Elijah thuanthu
1Kilead ram ai umtu Tishbe mite pakhat Elijah in Ahab hnenah, “A hmai ah i dinghnak Bawipa Israel Pathian nung song bang in, i thu lo in, kum thum song naidawh le ruah si tuh lo i.”ti in ti i. 2Ciafangin Bawipa thu khiah a hnenah hleng ai, 3“Heta in tlan tu teu lai, nisuak hmunlam ah fehin, Jordan run songah a ti luanghnak Cherith Rawn ah feh tulai, 4cia rawn ti khiah ding in langaakte in rong na cawm ruai zo ing.”ti in rel i. 5Ciamanin Elijah khai Bawipa thu bangin feh ai, Jordan run songah a ti luanghnak Cerith Rawn hiang ah um i. 6Langaakte in pawnghmuk le sa khiah zing in kawih sah ai pawnghmk le sa khiah zanlam fang in kawih sah i. Rawn songai ti ding i. 7Zaicam lo fangin rawn khai tikaang lio i. Ziangmanti fangin cia ramah ruah si tau lo i.
Elijah le hmaitong nuu
8Ciafangin Bawipa thu khiah Elijah hnenah hleng ai, 9Tho tu lai Sidon te khua Zarephath ah feh tulai, ciata ah um tu. Ciata ah hmaitong nuu in na cawm ruai zo ing.”ti in rel i. 10Ciamanin ani khai tho ai Zarephath ah kawi i. Cia khua kawl dawngkham ah hleng fangin, hmaitong nuu pakhat khiah thingheu fom hnelhno i. Ciafangin Elijah in cia hmaitong nuu hnenah, “Ninghio niu in ding tuhin khuat thawn ti i kawih sah tu.”ti in ngen i. 11Cia nuu khai ti lang tuhin feh fangin Elijah in, “Cen rong khai na kut in i kawih sah tu.”ti in ngen i. 12Ciafangin cia nuu in, “Bawipa na Pathian nung bangin, rong nai lo ing. Elvoh songah sangvut kut khat tha le palang songah thau tlawm niu lek nai ing. Kaimah le i fapa ca in suang in ei in thi tuhin thingheu a tlawmniu fom ing.”ti in sawn i. 13 Ciafangin Elijah in cia nuu hnenah, “Lau mah. Na relhnak bangin bawn tu. Ikhalselai sangper a cikniu i bawt hmasa tulai i hnenah kawih tulai, ciaben fangin nangmah le na fapa ca in bawn tu. 14Ziangmanti fangin Israel Bawipa Pathian in, ‘Bawipa in laivum ah ruah si ruai hlan lo elvoh songai sangvut khiah bo tuh lo i. Cen palang songai thau khai kaang tuh lo i.’ti in ti i.”ti in rel i. 15Ciamanin cia nuu khai feh ai Elijah thu bangin bawn ai amah le Elijah le a innkuate khiah ni tampui rong ei i. 16Cen Bawipa in Elijah songin relhnak thu bangin, elvoh songai sangvut khai bo lo ai, palang songai thau khai kaang lo i.
17Cia hnua ah inn naitu nuu fapa niu khiah ur ai a ur ze manin cia pa in haihawh lo i. 18Ciamanin cia nuu in Elijah hnenah, “Nang thawn i bawn tuhhnak zai um i? Aw Pathian minung paa. I sualhnak i hih ruai tuhin le i fapa rek tuhin i hnenah kawi i sim?”ti in ti i. 19Ciafangin Elijah in cia nuu hnenah, “Na fapa i pe tu.”ti in ruai i. Ciamanin amah in cia nuu kaang in a fapa khiah lang sah ai amah caamhmun inn cung khaan ah kawih ai, a khuahluan ah zau i. 20Ciafangin ani khai Bawipa hnenah, “Aw Bawipa i Pathian, hmaitong nuu fapa khai rek in, i caamhmun hmaitong nuu hnenah khai lungsiakul kawih sah i sim?”ti in ti i. 21Ciafangin ani khai cia naupang paa vumah vel thum bok ai, Bawipa hnenah, “Aw Bawipa i Pathian, he naupang paa rauhla khiah a hnenah kawi leh tu.”ti in ngen i. 22Ciafangin Bawipa in Elijah aw khiah za sah ai, naupang paa rauhla khai a hnenah kawi leh ai, naupang paa khai nung leh i. 23Ciafangin Elijah in naupang paa khiah lang ai inn cung khaan songin inn hnia ah zuk ai, a nuu khiah pe i. Ciafangin Elijah in, “Na fapa nung hlen i!”ti in ti i. 24Ciafangin cia nuu in Elijah hnenah, “Nangmah khiah Pathian minung i si. Cen na kaa songai Bawipa relhnak thu khiah a hman i ti khiah tunin ling i hang ing.”ti in ti i.