Luke 12

<< LUKE 12 >>

12 Cialak in a siar zolo miburpui khiah hmunkhat in tai ai pakhat le pakhat khiah tetdun  murhmo fangin, Zisu in a hmasaber ah a hnuahlunte hnenah, “Farasite col hrokhrawl hnak khiah ralring tuu-ih. 2Ziangmanti fangin laar tuh lo ai khuphnak zaikhai um lo i. Cen ling tuh lo ai thuphnak zaikhai um lo i. 3Ciamanin khuathim songai ning ponghnak khiah khuavaar songah zak tuh i.  Inn khaan songai a hiohio ai ning ponghnak khiah inn phu vumin phuang tuh i.

Pathian khiah kih tuu-ih

(Matthew 10:28-31)

4I rualte ning rel ing, Ning pumpui rek tute khiah kih mah ih. Ciahnua ah amahte in bawn thillhnak ziangkhai um lo i hang. 5Ikhalselai  aisu kih pha i ti khiah ning relcia ngang.  Ning rek ben fangin hell song ah ning lonhnak tuh power nai tu Pa khiah kih tuu-ih. I, ning rel ing, Cia Pa khiah kih tuu-ih. 6Kawlva panga khiah paisa panih in zuar i lo im? Pakhat bang khai Pathian in hai lo i. 7Ikhalselai ning lu ai ning sam khiah a veksenin siarsa liang i.  Ciaman in lau mah ih. Kawlva tamngai tahin man  nai sawn i si.

Mi hmai ah Khrih phuang  tu

(Matthew 10:32-33; 12:32; 10:19-20)

8Cen ning rel ing, Mi hnenah i phuang tu khiah Pathian vancung mite hmai ah mi Fapa in phuang tuh ve i. 9Ikhalselai mi  hnenah i el tu khiah Pathian vancung mite hmai ah el tuh ve  ing. 10Mi Fapa lakah pon sia pong tu khiah sualhlat tuh i.  Ikhalselai Ciang Rauhla lakah zauhsuam ai pong tu khiah sualhlat tuh lo i. 11Cen sanginn ah le  mi uktu le mi bawite hnenah  ning kawih fangin  kontih bangin sawn ni ngang, zai rel ni ngang ti in ngaisung mah ih. 12Ziangmanti fangin Ciang Rauhla in cia cu ah ning pong tuhhnak ning cuk tuh i.” ti in rel i. 13Cia mi runpui lakai mi pakhat pa in, “Saza pa,  i u in  a ro thil i khan tuhin i rel sah tu.” ti in ti i. 14Ciafangin Zisu in, “Mi pa, aisu in  mi thukhan tu tuh in le  ning thil khantu tuhin i dah i?” ti in sawn i. 15Ciafangin Zisu in amahte hnenah, “Ngai tuu-ih. Mi thil ir tuh lo in ralring tuu-ih. Ziangmanti fangin minung te nunhnak khiah a thilri  naihnak thawn seng dun  lo i.” ti in rel i. 16Ciafangin santehhnak pakhat khiah rel i: “Milian pa pakhat ai lo songin rong tamngai  suak i. 17Ciafangin ani khai, “Zai bawn tuh ing? Ziangmanti fangin i rongte khawl hmun tuh  nai lo i hang ing, 18Ciaman in hetih bang in bawn tuh ing.  I  rongkhawl hmun inn khiah bal  in a lian deuh in sa tuh ing. Ciafangin ciata ah i rong le i thil hmuahhmuah khawi tuh ing. 19Ciafangin i rauhla hnenah, ‘Rauhla, nangmah ca tuh in kum tampui ca thilri  na khawl sahzo ing. Nunnuam in um in ei le ding le lungawi in um tu hang.’ ti in ti tuh ing.”ti in ruat i. 20Ikhalselai Pathian in cia milian pa hnenah, “Mivoi pa, tun zan ah na thi tuh i. Ciafangin he na khawlhnak thilte khiah aisu in ping tuh i?’ ti in ti i. 21Ciamanin amah ca ai hlawnthil khawltute khiah Pathian lamah lian lo i.” ti in rel i.

