Zisu le Moses le Elijah thu
(Matt. 17:1-13;Luke 9:28-36)
9Ciafangin Zisu in amahte hnenah, “Thungai in ning rel ing. Heta ai ding tu te lakah, Pathian ukhnak khiah huthawm thawn hlenghnak hmu hlan lo thihhnak tuar lo tuh te um tuh i.” ti in rel i. 2Ciahnua ni ruk fangin Zisu in Peter le James le John khiah amahte lekin mual saang pakhat vumah fehpui ai amahte hmai ah Zisu hmel khiah thleng ai, 3A thilthuam khiah tleu ai vurpar bang in ngo ai, laivum ah aisu ponsawptu pakhat bangin khai cia bang in ngo ruai ben tuh lo i. 4Ciafangin amahte in Elijah le Moses khiah Zisu kawmin thurel tlaang in hmu i. 5Ciafangin Peter in Zisu hnenah, “Bawipa, kinte heta ah um khiah kin ca ah pha i. Nangmah ca le Moses ca le Elijah ca in hlam pathum sa nga ing.” ti in ti i. 6Ziangmanti fangin Peter in zai pong tuh khai ling lo i. Ziangmanti fangin amahte khiah lau rauh i. 7Ciafangin mairo in amahte khuk ai cia mairo songin, “He khiah i ithnak i Fapa i. A thu lo ngai tuu-ih.” tihnak aw khiah amahte in za i. 8Ciasawng fangin anite khai a hiang cingkim sik fangin amahte thawn Zisu lo mi dang aisu khai hmu leh lo i. 9Amahte khiah mual vum in theuh leh fangin Zisu in amahte khiah amahte hmuhnak khiah mi Fapa thihhnak in a tholeh hlan lo aisu khai rel tuh lo in kham i. 10Ciamanin amahte in, thihhnak in tholeh tu zai ti ca i ni ti aican kongin cia thu khiah amahte thin songah khawi i. 11Ciafangin amahte in, “Zaimanin upadi dan cuktu sazate in Elijah hleng hmasa tuh i ti in rel i? ” ti in zawt i. 12Ciafangin Zisu in, “Elijah khiah zaizongza rem tuhin hleng hmasa tuh peu i. Cen zaimanin Lai Cianghlim songah, ‘Mi Fapa in a rauhngai in tuar tuhai amah khiah zauhsuam tuh i.’ti in ngan i pa? 13Ikhalselai ning rel ing. Elijah khiah hleng zo i. Ikhalselai amah thu ngan ciahnak bangin amahte in amahte nuam bangin a vumah bawn zo i.” ti in sawn i.
Khuavang naitu naupang cakruai i
(Matt. 17:14-20; Luke 9:37-43)
14Zisu khiah a hnuahlunte hnenah kawi fangin amahte hiang cingkim ai miburpui le upadi dan thucuk tu sazate hrekkhatte khiah a hnuahlunte thawn thu eldun in hmu i. 15Mite in Zisu hmu fangin amahte khiah ngaihsunur tlaang ngai ai anite khai a hnenah dawp ai amah khiah caang i. 16Ciafangin Zisu in, “Amahte thawnin zai el dun hnelhno i si?” ti in zawt i. 17Miburpui lakai mi pakhat pa in, “Sazapa, i fapa khiah na hnenah kawih ing. Ziangmanti fangin amah in khuavang nai manin pong thill lo i. 18Cia khuavang in amah khiah pom cang fangin, amah khiah hlin dekdo de i. Ciafangin a ka in cilbuan suak ai a kam riat ai amah khiah khangten in um i. Na hnuahlunte khiah cia khuavang hnawt tuhin ruai napui ai hnawt ben lo i.” ti in sawn i. 19Ciafangin Zisu in, “Aw sanghnak nai lo mite! Ning hnenah zaicam um tuh ing? Amah khiah i hnenah kawih tuu-ih.” ti in ruai i. 20Ciafangin amahte in naupang pa khiah a hnenah kawih i. Khuavang in Zisu hmu sawng fangin, naupang pa khiah hlin dekdo i. Ciafangin naupang pa khai laipua ah tlu le a ka in cilbuan suak i. 21Ciafangin Zisu in a paa khiah, “Hetih bang ai a um khelleh zaicam i hang?” ti in zawt i. Cia paa in, “A naute lai ai pan in i hang. 22Amah khiah hnawmcan tuhin khuavang in mai songah le ti songah vel tamngai lon de i. Ikhalselai na bawn thillhnak um lekhaw, ninghio in kin bawm tu.”ti in sawn i. 23Ciafangin in Zisu in, “Sang thill lesikhaw, a sang tu hnenah zaizai khai thill liang i.” ti in ti i. 24Ciasawng fangin cia paa khai kap kongin, “Sang ing. I sang thanau hnak kho ruai tu.”ti in ti i. 25Ciafangin Zisu in mi runpui khiah hmunkhat in dawp huho hmu manin khuavang hnenah, “Nang, minung pong thill lo le nangong ai dah thai tu khuavang, Amah songin suak na ruai ing. Cen amah songah lut nawn ma hang.” ti in hau i. 26Ciafangin khuavang khai au ai naupang pa khiah laukul ngai in hlin dek ben fangin a songin suak i. Ciafangin naupang pa khai vuitum bangin um manin mi tamngai in, “Amah khiah thi lio i hang.” ti in ti i. 27Ikhalselai Zisu in cia naupang pa khiah a kut in lang ai amah khiah daang fangin naupang pa khai tho i. 28Zisu khai inn song lut fangin, a hnuahlunte in a thupniu in, “Ziangman in khuavang khiah hnawt ben lo i ing?” ti in zawt i. 29Zisu in, “He bang tu sawngen le rongul lek ian in cang thill i.” ti in sawn i.
