<< LUKE 22 >>
Passover khelhnak puai nong i hang
( Matthew 26:1-5, 14-16; Mark 14:1-2; 10-11; John 11:45-53)
22 Passover khellhnak puai tihnak col tel lo sangreu puai khiah nong i hang. 2Tlangbawi upate le upadi dan cuktu sazate in kontih in amah khiah rek thill tur sing ti in si i. Ziangmanti fangin amahte in minungte khiah lau i. 3Ciafangin Satan khai Iskariat tihnak Judas songah lut i. Judas khiah a hnuahlun hlainihte lakai hnualun pakhat i. 4Judas khai amah hlan lam feh ai, phungki upate le raalkapte thawn amah in amahte hmunah a kontih in zuar thill tuhhnak khiah sawm tlaang i. 5Ciafangin anite khai ang ngai ai amah khiah tangka pe tuh in lungkhim tlaang i. 6Ani khai amahte khiah thukham ai
Zisu in a hnuahlunte kawmin Passover Puai rongei i
(Matt.26:17-25;Mk.4:12-21;Jn.13:21-30)
7Ciafangin passover khellhnak tuufa niu rekhnak nia col tel lo sangreu puai nia khiah hleng i. 8Ciafangin Zisu in Peter le John khiah, “Feh tu i lai kin ei tuh in passover khellhnak puai khiah ral lo ring tuu-ih, ” ti in ruai i. 9Ciafangin amahte in, “Konah ralring na daih pa?” ti in zawt i. 10Zisu in amahte hnenah, “Khua songah ning lut fangin, tibel phur tu mi pakhat in ning tawk tuh i. A lut hmun inn songah amah khiah hlun tuu-ih. 11Cia inn naitu a pha mi pa hnenah, ‘Saza pa in, “I hnuahlunte thawn passover khellhnak puai i ei hmun tuh mikhual khaan khiah a konah i?” na ti i.’ ti in zawt tuu i lai 12Cia pa in inn cung ah a rem cia liang ai dahhnak khaan lianpui ning hmuh tuh i. Ciata ah ralring tuu-ih.” ti in rel i. 13Anite khai feh ai Zisu in amahte hnenah rel bangin tawkai anite khai passover khellhnak puai khiah ralring i.
Capitti le sangper ai panhnak
(Matt.26:26-30;Mk.14:22-26;I Kor. 11:23-25)
14A cuu khim fangin, Zisu khai to ai apawstal hlainihte khai amah thawn to i. 15Ciafangin Zisu in amahte hnenah, “I tuar hlanah ningte thawn he passover khellhnak puai khiah ei i nuam rauh i. 16Ziangmanti fangin ning rel ing, Pathian ukhnak songah a khim hlan lo zaikom in khai ei tuh lo i hang ing.” ti in rel i. 17Zisu in khuat khiah lang ai sawngen ben fangin, “He khuat khiah lang tu i lai ning te in zem tlaang tuu-ih. 18Ziangmanti fangin ning rel ing, Pathian ukhnak a hleng hlan hmuah, capitti khai ding tuh lo i hang ing.” ti in rel i. 19Cen sangper khai lang ai sawngen ben fangin khan ai amahte khiah pe ai, “He khiah ningte hnenah pehnak i pumpui i. I hihhnak tuhin he khiah lo bawn tuu-ih.” ti in ruai i. 20Ciabang pah in zanfak ei hnua ah khuat khai lang ai, “He khuat khiah ning ca ai luang ruaihnak i thi thukham thar i. 21Ikhalselai i zuartu pa kut khiah kaimah thawn he cabuai vumah um i. 22Thungai in mi Fapa khiah a tekcia bang in feh i. Ikhalselai a zuartu pa hnenah rimsuhnak um tu selaw!” ti in ti i. 23Ciafangin amahte tlaangtlaang khiah aisu ber in he khiah bawn tuh i ni ti in zawt dun tlaang i. 24Ciafangin amahte lakah aisu khiah a lianber i tuh i ti in eldun tlaang i. 25Ciafangin Zisu in amahte hnenah, “Zental kumpibawite in amahte vumah bawi cang i. Cen amahte vumah thunaitute khiah a bawmtute ti in ko i. 26Ikhalselai ningte in ciatih bang i tuh lo i si. Ikhalselai ning lakai a lianber tu khiah a nautaber bangin um tu seh. Cen a bawiber cang tu in hnenum bang in um tu seh. 27Ziangmanti fangin rongei ai totu pa maw, rongsan tu khiah aisu upa sawn i? Rongei ai to tupa khiah upa sawn lo im? Ikhalselai kaimah khiah ning lakah rongsan tu bang in um ing. 28Ningte khiah i sualsohnak songah i tuar bawm tute i si. 29I Pa in ukhnak i pe bangin ningte khai ukhnak ning pe ing. 30Cia bangin i ukhnak songah i cabuai ah rongei le ding in um tuh ai Israel phun hlainihte thukhantu tuhin kumpibawi tauhkheng vumah to tuh i si.” ti in rel i.
