<< LUKE 13 >>
13 Ciafangin ciata ai umtu mi hrekkhatte in Pilate in Galilee mite thi khiah amahte hluhnak thi thawn rawihhnak thu khiah Zisu rel i. 2Zisu in, “He Galilee mite heh ciatih bangin tuar manin Galilee midang te hnak in sual sawn i ti in ruat i sim? 3Ning rel ing, I lo i. Ikhalselai ningte khai ning sual sir hlahleisikhaw, ning rall tuh ve i. 4Cen Siloam ai puleng khiah a vumah tlok ai thihnak minung hlairiat te khiah Jerusalem ai umtu mite tahin sual sawn ai ruat i sim? 5Ning rel ing, I lo i. Ikhalselai ningte khai ning sual sir hlahleisikhaw, ning rall tuh ve i.” ti in rel i. 6Ciafangin santehhnak pakhat khiah rel i: “Mi pakhat in a vuandum ah thai thing pakhat nai ai a thai sik tuhin kawi le cia thai thing vumah a thai tawk lo i. 7Ciamanin a vuandum siktu pa hnenah, ‘He thai thing vumah thaihmin sik in kum thum kawi i hang ing. Thaihmin pakhat khai tawk lai lo ing. Ciamanin vong tu lio. Zai ca in he thai kung in laipua khiah hm
ang kul hnelhno i?’ ti in ruai i. 8Ciafangin cia pa in, ‘Bawipa, Kum khat song hlum rih tu. A hiang cingkim khiah co ngangkhaw dawm burh ngang. Khuavai ah a thai thai lekhaw cia hmuah i. Thai hlahlekhaw vong tu lio.’ ti in sawn i.” ti in rel i.
Sapbat nia ah Nupui pakhat cakruai i.
10Ciafangin Zisu in sanginn pakhat songah tazahaw ai 11Ciata ah kum hlairiat song khuavang in elkawn ai ur ruaihnak nupui pakhat lo um i. Cia nu khiah a el kawn manin a cang in ding ben lo i. 12Zisu in cia nuu khiah hmu fangin, “Nupui nu, na urhnak in na luat ruai zo i.” ti in rel i. 13Ciafangin Zisu in a kut khiah cia nuu vumah dah ai, cia nuu khai a cang in ding vut ai Pathian khiah thangphat i. 14Sanginn uktu pa khai Zisu in Sabbath nia ah urhnak cakruai manin thinraw ai mite hnenah, “Naperhnak tuh ni ruk um i. Ciamanin ni ruk songah kawi tu i lai ning cakruai tu seh. Sabbath nia ah i ma seh.” ti in rel i. 15Ciafangin Bawipa in, “Mi hrokhrawl pa! Ningte in Sabbath nia ah ning siphuh i tu seh ning kawlpaw i tu seh ti ding ruai tuhin a ri hawk de lo i sim? 16Cia ilekhaw he Abraham fenu khiah Satan in kum hlairiat song thawnghla hnak khiah Sabbath nia ah thawng songin luat ruai pha lo im?” ti in sawn i. 17Zisu in ciatih in rel ben fangin, a el tute khiah hmaisia ngai in um i. Ikhalselai mite tu Zisu bawnhnak lakah ang rauh ngai i.
Pakap cii le Col santehhnak
(Matthew 13:31-33; Mark 4:30-32)
18Ciafangin Zisu in, “Pathian ukhnak khiah zai thawn bang i? Zai thawn santeh tuh ing? 19Pathian ukhnak khiah pakap cii bang i. Cia pakap cii khiah mi pakhat in a vuan ah cing le a po fangin khang le thingkung ah cang ai hli lakai vaniute in a kak vumah buan i.” ti in rel i. 20Cen Zisu in, “Pathian ukhnak khiah zai thawn santeh tuh ing? Vancung ukhnak khiah col thawn bang i. Cia col khiah nupui nu in lang ai sangvut lakah rawih ai a veksenin kai i.” ti in rel leh thio i.
A cik dawngkham kua
(Matthew 7:13-14; 21-23)
22Zisu khai Jerusalem lam feh fangin khuapui le khuatenau caang ah thucuk kong in feh i. 23Ciafangin mi pakhat in, “Bawipa, mi a tlawmniu lek in ohnak ngah tuh im?” ti in zawt i. Zisu in amahte hnenah, 24“Dawngkham kua cik songin lut tuhin zuam tuu-ih. Ziangmanti fangin, ning rel ing, mi tamngai in lut tek tuh napui ai lut ben tuh lo i. 25Inn naitu pa khiah tho in dawngkham khiah kham hnua fangin, ningte in dawngkham pua lamin dawngkham khiah ceuh tuh ai, ‘Bawipa, dawng kin hon tu.’ tin ti tuh i si. Ikhalselai cia pa in, ‘Ning ling lo ing. Cen kon in hleng i ti khai ning ling lo ing.’ ti in ning sawn tuh i. 26Ciafangin ningte in, ‘Nangmah thawn rongei le ding tlaang ai um awng de i sing. Cen kin khualak ah khai thu kin cuk awng de i si.’ ti in ti tuh i si. 27Ikhalselai ani in, ‘Ning ling lo ing. Cen kon in hleng i ti khai ning ling lo ing. I hnenin tlan tuu-ih, a pha lo napertu ningte.’ ti in sawn tuh i. 28Abraham le Aizek le Zakuk le prawfet hmuahhmuah khiah Pathian ukhnak songah ningte in hmu tuh ai ningte khiah sumpua ah ning hnawt tuh i. Ciafang in ciata ah kaphnak le kam riathnak um tuh i. 29Mite khiah nisuak hmun lam le nitla hmun lam le sak lam le hlang lamin Pathian ukhnak songah puai sim tuhin hleng tuh i. 30Cen a hnuataberte khiah hmasaber cang tuh ai a hmasaberte khiah a hnuataber cang tuh i.” ti in rel i.
Zisu khiah Jerusalem manin kap i
(Matthew 23:37-39)
31Ciafangin Farasi hrekkhatte khiah Zisu hnenah kawi ai, “Heta in thawn tulai hmun dang ah feh tu. Herod in na rek nuam i.” ti in rel i. 32Zisu in, “Cia mahleng khiah, ‘Tunnia le thangha ah khuavang khiah hnawt tuh ai mi urte khiah cak ruai tuh ing. Cia ni thum nia fangin i tumhnak ben tuh ing.’ ti in rel tuu-ih. 33Ikhalselai tunnia le thangha le cia thangha ah khai feh tuh betbo ing. Ziangmanti fangin Jerusalem pua ah prawfet pakhat khai thi thill tuh hrimhrim lo i! 34Aw Jerusalem, Jerusalem, prawfet rektu le ning hnenah hlathnak mite khiah lungto thawn rek tute. Arpui in a fa arniute khiah a ko hnia ah khawm bangin na fate khiah hmunkhat in khawm tuhin vel zaizah i nuam napui i. Ikhalselai na nuam lo i! 35Sik tu. Na inn khiah ziang khai bek lo in na hlum sah lio i hang. Na rel ing, ‘Bawipa hming in a hleng tu pa khiah a hmuifu i.’ ti in na ti hlan lo i hmu tuh lo i hang si.” ti in ti i.