Zisu khiah thi tuh ai tholeh tuh i
(Matt. 17:22-23; Luke 9:43-45)
30Anite khai ciata in feh ai, Galilee ram songin feh ai cia khiah aisu in ling tuh khiah Zisu in daih lo i. 31Ziangmanti fangin Zisu in a hnua hlunte hnenah, “Mi Fapa khiah minungte kut ah ap tuh ai, amahte in rek tuh i. A rek hnua ni thum fangin amah khiah tholeh tuh i.” ti in cuk i. 32Ikhalselai anite in a relhnak khiah ling sah lo ai a zawt tuh khai ngam lo i.
Aisu lian ber i?
(Matt. 18:1-5; Luke 9:46-48)
33Ciafangin anite khai Kapernaum ah hleng i. Zisu khiah inn songah hleng fangin, “Lamlakah zai eldun hnelhno i si?” ti in zawt i. 34Ikhalselai anite in sawn lo i. Ziangmanti fangin, lamlakah, aisu khiah a lian ber i ni ti in eldun tlaang i. 36Zisu khai to ai a hnuahlun hlainihte khiah ko ai, “Mi pakhat in a hmasaber nuam lekhaw amah khiah mi veksen lakah a hnuataber cang tu seh; cen amah khiah mi veksen hnenum cang tu seh.” ti in rel i. 36Ciafangin naupang pakhat khiah amahte laiteng ah kawih le a kaang ah cawi ben fangin amahte hnenah, 37“Aisu in khai i hming in he bang naupang sik tu in kaimah i sik i. Cen i sik tu in kai i sik lo ai i hlat tu pa sik i.” ti in rel i.
Kin raal i lo te khiah kin rual i
(Luke 9:49-50)
38Ciafangin in John in Zisu hnenah, “Bawipa, mi pakhat in na hming in khuavangte hnawt hmu i ing. Ikhalselai amah khiah kham i ing. Ziangmanti fangin amah in kin hlun nuam lo i.” ti in rel i. 39Ciafangin Zisu in, “Amah khiah kham mah ih. Ziangmanti fangin i hming in ngaihsun urkul na per tu pa in, kaimah khiah i siat tuh lo i. 40Ziangmanti fangin kin raal i lo te khiah kinmah lam mi i. 41Ziangmanti fangin Khrih minung ning i manin mi pakhat in ti dap khuat khat ding tuh in ning pe lekhaw, thungai in ning rel ing, cia pa in a lehsawng ngah lo in um tuh lo i.
Sualsohnak
(Matt. 18:6-9; Luke 17:1-2)
42Cen mi pakhat in i sang tu he naupang pakhat khiah sual ruai lekhaw cia pa hawng ah lungrial hnak lungto pui khih in amah khiah tipui songah lon selai amah ca ah pha sawn i. 43Cen na kut in na sual ruai lekhaw cem tu lio. Na kut panih thawn a hmit nia um lo hell mei songah feh tahin, pumpui khim lo ai vancung khua songah lut ai nung tuh khiah nangmah ca ah hnem sawn i. 44Ciata ah amahte pangang khiah thi lo ai meiko khai dit lo i. Cen na ke in na sual ruai lekhaw, cem tu lio. Ke panih thawn a hmit nia um lo hell songah lonhnak tuar tahin, kawngbai ai vancung khua songah lutin nung tuh khiah nangmah ca ah hnem sawn i. 46Ciata ah amahte pangang khiah thi lo ai meiko khai dit lo i. 47Na mit in na sual ruai lekhaw khawlh tu lio. Mit panih thawn hell songah lonhnak tuar tahin mit pakhat thawn Pathian ukhnak songah lut tuh khiah nangmah ca ah hnem sawn i. 48Ciata ah amahte pangang khiah thi lo ai meiko khai dit lo i. 49Ziangmanti fangin aisu hmuah khiah mei thawn al ruai tuh i. 50Ci khiah a pha i. Ikhalselai ci in a alhnak pai ruai lekhaw, ziang thawn al ruai leh tuh i si? Ning songah ci nai tuu-ih. Cen pakhat le pakhat khai a remniu in um tuu-ih.” ti in rel i.