Luke 23

<< LUKE 23 >>

Zisu khiah Pilate hmai ah kawih i

(Matthew 27:1-2, 11-14; Mark 15:1-5; John 18:28-38)

23Ciafangin miburpui a veksenin tho ai Zisu khiah Pilate hnenah kawih i. 2Amahte in Zisu khiah,  “He pa in kin mi phun khiah hnawmcan ai amah veve khiah Khrih kumpibawi ing ti ai Sizar hnenah siahkhuai  pe mah ih ti in kham i.” ti in mawhhluk i. 3Ciafangin Pilate in, “Nangmah khiah Judah mite Kumpibawipa i sim?” ti in zawt i. Zisu in, “Na relhnak bang i.” ti in sawn i. 4Ciafangin Pilate in phungki upate hnenah le mite hnenah, “He pa lakah sualhnak tawk lo ing.” ti in ti i.  5Anite in puar amam in, “Galilee ai panin heta tian Judah mi hmuahhmuah  khiah thucuk ai mi hnaihnok ruai i.” ti in ti i. 6Pilate in Galilee ti khiah za fangin, Zisu khiah Galilee minung  i maw i lo ti in zawt i. 7Zisu khiah Herod  ukhnak minung i ti khiah ling fangin Herod hnenah Zisu khiah feh ruai i. Herod khiah cia tengin Jerusalem ah lo um teng i. 8Herod in Zisu khiah hmu fangin ang rauh ngai i. Herod in Zisu naperhnak khiah za awng manin le  Zisu  bawnhnak ngaihsunurkulte khiah hmu nuam awng manin, Zisu hmu nuam khelleh khiah a rai ngai i hang. 9Ciafangin Herod in Zisu khiah thu tamngai zawt napui ai Zisu in   sawn lo i. 10Phungki upate le upadi dan  cuktu sazate khai ding ai  riahsia ngai in Zisu khiah mawhhluk i. 11Ciafang in Herod  khai a raalkapte thawn Zisu khiah nautat ai zauhsuam ben fangin thilthuam pha ngai khiah silh ai Pilate hnenah feh ruai leh i. 12Cia nia pah Herod le Pilate khiah rualrem cang i. Ziangmanti fangin  he hlanah tu amahte khiah raaldun rih awng  i.

Zisu khiah thi tuhin thutan i

(Matthew 27:15-26; Mark 15:6-15; John 18:39-19:16)

13Pilate khai phungki upate le mi uktute le mite khiah hmunkhat in ko ben fangin, 14Amahte hnenah, “Ningte in he pa khiah ning mi phun hnawm ruai tu i ti in i hnenah kawih i si. Amah khiah ning hmai ah ning mawhhluk hnak khiah i zong fangin  a sualhnak tawk lo ing. 15Cen Herod in khai tawk lo i. Ziangmanti fangin amah khiah Herod hnenah feh ruai ing. Thi tlak ai a bawnhnak zaikhai um lo i. 16Ciamanin amah khiah vit ngangkhaw hlat tuh ing.” ti in ti i. 17(Ziangman ti fangin cia puai ah Pilate in amahte pakhat khiah hlat kul bel i.)

18Ciafangin anite in hmunkhat in, “He pa khiah rek tu lai Barabbas khiah hlat tu.” ti in au vut i. 19(Cia Barabbas khiah  khua songah raaltho ruai awng le ciafangin mi lo rek manin thawng tauhhnak pa i.) 20Ciamanin Pilate khai Zisu khiah hlat nuam manin,  amahte hnenah  ngen  leh thio i. 21Ikhalselai anite in, “Amah khiah thinglamteh in tar tu.” ti in au i. 22Ciafangin Herod in amahte hnenah a vel thumhnak in, “Zaimanin, amah in a pha lo zai bawn i? A thi tlakhnak tuh thu zaikhai tawk lo ing. Ciamanin vit ngangkhaw hlat tuh ing.”ti in ti i. 23Ciafangin amahte in aw cawm ngai thawn amah khiah thinglamteh in rek tuh in ruai i. Ciate auhnak le phungkite  auhnak aw in neh i. 24Ciafangin Pilate in amahte daihhnak bangin i tuh in thutan i. 25Ciafangin in raaltho ruai ai mi rek awng manin thawnghlahnak le amahte daihhnak pa khiah hlat ai Zisu khiah amahte daihhnak bang in ap i.

