<< 2 KAWRINTHIAN 3 >>
3Kinmah veve an pan leh thio i ing? Midangte bangin ning hnenah i tu seh ning hnenin i tu seh lethmat lai kin kul im? 2Ningte khiah kin thin songah nganhnak lethmat i si ai mi hmuah in ling ai mi hmuah in siar i. 3Ziangmanti fangin kinmah ai naperhnak ningte khiah laiti thawn lungtlep vumah nganhnak i lo ai minung thinlung songah a nung Pathian ai nganhnak Khrih laikuathnak i si ti laar i. 4Cia thu khiah a ngaingai i ti khiah Zisu songin Pathian hmai ah ling i ing. 5Cia khiah kinte ai bawn benhnak i tihnak i lo i. Ikhalselai kin ben ruaitu tu Pathian i. 6Cia Pathian in lungtlep vumah nganhnak lai i lo ai Ciang Rauhla ai nganhnak Lai Cianghlim Thar tazahaw saza per ben tuhin kin dah i. Ziangmanti fangin lungtlep vumai nganhnak lai in minungte rek i. Ikhalselai Ciang Rauhla in nunhnak pe i. 7Ikhalselai lungtlep vum ai nganhnak le khethnak lai khiah thangphathnak thawn hleng ai cia thangphathnak khiah pai napui riaro ai Israel mite in Moses hmai sik ngio thill lo i. Ciatih bangin lungtlep vumah nganhnak le khethnak lai khiah ciabang thangphathnak thawn hleng lekhaw, 8Ciang Rauhla naperhnak tu thangphathnak lian sawn thawn hleng tuh lo im? 9Ziangmanti fangin mite thi ruaitu lai khiah thangphathnak thawn hleng lekhaw mite dikcang ruaitu Rauhla khiah zaitluk tam thangphathnak thawn hleng tuh i! 10Ziangmanti fangin thangphathnak thawn hleng awnghnak lai khiah a hnakin thangpha sawn hleng manin thangphat hnak nai lo i hang. 11A pai riaro lai khiah thangphathnak thawn hleng lekhaw a bo nia um lo thu khiah zaitluk lianin thangpha i! 12Ciabang ummhnak nai manin pangam ngai in thurel i ing. 13Kinte khiah a dit riaro a tleu khiah Israel mite in a bo tianin sik tuh lo in a hmai khiah ponin khuktu Moses bang i lo i ing. 14Ikhalselai amahte thinlung khiah ruh ngio i lai. Ziangmanti fangin tunnia tian Lai Cianghlim hlun siar fangin cia ponin amahte khuk ngio i. Cia pon khiah Zisu lekin lang thill i. 15Ikhalselai tunnia tianin Moses khiah siar fangin cia ponin amahte khiah khuk ngio i. 16Ikhalselai aisu khai Bawipa hnenah kawi lekhaw cia pon khiah lang sah tuh lio i. 17Bawipa khiah Ciang Rauhla i. Bawipa Ciang Rauhla umhmun ah luathnak um i. 18Ikhalselai a hmai khiah khuk lo tu kin te in hlalang bangin Bawipa thangphathnak tleu ruai ai kinte khiah Bawipa Ciang Rauhla in thangphathnak pakhat hnua thangphathnak songin kin hmel khiah Bawipa hmel bangin kin thleng sah i.
<< 2 KAWRINTHIAN 3 >>