Peter in Zisu khiah el tuh relcia i
(Matt.26:31-35;Mk.14:27-31;Jn.3:36-38)
31Ciafangin Bawi Zisu in, “Simon, Simon, siktu, Satan in na ping nuam i. Fang kung bang in na khaap nuam i. 32Ikhalselai na sanghnak khiah kho thai in saw na ngen sah ing. Na sanghnak khiah kho fangin na unaute khiah kho pui tu.” ti in rel i. 33Ciafangin Peter in Zisu hnenah, “Bawipa nangmah thawn thawng songah i tu seh thihhnak hmunah i tu seh na hlun tuh a cialep ing.” ti in sawn i. 34Ciafangin Zisu in, “Na rel ing, Peter, nangmah in kaimah khiah na ling lo ing ti in vel thum tian na el hlan lo tunnia ah arkhuang tuh lo i.” ti in rel i. 35Ciafangin Zisu in amahte hnenah, “Paisa dip le rong dip le kedawl thawn lo in ning hlat fangin zai ning sam aw lai im?” ti in zawt fangin amahte in, “Zaikhai kin sam lo i.” ti in sawn i. 36Ciafangin Zisu in amahte hnenah, “Ikhalselai tunin paisa dip naite in keng tu seh; cen rong dip nai te in khai keng tu seh. Cen vangsau nai lo te in a ponthuam khiah zuar in vangsau lai tu seh. 37Ziangmanti fangin ning rel ing, ‘Amah khiah misualte lakai mi sual pakhat bang in siar zo i.’ ti ai ngan ciahnak khiah i vumah khim kul tuh i. Ziangmanti fangin i thu ngan ciahnak khiah khim liang i hang.” ti in rel i. 38Ciafangin amahte in, “Bawipa, siktu, heta vangsau panih um i.” ti in ti i. Ciafangin Zisu in amahte hnenah, “Tawk zo hang.” ti in sawn i.
Zisu in Olives mual vumah sawngen i
(Matthew 26:36-46; Mark 14:32-42)
39Ciafangin Zisu khai suak ai amah dan bang in Oliv mual ah feh ai a hnuahlunte in hlun i. 40Ciata ah hleng fangin a hnuahlunte hnenah, “Sualsawmhnak ning lut lohnak tuhin sawngen tuu-ih.” ti in ti i. 41Ani khai amahte hmun in lungto sep tha hla ah thawn ai khuk caicin in sawngen ai, 42“I Pa, thin na khim lekhaw he khuat khiah i hnenin tlan tu. Ikhalselai i daihhnak bang i lo in na daihhnak bang in i tu seh.” ti in ngen i. 43Ciafangin vancung in vancung mi khiah hleng ai amah khiah tha pe i. 44Zisu khai thi banghma in thin rimsu manin a rauh hngehnge in sawngen ai a khuahlan khiah thisan puipui bangin laipua ah far i. 45Sawngen ben fangin tho ai a hnuahlunte hnenah kawi le amahte khiah lungsia in mitmu in tawk i. 46Zisu in amahte hnenah, “Zaimanin mitmu i si? sualsawm hnak ning lut lo hnak tuhin tho tu i lai sawngen tuu-ih.” ti in ti i.
