1Ciafangin Bawipa hnenin Baasha thu khiah Hanani fapa Jehu hnenah hleng i. 2Bawipa in, “Nangmah khiah laivut lakin na daang ai i minung Israel mite uktu in na bawn ing. Inapui ai nangmah in Jeroboam lampui khiah hlun ai, i minung Israel mite khiah sual ruai ai, amahte sualhnak thawn i raw tuhin i tok i si. 3Ciamanin Baasha tesin fate le a innkuate khiah lang sah tuh ai, na innkua khiah Nebat fapa Jeroboam inn bangin bawn tuh ing. 4Baasha naihnak khua songai thi tute khiah uico in ei tuh ai, lo lakai thi tu te khiah hli lakai vaniute in ei tuh i.”ti in ti i.
5Baasha bawnhnak a veksen khiah Israel kumpibawi te thuanthu ca-uk songah khum lo im? 6Ciamanin Baasha khai a paate bangin thi ai Tirzah ah vui i. Amah ca in a fapa Elah in kumpibawi tuan i. 7Cen Bawipa hnenin Baasha le a innkuate thu khiah Hanani fapa Jehu hnenah hleng i. Ziangmanti fangin amah in Bawipa hmai ah a pha lo bawn ai a kut thawn a naperhnak in Jeroboam inn bangin, Bawipa khiah thinraw tuhin tok ai zolo ah Jeroboam innkuate khiah rek i.
Elah ukhnak thu
8Judah kumpibawi Asa ukhnak kum kul hluanruk fangin, Baasha fapa Elah khiah Israel mite vumah kumpibawi cang ai Tirzah ah kum nih uk i. 9Ciafangin a siphuh leng tlamhmat khawngtu a hnenum Zimri in amah khiah a thupruk in tawng i. Elah khiah Tirzah ah a inn sang khawngtu Arza inn ah zukham in um teng fangin, 10Judah kumpibawi Asa ukhnak kum kul hluansarih kumah, Zimri khai inn songah lut ai Zimri in Elah khiah rek ai amah ca in kumpibawi cang i. 11Ciafangin Zimri khai kumpibawi tauhkheng vumah a to sawng fangin, Baasha innkuate khiah a unau le a rualpuite kawmin pasal pakhat khai taang lo in rek sio i. 12Ciatih bangin prawfet Jehu in Baasha thu relhnak Bawipa thu bangin, 13Baasha sualhnak hmuahhmuah le a fapa Elah sualhnak manin, Zimri in Baasha innkuate khiah rek sio i. Amahte sualhnak in Israel mite khiah sual ruai ai amahte milim zuk thawnin Bawipa Israel Pathian khiah thintok ruai i.
14 Elah bawnhnak hmuahhmuah khiah Israel kumpibawite thuanthu ca-uk songah khum i lo im?
Zimri ukhnak thu
15Judah kumpibawi Asa ukhnak kum kul hluansarih kum ah, Zimri khiah Tirzah ah ni sarih kumpibawi tuan i. Mite in Filistin te khua Kibbethon khiah kulh i.16Cia mite in, “Zimri in kumpibawipa khiah a thupruk in tawng ai rek lio i.”ti in za i. Ciamanin Israel mite in raalkapte khawng tu Omri khiah ciata camp songah Israel kumpibawi cang ruai i. 17Ciafangin Omri le amah thawn ai Israel mite khiah Kibbethon in let ai Tirzah khiah kulh i. 18Omri in Tirzah lang lio khiah Zimri in hmu fangin, ani khai kumpibawi inn songai raalkap umhmun ah lut ai kumpibawi inn khiah amah kawmin mei in tai ai ani khai thi i. 19Ziangmanti fangin amah in Bawipa hmai ah sual ai, Jeroboam lampui khiah hlun ai, a sualhnak thawn Israel mite khiah sual ruai i. 20Zimri bawnhnak le Baasha rekhnak thute khiah Israel kumpibawite thuanthu ca-uk songah khum i lo im?
Omri ukhnak thu
21Ciafangin Israel mite khai hmun nih in khan i. A tlamhmat te in Kinath fapa Tibni hlun ai a hlamhmat te in Omri hlun i. 22Ikhalselai Omri hluntu mite in Kinath fapa Tibni hluntu mite khiah neh i. Ciamanin Tibni khai thi ai Omri in kumpibawi cang i. 23Judah kumpibawi ukhnak kum samthum le kum khat kumah, Omri khai Israel kumpibawi cang ai, kum hlainih uk i. Tirzah ah kum ruk uk i. 24Omri in Samaria mual khiah Shemer hnenin tangka talan panih thawn lai i. Cia mual vumah khua sa ai a hming khiah a nai awng tu Shemer hming lang in Samaria ti in ko i. 25Omri in Bawipa hmai ah sual ai a hlan ai te tahin a rauh ngai in sual i. 26Ziangmanti fangin amah in Nebat fapa Jeroboam lampui khiah hlun ai, Bawipa Israel Pathian khiah raw tuhin amahte milim zuk thawn tok ai, Israel mite sual ruaihnak Jeroboam sual khai hlun ve i.
27Omri bawnhnak te le a raalhathnak thute khiah Israel kumpibawite thuanthu ca-uk songah khum i lo im? 28Ciamanin Omri khai a paate bangin thi ai Samaria ah vui i. Ciafangin a fapa Ahab in a ca in kumpibawi tuan i.
Ahab kumpibawi thu
29Judah kumpibawi Asa ukhnak kum sawmthum le kum riat kum ah, Omri fapa Ahab khiah Israel mite kumpibawi cang i. Omri fapa Ahab in Israel mite khiah Samaria in kum kul hluannih uk i. 30Omri fapa Ahab in a hlan ai mite a veksen tahin Bawipa hmai ah a pha lo bawn i. 31Nebat fapa Jeroboam sualhnak bang ai sual khiah zai thupui lo bangin ruat ai, Sidon te kumpibawi Ethbaal fenu Jezebel khiah nu ai, Baal na khiah per sah ai Baal khiah bia i. 32Ciafangin Ahab in Samaria ah Baal temple sa ai cia temple songah Baal ca in awlta pakhat sa i. 33Cen Ahab in Asherah milim zuk khai bawn i. Ahab in a hlan ai Israel kumpibawi veksenhnak in tamin Bawipa Israel Pathian thintok thai in bawn i. 34Ciateng in Bethel mi Hiel in Jerikhu khua sa i. Nun fapa Joshua kaa in Bawipa relhnak bangin Hiel in Jerikhu khua a ham khiah a fapa upaber Abiram thawn sa ai, a fapa nautaber Sekub thawn a kawl dawngkhamte khiah sa i.