Zisu thinglamted vumah tarhnak

(Matthew 27:32-44; Mark 15:21-32; John 19:17-27)

26Amahte in Zisu khiah fehpui ai rampua lamai hleng tu Sairin mi Simon tihnak mi pakhat khiah pom ai cia thinglamteh khiah a vumah  phurh ai Zisu hnua in hlunruai i. 27Zisu hnua in mi tampui in hlun ai nupang tampui khai amah kah kong in hlun i. 28Ikhalselai Zisu khai amahte hnenah lamah her ai, “Jerusalem fenute,  kai ca in kap mah ih. Ningmah ca le ning fate ca in kap tu sawn ih. 29Ziangmanti fangin,  amahte in, ‘Fa cingte le naupai awng lo te le hnawifawp awng lo hnawite khiah  a hmuifu i.’ ti ai rel nia khiah hleng tuh i lai. 30Ciafangin amahte in mualte hnenah, ‘Kin vum ah tlok tuu-ih.’ ti tuh ai, tlangte hnenah, ‘Kin khuk tu lio ih.’ ti in ti tuh i. 31Ziangmanti fangin he khiah thing  hing vumah bawn lekhaw,  a ro vumah zai bawn tuh i?” ti in ti i. 32Zisu thawn rek tuhin a dang misual panih khai feh pui i. 33Anite khai Calvary tihnak hmunah hleng fangin, ciata ah Zisu khiah thinglamteh in tar ai, misualte khai pakhat khiah a kiahhan lam cen a khatta khiah a kekeh lamah tar i. 34Ciafangin Zisu in, “I Pa, amahte khiah sual lo hlat tulaw. Ziangman ti fangin amahte in  amahte bawnhnak khiah ling lo i.” ti in ti i. Ciafangin amahte in a pon khiah zik ai aungbali suai tlang i.  35Mite khai amah sik in ding tlang i. Cen mi-uktute in khai amahte thawn Zisu khiah, “Mi dang  tu o i. Pathian ai rilhnak Khrih i lekhaw amah veve khiah o tu seh.” ti in zauhsuam i. 36Cen raalkapte in amah khiah  zauhsuam  ai amah hnenah kawi ai capitti thur khiah pe ai, 37“Nangmah khiah Judahte Kumpibawi ilesikhaw, nangmah veve khiah o tu.” ti in ti i. 38A vumah Greek le Latin le Hebrew ponin, “HE PA KHIAH JUDAH TE KUMPIBAWIPA I.” ti in ngan i. 39Ciafangin thinglamteh vumah tarhnak misual pa pakhat in, “Nangmah khiah Khrih ilesikhaw, nangmah le kin khai kin o tu.” ti in hau i. 40Ikhalselai  a khatta pa in, “Amah bangin cawhkuan tuar ve ai Pathian khiah kih lo i sim? 41Kin tu  a tuar kin tlak ze i. Ziangmanti fangin kin perhnak bangin  lehsawng ngah i sing. Ikhalselai he pa tu zai sualhnak khai bawn lo i.” ti in hau kong in sawn i. 42Ciafangin cia pa in Zisu hnenah, “Bawipa, na ukhnak songah na hleng fangin lo i hih tulaw.” ti in ti i. 43Zisu in amah hnenah, “Thungai in  na rel ing. Tunnia ah kaimah thawn paradise ah  um tuh i si.” ti in sawn i.

Zisu khiah thi i

(Matthew 27:45-56; Mark 15:33-41; John 19:28-30)

44Ciafangin sun nazi hlainih tluk ai panin zanlam nazi pathum tia laivum  hmuahhmuah  ah khuathim i. 45Ni khai thim ai  temple khaan dan pon khai a laiteng in zik i. 46Zisu in aw cawm ngai in au ben fangin, “I Pa, i rauhla na kut ah na ap ing.” ti ben fangin thi i. 47 Raalbawipa in a cang hnak khiah hmu fangin Pathian thangphat ai, “Thu ngai in he pa khiah mi dikcang pa i.” ti in ti i. 48Cia mi hmu tuh ai  kawi tu mite hmuah in  a cang hnak thute khiah hmu fangin, amahte thinhnai khiah beng ai tlung i. 49Cen a rualte le Galilee in a hluntu nupangte khiah a hla ngai in ding ai he thilte khiah hmu liang i.

Zisu khiah vui i

(Matthew 27:57-61; Mark 15:42-47; John 19:38-42)

50Ciafangin council ai teltu Joseph tihnak mi pakhat um ai amah khiah mi nun pha le mi dikcang pa i. 51(Joseph in councilte sawmhnak le bawnhnak khiah lungkhim lo napui i). Cen amah khiah Pathian ukhnak iang tu pakhat khai lo i ve i. 52He pa khai Pilate hnenah kawi ai, Zisu ruang khiah ngen i. 53Ani khai Zisu ruang khiah  lang ai pon thawn in fun le  lung kua songah cohnak aisu khai vui awng lo hmun hlan song ah zau i. 54Cia nia khiah puai ralring nia i ai sabbath khiah nong i hang. 55Zisu thawn Galille ai hleng tu nupangte khai a hnua in hlun ai cia hlan  le a ruang zau dan khiah hmu i. 56Anite khai tlung ai zihmuite khiah ralring in dah ai thukham bangin sabbath nia khiah ul tlang i.

<< LUKE 23 >>

Leave a Reply

Your email address will not be published. Required fields are marked *