Thangha ca multing in um mah!

(Matthew 6:25-34; 19-21)

22Zisu in a hnuahlunte hnenah, “Ciamanin ning rel ing,  Ning nunhnak ca in zai ei ni ngang, zai ding ni ngang, ti in ruat hnelhno mah ih; cen ning pum ca in  khai zai sil ni ngang, ti in  ruat hnelhno mah ih. 23Nunhnak khiah rong hnak in thupui sawn i. Pumpui khiah thilthuam hnak in thupui sawn i. 24Langaak te khiah ruat tu cuk ih; amahte in cii khai cing lo, rong khai khawm lo i. Cen  rongpam hmun  le ben  khai nai lo i. Ikhalselai amahte khiah Pathian in cawm i. Vaniute tahin zaitluk in  ning thupui sawn i? 25Cen ning lakah  ning ruathnak manin ning dung khiah dawng khat torh thill  aisu um i si? 26A cik ber  rin bawn ben lo ai zaimanin a dangte tu ruat hnelhno i si? 27Paparte po le khang dan khiah  ruat tu cuk ih. Amahte in na khai per hlah. Vo khai kher lo i. Ikhalselai ning rel ing, Solomon a bawi bik teng in  he paparte bangin  thuam lo i. 28Tunnia ah lo lai ah po ai thangha  ah lungthu songah lonhnak hampate khiah Pathian in ciatih tluk in thuam lekhaw, zaitluk tamin Pathianin ning thuam  tuh i, aw sanghnak thanaute! 29Ciamanin zai ei ni ngang, zai ding ni ngang ti in sii mah ih. Cen sangsam in khai um mah ih. 30Ziangmanti fangin laivum mi phun hmuah in hete khiah sii hnelhno i. Cen ning Pa in he thilte khiah ning kul i ti khiah  ning ling sah i. 31Ciatah in Pathian ukhnak khiah sii tuu i lai he thilte  khiah ning pe tuh i. 32Lau mah ih, tu rualte. Ziangmanti fangin ukhnak ning pe tuh khiah ning Pa  a nuamhnak i. 33Ning nai hnak khiah zuar tu i lai, mi farahte khiah pe tuu-ih. Ningmah veve khiah hlun nia um lo paisa dip le  hnawm  nia um lo, ruko in khai ru thill lo,  nunghingte in khai hnawmcan thil lo hmun vancung ah ning hlawnthil khiah  dah tuu-ih. 34Ziangmanti fangin ning hlawnthil umhmun ah ning  thinlung khai um tuh ve i.

Ralring in um tuu-ih

(Matthew 24:45-51)

