1 Aw Israel mite, mi dang te bang in ang mah ih.
Ziangmanti fangin ning Pathian lakah hlotlau in nung i si.
Ning fangcil hmun caang ah phatemah man tham ning daih i.
2 Fangcil hmun le capitti rial hmun te in
amahte khiah rongcawm tuh lo i.
Capittizu thar khai um tuh lo i.
3 Amahte khiah BAWIPA ram ah um tuh lo i.
Ikhalselai Efraim khai Izip ramah let tuh i.
Assiria ram ah a ciang lo rong ei tuh i.
4 Amahte in BAWIPA hnenah
capittizu khiah hlu tuh lo i.
Cen BAWIPA in amahte raithawi hnak
khai lungkhim sah tuh lo i.
Amahte rong khiah mithi kah tu te rong
bang tuh i.
Cia rong ei tu hmuah khiah riim tuh i.
Ziangmanti fangin cia rong khiah amahte
ca lek tuh i.
BAWIPA inn songah kawih tuh lo i.
5 Puai nia ah zai bawn tuh i si?
BAWIPA puai nia ah zai bawn tuh i si?
6 Amahte khiah thi lo in luat rinin
Amahte khiah Izip mite in pom tuh i.
Memphis te in amahte khiah phum tuh i.
Amahte ngun tangka te khiah hampa in
khuk sah tuh i.
Amahte buk ah hling po tuh i.
7 Cawhkuan nia khiah hleng i hang.
Rul leh nia khiah hleng i hang.
Israel in ling tu seh!
Ning sual khiah tam ze manin le
ning raalte khiah tam ze manin,
Profet khiah mivoi ti in ruat tuh ai
dan nai te khiah mi am ti in ruat tuh i.
8 Efraim santari kiltu khiah i Pathian hnenah um i.
Ikhalselai profet pa khiah zaizongza ah
vaniu thangtauh tu pa thang bang i.
Cen a Pathian inn songah huadun hnak lek um i.
9 Amahte khiah Kibeah san lai ai bang in
sual rauh i.
Amah in amahte sual hnak khiah hih sah tuh i.
Amahte sual khiah cawh tuh i.
10 Israel mite khiah hampalak ai capit kuang bang i.
Ning paate khiah thaikung a thai hmasa ber
awng ai thingthai bang in hmu ing.
Ikhalselai amahte in Baal Peor hnenah kawi ai,
amahte veve khiah khia zakthikul hnenah ben i.
Amahte khiah amahte daihhnak thil bang in
ningdulkul minung cang i.
11 Efraim thangphathnak khiah vaniu bangin
zuang tuh teu i.
Aisu khai te tuh lo i.
Aisu in khai naupaai tuh lo i.
Aisu khai raiki tuh lo i.
12 Amahte in nau cawi rinin
pakhat khai taang lo in lang sah tuh ing.
Amahte hnenin i tlan fangin,
amahte khiah rimsu tuh i.
13 Efraim khiah Tyre bangin
a mawi hmun ramah bir hnak inapui i.
Ikhalselai Efraim in a fate khiah
mi rektu pa hnenah kawih tuh i.
14 Aw Pathian, amahte khiah pe tu.
Amahte khiah zai pe nga si?
Amahte nau khiah keh ruai tu.
Amahte hnawiti khiah kaang ruai tu.
15 Amahte sualhnak khiah Kilkal ah i.
Ciata ah amahte khiah hua ing.
Amahte bawn sualhnak manin,
I inn in amahte khiah hnawt tuh ing.
Amahte khiah it tuh nawn lo ing.
Amahte bawi khiah a veksen in
mitawng thai cio pawl i.
16 Efraim khiah voi lio i.
A hnukte khai ro sek i.
Amahte in thai nai tuh lo i.
Amahte in naupaai pang selai,
amahte pum songai a ithnak thai khiah
rek sah tuh ing.
17 Amahte in Pathian khiah a thu ngai lo manin,
I Pathian in amahte khiah lon tuh sek i.
Ciafangin amahte khiah ram caang ah vai tuh sek i.