1 Israel khiah naupang niu i awng fangin,
amah khiah it ing.
Izip ram in i fapa khiah ko zo ing.
2 Amahte khiah a tam amam in ko fangin,
amahte in i hnenin tlan amam i.
Amahte in Baal te hnenah raithawi ai,
Milim zuk te hmai ah rimhmui tai i.
3 Kaimah in Efraim khiah amahte kut in
awh in lam vak dan cuk ing.
Ikhalselai anite in amahte khiah kaimah in
cak ruai khiah ling lo i.
4 Amahte khiah ithnak ri thawn a nem niu in duk ing.
Amahte hawng ai hak khiah hawk sah ing.
Ut in amahte khiah rong cawm ing.
5 Amah khiah Izip ramah let leh tuh lo i.
Ikhalselai amahte in sir nuam lo manin,
Assiria pa khiah amah kumpibawi i tuh i.
6 Amahte tumhnak bang in bawn manin,
A khuapui te songah vangsau khiah leuh
tuh ai, a ramte khiah ei sah in hnawmcan sah tuh i.
7 I minungte in i hnen in khelleh lamah let tum ngio i.
Amahte in a Sangber Pa ko rinin
Aisu in khai amah khiah thangphat lo i.
8 Akontih in na zam thill tuh ing, aw Efraim?
Akontih in na ap thill tuh ing, aw Israel?
Akontih in Admah bang in na bawn thill tuh ing?
Akontih in Zeboim bang in na cang ruai thill tuh ing?
I songah i thin i tho i.
I ngaihharhnak khiah suak ruai i.
9 I thinraw rauh hnak bangin bawn tuh lo ing.
Efraim khiah hnawmcan leh tuh thio lo ing.
Kaimah khiah Pathian ing. Minung i lo ing.
Ning lakah a Cianghlim Pa ing.
Kihkul rauh in kawi tuh lo ing.
10 Amahte in BAWIPA khiah hlun tuh i.
Amah in chintit bang in huk tuh i.
Amah khiah huk fangin,
A fate khiah nitla hmunlam in a lau ngai in kawi tuh i.
11 Vaniu bang in a lau ngai in Izip ram in kawi tuh i.
Assiria ram in khuro bang in kawi tuh i.
Ciafangin amahte khiah amahte inn ah
um ruai tuh ing.” ti in BAWIPA in rel i.
12 Efraim in thudon i rel i.
Israel mite in i zawl i.
Ikhalselai Judah tu Pathian thawn vakkhat i.
A rinsan tlak a Cianghlim Pa thawn vakkhat i.