Zisu khiah Judas in zuar i
(Matt.26:47-56;Mk.14:43-50; Jn.18:3-11)
47Ciatih ai a pong laitak in a hnuahlun hlainihte lakai Judas tihnak pakhat khiah mirunpui hmai in feh ai Zisu hnenah Zisu thut tuh in nong i. 48Ikhalselai Zisu in, “Judas, mi Fapa khiah thut ai zuar i sim?” ti in ti i. 49A hiang ai um tute in zai cang tuh i ti khiah hmu fangin, Zisu hnenah, “Bawipa, vang thawnin sat nga ing?” ti in zawt i. 50Ciafangin pakhat pa in phungki upa pa hnenum kiahhan lam bil khiah tawng lio in sat sah i. 51Ciafangin Zisu in amahte hnenah, “He zah tian ngawn tuar rih tuu-ih.” ti in ti ai cia hnenum pa bil khiah lawm ruai lio i. 52Ciafangin Zisu in a hnenah kawi tu phungki upate le temple raalkapte le mi upate hnenah, “Vangsau le tokrolh kawmin ruko pom tuh bang in kawi i sim? 53Ning hnenah nisiar in temple songah i um fangin i pom lo i si. Ikhalselai he khiah ningmah tikcu i ai khuathim power i.” ti in ti i.
Peter in Zisu el i
(Matthew 26:57-58; 69-75; Mark 14:53-54, 66-72; John 18:12-18, 25-27)
54Ciafangin anite in Zisu khiah pom ai phungki upa pa inn ah fehpui i. Peter khai a hla thah in hlun i. 55Amahte in tualvan ah meipual sep ai Peter kawmin to tlang i. 56Ikhalselai nupang hnenum pakhat nuu in Peter mei hiang ah to khiah hmu fangin, a kung niu in Peter khiah sik ai, “He pa khai Zisu thawn i.” ti in ti i. 57Ciafangin Peter in, “Nupang nuu, amah khiah ling lo ing.” ti in el i. 58Ciahnua zaicam lo fangin mi pakhat in amah khiah hmu ai, “Nangmah khai amahte minung pakhat i si.” ti in ti i. Peter in, “Mi pa, i lo ing.” ti in ti i. 59Nazi pakhat tluk fangin a dang pakhat pa in, “Thungai in he pa khiah Zisu thawn i ve i. Ziangmanti fangin amah khiah Galilee minung i.” ti in ti i. 60Peter in, “Mi pa, na relhnak na ling sah lo ing.” ti in sawn ai ciatih ai a pong laiteng in ar khuang vut i. 61Ciafangin Bawi Zisu khai her ai Peter khiah sik i. Ciafangin Peter in, Bawipa in a hnenah, “Ar khuang hlan ah vel thum i el tuh i si.” ti ai relhnak khiah hih ai 62Peter khai suak ai lungsia rauh in kap i.
Zisu khiah zohsuam ai vit i
(Matthew 26:67-68; Mark 14:65)
63Zisu pom tute in Zisu khiah zauhsuam ai vit i. 64Amah khiah a mit pen ben fangin a hmai khiah kut tum in beng ai, “Kin rel tu, aisu in na beng i?” ti in ti i. 65Ciatih bang in Pathian zauhsuamhnak pon a tamngai thawn in amah khiah zauhsuam i.
Zisu khiah Council hmai ah kawih i
(Matt.26:59-66;Mk.14:55-64;Jn18:19-24)
66Zing khuavar sawng fangin, mi upate le phungki upate le upadi dan cuktu saza te khiah hmunkhat in khawm tlaang ai, amahte council hmai ah kawih ai, 67“Nangmah khiah Khrih i sim? kin rel tu.” ti in zawt i. Zisu in amahte hnenah, “Ning rel inglai i sang tuh lo i si. 68Ning zawt inglai i sawn tuh lo i si. Cen i hlat khai i hlat tuh lo i si. 69Tunhnua ah mi Fapa khiah Pathian power kiahhan lamah to in hmu tuh i si.”ti in ti i. 70Ciafangin amahte in, “Ciailekhaw nangmah khiah Pathian Fapa i sim?” ti in zawt i. Zisu in amahte hnenah, “Kaimah khiah Pathian Fapa i ti i si.”ti in sawn i. 71Ciafangin anite in, “A dang zai tetti kin kul i lai? Ziangmanti fangin a pong hnak khiah kinmah rori in zazo i sing.” ti in ti i.