35Ning thilthuam khiah a cialep in le ning mei-inn khiah a vaar cialep in dah tuu-ih.  36Ningte khiah mohoi puai ai tlung  leh tu amahte bawipa iang tu mite bang in um tuu-ih. Cia bawipa khiah tlung in dawngkham ceuh fangin amahte in dawngkham khiah hon tuh vut i. 37A bawipa khiah tlung fangin a iang  ai tawkhnak hnenumte khiah hmuifu i. Thungai in ning rel ing, cia bawipa khai rongzem tute thilthuam khiah sil in a hnenumte khiah to ruai ben fangin amahte khiah rongzem tuh i. 38Cia bawipa khiah seukhing hlan ah  i tu seh, seukhing hnua ah i tu seh hleng in a hnenumte khiah a iang in tawk lekhaw, cia hnenum te khiah a hmuifu i. 39He khiah ling tuu-ih: Inn naitu pa in zaikom fangin ruko hleng tuh khiah ling ta selai amah in mitmu lo in a inn khiah kil tuh ai a inn khiah rok sah tuh napui lo i. 40Ciamanin ningte in khai thuampai tu cia ih. Ziangmanti fangin mi Fapa khiah  a hleng tuh ning um lo teng fangin hleng tuh i.” ti in rel i. 41Ciafangin Peter, “Bawipa, he santehhnak khiah kinte ca ai rel i sim  maw mi veksen ca ai rel i si?” ti in zawt i.  42Ciafangin Bawipa in, “Ciailekhaw a bawipa in amahte khiah a cuu fangin rong pe tu tuh ai a inn uktu ai haihhnak a kung le a dik hnenum khiah aisu i? 43A bawipa hleng fangin ciatih bang ai tawkhnak hnenum khiah hmuifu i. 44Thungai in ning rel ing, Amah khiah a naihhnak hmuahhmuah uk ruai tuh i. 45Ikhalselai cia hnenum in a thin songin, ‘I bawipa in lenngaih i’ ti in ruat in a hnenum dang pasalte le nupangte khiah vit in ei le ding  in um in zuri in um lekhaw, 46Cia hnenum bawi khiah amah in a hlir lo teng nia le zaikhai mangrin lo teng fangin hleng tuh ai, amah khiah cawhkuan pe tuh ai a naperhnak in hnawt tuh le Pathian bialo te camra in dah tuh i.  47Ikhalselai a bawipa daihhnak khiah ling napui ai  ralring lo le a bawipa daihhnak bang in per lo tu hnenum khiah  veltam ngai vit tuh i. 48Ikhalselai  a ling lo manin bawn tute khiah veltam ngai vit tlak napui ai vel tlawmniu lek vit tuh i. Ziangmanti fangin  a tamngai ngah tu pa in a tamngai in pe leh kul tuh  i. Cen mi tamngai in rinsan tu  hnenin mite in a tam amam in ngen tuh i.

Remhnak i lo ai raldunhnak

(Matthew 10:34-36)

49Laivum ah mei hleng ruai tuhin kawi ing. A hlawmsa  i hang selai zaitluk in i daih napui i? 50Ikhalselai  tinim tuar tuh nai ing. Cia khiah i ben hlan lo zaitluk in thinnuam lo in um ing! 51Laivum ah remhnak hleng ruai tuhin hleng i vuah i sim? I lo ing. Ning rel ing, khanhnak hleng ruai tuhai hleng ing. 52Tunai panin innkua pakhat song ah mi panga um tuh ai pakhat le pakhat tawng dun tuh ai mi pathum in mi panih khiah tawng tuh ai mi panih in mi pathum khiah tawng tuh i. 53A paa in a fapa thawn tawng tuh ai a fapa in a paa thawn tawng tuh i. A nuu khiah a fenu thawn tawng tuh ai a fenu khiah a nuu thawn tawng tuh i. Monu  nuu le monu, monu le monu nuu khiah tawng tuh i.” ti in rel i.

Hnikhnaihhnak santehhnak

(Matthew 16:2-3)

54Zisu in mite hnenah, “Nitla hmun lamin mairo kaai fangin, ning te in, ‘Ruahsar si tuh i.’ ti in ti ai  ning ti bangin hman i. 55Cen hlanglam in hli zuang fangin, ‘Khuasa tuh i.’ ti in ti i si. Cia ning ti bangin khim i. 56Mi hrokhrawl ningte, van le laipua ziaza tu  ling thiam lawn si ai a kontih ai  a cu tu ling lo i si?

57Ziangman in a hmanin thukhan thiam lo i si? 58Na raal pa thawn  thukhantu pa hnenah ning kawi fangin,  amah thawn rem thill thai in lam lakah hehlaw ti in zuam tu. Cialo fangin cia pa in thucit tu pa hnenah na ap tuh ai thucit tu pa in palik bawi hnenah na  ap tuh ai  palik bawi in thawng na hla tuh i. 59 Na rel ing. Paisa a veksenin na pe hlan lo cia thawng in suak tuh lo i si.”tin rel i.

<< LUKE 12 >>

Leave a Reply

Your email address will not be published. Required fields are marked *