Romans 2

<< ROMANS 2 >>

2Ciamanin mi dang mawhhluk tu pa nangmah in kaphaahnak nai lo i si. Ziangmanti fangin mi dang mawh na hluk fangin, nangmah veve mawhhluk i si. Ziangmanti fangin mi mawhhluktu nangmah in khai ciabang bawn ve i si. 2Ikhalselai Pathian in cia bang bawn tute cawh fangin a hman ngai ai cawh i ti ling i sing. 3Cia bang bawntute khiah nang in mawhhluk ai cia bang bawntu nangmah tu Pathian in na cawh loin na luat ruai tuh in um i sim? 4Pathian khiah a hmunthiam ze manin le thin sau ngai ai kin or le kin tuar khiah zainam sah lo i sim? Pathian in hmunthiam manin sirhnak thinlung na suak ruai i ti tang ling lo i sim? 5Ikhalselai na ungtuang manin le sir na nuam lo manin Pathian cawhkuan lian ngai khiah nangmah ca in pam bial i si. Ziangmanti fangin Pathian in a dikcang ngai in cawhkuan pe nia hleng tuh i lai. 6Cia nia ah Pathian in aisu hmuah amahte naperhnak bang in tham tuh i lai. 7Cia nia ah thin sau ngai ai na pha per ai Pathian thangphathnak le zulhnak le kumzangza nunghnak sii tute khiah Pathian in kumzangza nunhnak pe tuh i. 8Ikhalselai amahte hlanlam lek ruat ai thuhman na per lo ai a dikcang lo lam hlunte in Pathian rawhnak ngah tuh i. 9A pha lo napertute in a hmasaber ah Judah mite ciaben fangin Zental te in khai harsahnak le lungsiahnak ngah tuh i. 10Ikhalselai na pha per tute in, a hmasaber ah Judah mite ciaben fangin Zental mite in thangphathnak le upathnak ngah tuh i. 11Ziangmanti fangin Pathian in aisu khai hmaison lo i. 12Ziangmanti fangin Pathian thukham ling lo te khiah amahte sualhnak bang in cawh tuh ai, Pathian thukham ling te khai Pathian thukham bang in cawh tuh i. 13(Ziangmanti fangin Pathian thukham za menma te khiah Pathian hmai ah dikcang i lo ai Pathian thukham a hluntu te ian in Pathian hmai ah dikcang hnak ngah tuh i. 14Pathian thukham ling lo te Zental mite in aisu in cuk napui lo ai amahte thu in Pathian thukham songai umhnak dan bang in bawn fangin, amahte in Pathian thukham khiah ling napui lo ai, ciate khiah amahte ca ah thukham cang i. 15Ciaman in Pathian thukham khiah amahte thinlung songah a ngancia ai um i ti laar i. Cen amahte ruathnak in khai tettikhan ai amahte ruathnak in amahte veve khiah mawhhluk tuak le sualhlat tuak i.) 16He khiah i kawspal thupha i relhnak bangin, Pathian in minungte thuthup khiah Zisu songin Pathian in thukhan tuh i.

17Cen nangmah veve khiah Judah mi ing, Pathian thukham songah um ing, Pathian thawn kin peh dun manin tluangkhawng ing, ti i si. 18Cen Pathian thukham lamah a zirhsa liang na i manin, Pathian daihhnak ling sah ai a pha le a saangber thu hmuahhmuah na daih ai 19Nangmah veve khiah mitcawte konghoitu, khuathim lakai umtute ca ah khuavaar ing ti in nangmah veve sang i si. 20Cen Pathian thukham songai fimhnak le thuhman na ling manin, nangmah veve mivoite thucuktu, naupangte saza ing, ti in ruat i si. 21Ilekhaw mi dangte thucuktu pa, nangmah veve tu cuk lo i sim? Ruko mah ti in tazahaw ai a kontih ai ruko i si? 22Nulepa sualhnak bawn mah ti ai reltu nangmah in nulepa sualhnak bawn aw sim? Thing le lungto milim huatu nangmah in a kontih in sanginn songai Pathian thilri ru sah i si? 23Pathian thukham lamah tluangkhawng tu nangmah in cia thukham hlun lo manin Pathian khiah nautat i sim? 24Ciamanin, ‘Nangmah manin Pathian hming khiah Zental mite lakah hmingsia i.’ ti ai nganhnak bangin i.

25Taksa vunpar cem heh Pathian thukham hlun fang ian ai hnempui i. Cialo fangin Pathian thukham hlun hlahlesikhaw, na vunpar cemhnak heh a cem lo thawn bang i. 26Ciamanin vunpar cem lo te in Pathian thukham hlun lekhaw, cia mite khiah vunpar cem bang in siar sah tuh lo im? 27Lai songah nganhnak thukham naitu le vunpar cem tu nangmah in Pathian thukham hlun lo manin, vunpar cem lo napui ai Pathian thukham hluntu te in, zauh ning suam tuh lo im? 28Ziangmanti fangin Judah minung peupeu te khiah Judah phun songai te tu te i lo i. Ciabang in vunpar cem menma te khiah vunpar cem peupeu te i lo i. 29Ikhalselai Judah mi peupeu te khiah a thin songin Pathian thu hluntute i. Cen vunpar cem peupeu te khai a thin songin Pathian thu hluntute i. Ciate in minung te hnenin i lo ai Pathian hnenin anhnak ngah i.

<< ROMANS 2 >>

Leave a Reply

Your email address will not be published. Required fields are marked *