiah a bo nia um lo i.
Cen amahte ramah siphuh khai dim lio in um i.
Amahte siphuh leng khai a tong nia um lo i.
8 Amahte ramah milim zuk khai a dim in um i.
Amahte kut ai bawnhnak khiah amahte in bia i.
Amahte kutzung thawn bawnhnak khiah bia i.
9 Mite in a lut ut ai, mi veksen in thinniam in um i.
Ciamanin amahte khiah sualhlat malaw.
10 Bawipa khiah a laukul ze le a thangphathnak
khiah kumpibawi bangin lian manin,
Lungkua songah lut in, laivut songah relh tu.
11 A hngalte mithmai khiah zakthi ruai tuhai,
Mipuarte khiah lu ut ruai tuh i.
Cia nia ah Bawipa lek upat tuh i.
12 Ziangmanti fangin vancung mite
Bawipa nia khua khiah A hngal le a puar le
mahte veve do hnelhno tute vumah hleng tuhai,
a veksenin niam ruai tuh i.
13 Lebanon ai a saang le amahte veve
do hnelhno lawithing veksen le Bashan ai
hlokhli thing veksen vumah le
14 Mual saang hmuahhmuah vumah le
Amahte veve do hnelhno tlangte vumah le
15 Inn saang ngai hmuahhmuah vumah le
A kho ngai ai renhnak sen hmuahhmuah vumah le
16 Tarshish ai khawm hmuahhmuah vumah
le a mawi ngai khawm zuk hmuahhmuah vumah
hleng tuh i.
17 Mihngalte khiah a lu ut ruai tuhai,
Mipuarte khiah thinniam ruai tuh i.
Cia nia ah Bawipa lek khiah upat tuh i.
18 Ikhalselai amah in milim zukte khiah
hnawmcan tuh berh i.
19 Bawipa khiah a laukul ze le
a thangphathnak khiah kumpibawi bangin lian manin,
Bawipa in laivum khiah hlin dek fangin,
amahte khiah lungkua songah le
khu kua songah lut tuh i.
20 Cia nia ah mite in a bia tuhai tangka le
sui thawn bawnhnak milimte khiah thirfok le
palakte hnenah lon tuhai,
21 Bawipa khiah a laukul ze le a thangphathnak
khiah kumpibawi bangin lian manin,
Bawipa in laivum khiah hlin dek fangin,
amahte khiah lungkua songah le
khu kua songah lut tuh i.
22 Ciabang mi khiah pawl awl tu.
A haihawh khiah a hnar song ah um i le
amah khiah zai siar tuh um i?